ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި ބޮމެއް އޮތް ކަމަށް ބުނެ ސަމާސާ ކުރުމާ ގުޅިގެން ހައްޔަރުކުރި މިސްރުގެ ޑޮކްޓަރު، ދެ ގައުމުގެ ދެމެދުގައި ކުރެވުނު ޑިޕްލޮމެޓިކް މަޝްވަރާތަކަށް ފަހު ދިވެހި ފުލުހުން ދޫކޮށްލައިފިއެވެ.
އުމުރުން 38 އަހަރުގެ ޕީޓާ ސަމާން މަރްޒޫކް ނަމަކަށް ކިޔާ މި މީހާ މިހާރު ވަނީ އަނބުރާ ގައުމަށް ގޮސްފައެވެ.
މިސްރުގެ ހާރިޖީ ވުޒާރާއިން ނެރުނު ބަޔާނެއްގައި ބުނި ގޮތުގައި، އޭނާ ދޫކޮށްލުމުގެ ކަންކަން ހަމަޖެއްސީ އެ ގައުމުގެ ހާރިޖީ ވަޒީރު ބަދްރު އަބްދުލްއާތީގެ އިރުޝާދުގެ ދަށުންނެވެ. ރާއްޖެއަށް ކަނޑައަޅާފައި ހުންނަ ނޮން-ރެސިޑެންޓް ސަފީރު ހުންނަ ސްރީލަންކާގައި ގާއިމުކޮށްފައިވާ މިސްރުގެ އެމްބަސީ މެދުވެރިކޮށް ދިވެހި ސަރުކާރާ ގުޅައިގެން ވަނީ ކޮންސިއުލާ އެހީތެރިކަން ފޯރުކޮށްދީފައެވެ.
މީގެ އިތުރުން، މިސްރުގެ އެސިސްޓެންޓް ފޮރިން މިނިސްޓާ ފޯ ކޮންސިއުލާ އެފެއާޒް ހައްދާދު އަބްދުއްތައްވާބު އެލް-ގޮހާރީ ވަނީ ރާއްޖޭގެ ހާރިޖީ ވުޒާރާގެ ކޮންސިއުލާ ޑިޕާޓްމަންޓާ އެކު ފުޅާ ދާއިރާއެއްގައި މަޝްވަރާކުރައްވާފައެވެ. މިސްރުގެ ހާރިޖިއްޔާއިން ބުނި ގޮތުގައި، ދިވެހި ސަރުކާރުން އޭނާ ދޫކޮށްލަން ނިންމީ ދެ ގައުމުގެ ދެމެދުގައި އޮތް ގާތް ގުޅުމުގެ މައްޗަށް ބިނާކޮށެވެ.
މުޅި މި މައްސަލައިގެ ތެރޭގައި މިސްރުގެ ކޮންސިއުލާ ސެކްޓަރުން ވަނީ މަރްޒޫކްގެ އާއިލާއާ ގުޅުން ބާއްވައި، މައްސަލައިގެ އެންމެ ފަހުގެ މައުލޫމާތުތައް ހިއްސާކޮށްފައެވެ. އޭނާ އެނބުރި ގައުމަށް ދިއުމުން، މިސްރުގެ ހާރިޖީ ވުޒާރާގައި އެލް-ގޮހާރީ ވަނީ އޭނާއާއި އޭނާގެ އާއިލާއާ ބައްދަލުކުރައްވާފައެވެ. އަދި އާއިލާއިން ވަނީ މިސްރު ސަރުކާރުން ކޮށްދިން މަސައްކަތްތަކަށް ޝުކުރު އަދާކޮށްފައެވެ.
މި ހާދިސާ ހިނގާފައިވަނީ މި މަހުގެ 18 ވަނަ ދުވަހު ވީއައިއޭގެ ސެކިއުރިޓީ ސްކްރީނިން ސަރަހައްދުގައެވެ. އޭނާ ހައްޔަރުކުރީ އޭނާގެ ބޮޑުދައިތަގެ ދަބަސް ފާސްކުރަން އުޅުމުގެ ތެރޭގައި، އޭގައި ބޮމެއް އޮތް ކަމަށް ބުނެ ސަމާސާ ކުރުމުންނެވެ. މި މައްސަލައިގައި އޭނާގެ މައްޗަށް ބިރުދެއްކުމާއި ދޮގު މައުލޫމާތު ފެތުރުމުގެ ތުހުމަތުކޮށް، ކްރިމިނަލް ކޯޓުން ވަނީ އޭނާގެ ބަންދަށް ފަސް ދުވަސް ޖަހާފައެވެ. ކޯޓުގައި އޭނާ ވަނީ އެއީ ސަމާސާއަކަށް ބުނި އެއްޗެއް ކަމަށް ބުނެ މައާފަށް އެދިފައެވެ. ނަމަވެސް ކޯޓުން ނިންމީ އެއާޕޯޓު ފަދަ ސަލާމަތީ ގޮތުން ހައްސާސް ތަނެއްގައި އެފަދަ ވާހަކަތައް ދެއްކުމަކީ މުޖުތަމައުގެ ސަލާމަތަށް އޮތް ނުރައްކާއެއް ކަމަށެވެ. މީގެ އިތުރުން، އޭނާއަކީ ބިދޭސީއަކަށް ވުމުން، ދޫކޮށްލައިފި ނަމަ ފިލައިގެން ދިއުމުގެ ފުރުސަތު އޮތް ކަމަށް ވެސް ކޯޓުން ފާހަގަކުރިއެވެ.
ރާއްޖޭގެ ގާނޫނުލްއުގޫބާތާއި ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުން، މީހެއްގެ ފުރާނައަށް ނުވަތަ ހަށިގަނޑަށް ގެއްލުމެއް ދީފާނެ ކަމުގެ ބިރުދެއްކުމަކީ ޖިނާއީ ކުށެކެވެ. މި ގާނޫނުގެ ހަތަރު ވަނަ މާއްދާގެ ދަށުން، މީހަކަށް މަރުގެ އިންޒާރު ދިނުމަކީ ނުވަތަ ބޮޑު އަނިޔާއެއް ދީފާނެ ކަމުގެ ބިރުދެއްކުމަކީ ހަ މަހާއި 18 މަހާ ދެމެދުގެ މުއްދަތަކަށް ޖަލަށް ލެވިދާނެ ކުށެކެވެ. އަދި ގާނޫނުލްއުގޫބާތުގެ 520 ވަނަ ބާބުގެ ދަށުން ދޮގު މައުލޫމާތު ފެތުރުމަކީ ވެސް ގާނޫނީ ގޮތުން އަދަބު ލިބޭ ކަމެކެވެ.
މި ހާދިސާއާ ގުޅިގެން މިސްރުގެ ހާރިޖީ ވުޒާރާއިން ވަނީ، ރާއްޖެއިން ބޭރަށް ދަތުރުކުރާ އެ ގައުމުގެ ރައްޔިތުން އެ ގައުމެއްގެ ގާނޫނުތަކާއި ގަވާއިދުތަކަށް ހުރުމަތްތެރިކޮށް ހިތުމަށާއި، އެއާޕޯޓުތަކުގެ ސަލާމަތީ ކަންކަމާ ގުޅޭ އިރުޝާދުތަކަށް ބޯލެނބުމަށް އިލްތިމާސްކޮށްފައެވެ. ބައިނަލްއަގުވާމީ އެއާޕޯޓުތަކުގައި ބޮމާ ގުޅޭ ގޮތުން ދައްކާ ވާހަކަތަކަކީ ސަމާސާއަކަށް ވިޔަސް، އެއީ ސަލާމަތީ ނުރައްކާއެއްގެ ގޮތުގައި ބަލައި ފިޔަވަޅު އަޅާ ކަންކަމެވެ.