މިދިޔަ އޮގަސްޓު މަހުގައި، އަސާސީ ތަކެތީގެ އަގުތައް ދަށްވިއިރު، ތަރުކާރީއާއި މޭވާގެ އަގުތައް އުފުލުނު ކަމަށް މޯލްޑިވްސް ސްޓެޓިސްޓިކްސް ބިއުރޯގެ ތަފާސްހިސާބުތަކުން ދައްކައިފިއެވެ.
ސްޓެޓިސްޓިކްސް ބިއުރޯއިން އާންމުކޮށްފައިވާ، އަސާސީ މުދަލުގެ އެވްރެޖް އަގުތަކަށް އަންނަ ބަދަލުތައް ދައްކުވައިދޭ އިންޑެކްސް (ސީޕީއައި)އިން ދައްކާ ގޮތުގައި، މިދިޔަ މަހު އެ ތަކެތީގެ އަގުތައް ވަނީ 1.15 ޕަސެންޓު ދަށްވެފައެވެ.
މަހުން މަހަށް ބަލާއިރު، އަސާސީ ތަކެތީގެ އަގު ދަށްވި ނަމަވެސް އަހަރުން އަހަރަށް އަންނަނީ އަގު އުފުލެމުންނެވެ. އެގޮތުން، މިދިޔަ އަހަރުގެ މި މުއްދަތާ އަޅާބަލާއިރު، 0.76 ޕަސެންޓު އަސާސީ ތަކެތީގެ އަގުތަކުން ވަނީ އުފުލިފައެވެ.
ސީޕީއައިގެ ހިސާބުތަކުން އެނގޭ ގޮތުގައި، މިދިޔަ އަހަރާ އަޅާބަލާއިރު، އަސާސީ ތަކެތީގެ އަގުތައް އެންމެ ބޮޑަށް އުފުލުނީ މިދިޔަ އޭޕްރީލްގައެވެ. އެ މަހު އެ ބާވަތްތަކުން ތިން ޕަސެންޓު ވަނީ އުފުލިފައެވެ.
މިދިޔަ މަހުގެ އަސާސީ މުދަލުގެ އަގުތައް ދަށްވި ނަމަވެސް، ބައެއް ބާވަތްތަކުގެ އަގުތައް ވަނީ ބޮޑުވެފައެވެ. އެގޮތުން، އެންމެ ބޮޑަށް އަގުތައް މައްޗަށް ދިޔައީ އެކޮމޮޑޭޝަން ޚިދުމަތްތަކުންނެވެ. އެ ޚިދުމަތްތަކުން ވަނީ، 2.72 ޕަސެންޓު މައްޗަށް ގޮސްފައެވެ.
ބަޔަކު ފިހާރައެއްގައި ވިޔަފާރި ކުރަނީ: އަސާސީ ތަކެތީގެ އަގުތައް މިދިޔަ މަހު ވަނީ ދަށްވެފައި -- ސަން ފޮޓޯ/ ފަޔާޒު މޫސާމުވާސަލާތީ ޚިދުމަތްތަކުންނެވެ 2.23 ޕަސެންޓު އަގުތައް މައްޗަށް ދިޔައިރު، ބިހާއި ކިރުގެ އުފެއްދުންތަކުން ވަނީ 1.19 ޕަސެންޓު ވަނީ އުފުލިފައެވެ.
މީގެއިތުރުން، މޭވާއާއި ތަރުކާރީގެ އަގުތަކުން ވެސް 1.19 ޕަސެންޓު މިދިޔަ މަހު އުފުލުނުއިރު، ކާތަކެތީގެ އުފެއްދުންތަކުން 1.11 ޕަސެންޓު މައްޗަށް ގޮސްފައިވެއެވެ.
ރާއްޖެއަކީ ކާބޯތަކެތި ގެނައުމަށް އިމްޕޯޓަށް ބަރޯސާވެފައިވާ ގައުމަކަށްވާއިރު، ބައިނަލްއަގުވާމީ ބާޒާރަށް އަންނަ ބަދަލުތަކުގެ އަސަރު ވަރަށް ބޮޑަށް ކުރެއެވެ. އެގޮތުން ފެބުރުވަރީ 28ގައި މެދުއިރުމަތީގައި ފަށައިފައިވާ ހަނގުރާމައިގެ ސަބަބުން ސަޕްލައި ޗެއިންއަށް ބުރޫ އެރުމުން، ރާއްޖޭގައި ވެސް ތެލާއި އެހެނިހެން ތަކެތީގެ އަގު ވަރަށް ބޮޑަށް އުފުލެން ފެށިއެވެ.
މި އަހަރަކީ ރާއްޖޭން ޖުމުލަ 1.1 ބިލިއަން ޑޮލަރުގެ ދަރަނި ދައްކަން ޖެހޭ އަހަރެއް ކަމަަށްވާއިރު، ބޭރުގެ އިދާރާތަކުން މިދިޔަ އަހަރު ވެސް ވަނީ މި އަހަރު ރާއްޖޭގައި ތަކެތީގެ އަގު އުފުލޭނެ ކަމަށް ލަފާކޮށްފައެވެ.
މެދުއިރުމަތީގައި ކުރިއަށްދާ ހަނގުރާމަ ދިގުދެމިގެންގޮސްފައިވާއިރު، ތަކެތީގެ އަގު އުފުލުމުގެ ބިރު ވަނީ އިތުރަށް ބޮޑުވެފައެވެ. އެގޮތުން އޭޝިއަން ޑިވެލޮޕްމެންޓް ބޭންކް (އޭޑީބީ)ން އެންމެ ފަހުން ނެރެފައިވާ ރިޕޯޓުގައި ވެސް ވަނީ، ރާއްޖޭގައި އަހަރު ބާކީ ބައިގައި ތަކެތީގެ އަގު އިތުރަށް އުފުލޭނެ ކަމަށް އަންދާޒާކޮށްފައެވެ.