ކ. މާފުށީ ބޭރުގައި ފްލޯޓިން ބާއެއްގެ ގޮތުގައި ބޭނުންކުރަމުން އައި ސަފާރީ އެ ރަށު ބަނދަރު ސަރަހައްދަށް ލައްވެ ފުނޑުފުނޑުވެއްޖެއެވެ.
މިއަދު ހެނދުނު 9:30 ހާއިރު މި ހާދިސާ ހިނގީ މޫސުން ގޯސްވެ ވައިގަދަވުމުގެ ސަބަބުން ސަފާރީގެ ނަގިލި ކަހާލައިގެން ދިއުމާ ގުޅިގެންނެވެ. މި ހާދިސާގައި ސަފާރީއަށް ބޮޑެތި ގެއްލުންތަކެއް ލިބިފައިވާއިރު، އޭގައި ތިބި މީހުން ވަނީ މޫދަށް ފުންމާލައިގެން ސަލާމަތްވެފައެވެ.
މާފުށީ ފަޅުތެރެއިން ބޭރުގައި އާންމުކޮށް އަޅާފައި އޮންނަ މި އުޅަނދަކީ ފަތުރުވެރިންގެ މެދުގައި މަގުބޫލު ތަނެކެވެ. މި ހާދިސާ ހިނގިއިރު މުޅި ރާއްޖެއަށް ވެސް އަންނަނީ ވިއްސާރަކުރަމުންނެވެ.
މަންޒަރު ދުށް މީހަކު "ސަން" އަށް ބުނި ގޮތުގައި، ސަފާރީ ބަނދަރަށް ލައްވިތާ މާ ގިނައިރުތަކެއް ނުވެ، ބޮޑެތި ރާޅުތައް ޖަހައި އެ އުޅަނދު ވަނީ ފުނޑުފުނޑުވެފައެވެ. ހާދިސާ ހިނގި ވަގުތު ސަފާރީގައި ތިބި ފަސިންޖަރުންނާއި ފަޅުވެރިންގެ ސީދާ އަދަދެއް ރަސްމީ އިދާރާތަކުން އަދި ހާމަކޮށްފައެއް ނުވެއެވެ.
ނަމަވެސް، އުޅަނދު އެއްގަމަށް ލައްވާން ފެށުމާއެކު އޭގައި ތިބި އެންމެން މޫދަށް ފުންމާލި ކަމަށާއި، އެއްވެސް މީހަކަށް އަނިޔާއެއް ލިބިފައިނުވާ ކަމަށް މާފުށިން ވާހަކަދެއްކި މީހަކު ބުނެފައިވެއެވެ.
އުޅަނދުގެ ބައިތައް ފަޅުތެރެއަށް އެޅިފައިވުމުން، އެ ތަކެތި ނެގުމުގެ މަސައްކަތް ވެސް ކަމާބެހޭ ފަރާތްތަކުން ވަނީ ފަށާފައެވެ.
މުޅި ރާއްޖެއަށް މޫސުން ގޯސްވެފައިވާއިރު، މޫސުމާ ބެހޭ ގައުމީ އިދާރާ (މެޓް އޮފީސް) އިން ވަނީ މިއަދު އިރުއޮއްސި 6:00 އާ ހަމައަށް ރާއްޖޭގެ ބޮޑު ބަޔަކަށް ވިއްސާރަކުރާނެ ކަމަށް ލަފާކޮށްފައެވެ. އެ އިދާރާއިން ބުނި ގޮތުގައި ބައެއް ރަށްތަކަށް ބޯކޮށް ވާރޭވެހުމާއެކު ގުގުރުން އެކަށީގެންވެއެވެ. ދެކުނުގެ އަތޮޅުތަކަށް ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކޮށްފައިވާއިރު، އެހެން ހިސާބުތަކަށް ވައި ޖެހޭނީ ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައެވެ. އަދި ވިލާގަނޑުގައި ގަޑިއަކު 50 މޭލަށް ވައި ގަދަވާނެ ކަމަށް މެޓް އޮފީހުން ބުނެފައިވެއެވެ. މީގެ އިތުރުން، ރާއްޖޭގެ އެކި ހިސާބުތަކަށް ހުދު ސަމާލު ވެސް ވަނީ ނެރެފައެވެ.
މީގެ އިތުރުން، ދެކުނުގެ ކަނޑުތައް އާދައިގެ ވަރަކަށް މަޑުވެފައި ވިލާގަނޑުގައި ގަދަވާނެ ކަމަށާއި، އެހެން ހިސާބުތަކުގެ ކަނޑުތައް އާންމު ގޮތެއްގައި ގަދަވާނެ ކަމަށް މެޓް އޮފީހުން ލަފާކޮށްފައިވެއެވެ. ރާޅުގެ އުސްމިން މެދުތެރެއާއި އުތުރުގެ އަތޮޅުތަކުގައި ފަސް ފޫޓާއި ހަތް ފޫޓާ ދެމެދުގައި ހުންނާނެ ކަމަށާއި، ދެކުނުގެ އަތޮޅުތަކުގައި ހަތަރު ފޫޓާއި ހަ ފޫޓާ ދެމެދުގައި ހުންނާނެ ކަމަށް ވަނީ ލަފާކޮށްފައެވެ. ދިޔަވަރު ބޮޑުވާ ގަޑިތަކުގައި ރާޅު އެރުމުގެ ފުރުސަތު އޮތުމާއެކު، އުދައަރާފާނެ ކަމުގެ އިންޒާރު ވެސް ވަނީ ދީފައެވެ.
ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށާއި، ދަތުރަށް ފެށުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދުމަށް ކޯސްޓްގާޑުންނާއި މެޓް އޮފީހުން ވަނީ އިލްތިމާސްކޮށްފައެވެ. ހާއްސަކޮށް ކުދި އުޅަނދުފަހަރުގައި ދަތުރުކުރާ ފަރާތްތަކުން ރައްކާތެރިކަމުގެ ފިޔަވަޅުތައް އެޅުމަށް ކަމާބެހޭ އިދާރާތަކުން ވަނީ އަންގާފައެވެ.