ދައުލަތުން ސަބްސިޑީއަށް ކުރި ހޭދަ އިތުރުވެ، މި މަހުގެ ހަތަރު ވަނަ ދުވަހުގެ ނިޔަލަށް ސަބްސިޑީ ބަޖެޓުގެ 80 ޕަސެންޓް ޚަރަދުކޮށްފިއެވެ.
ފިނޭންސް މިނިސްޓްރީން ނެރެފައިވާ، ދައުލަތުގެ އާމްދަނީ އާއި ޚަރަދުގެ ތަފްސީލުން ދައްކާ ގޮތުން، މި އަހަރަށް ސަބްސިޑީތަކަށް ކަނޑައަޅައިފައިވަނީ 2.89 ބިލިއަން ރުފިޔާއެވެ. އޭގެ ތެރެއިން މި މަހުގެ ހަތަރު ވަނަ ދުވަހުގެ ނިޔަލަށް 2.30 ބިލިއަން ރުފިޔާ ހޭދަކޮށްފައިވާ ކަމަށް ތަފާސްހިސާބުން ދައްކައެވެ.
މިދިޔަ އަހަރުގެ މި މުއްދަތުގައި ސަބްސިޑީއަށް ހޭދަކޮށްފައިވަނީ 1.36 ބިލިއަން ރުފިޔާ ކަމަށްވާއިރު، މި އަހަރުގެ އަދަދަކީ އެއަށްވުރެ 68.9 ޕަސެންޓްގެ އިތުރުވުމެކެވެ.
ދައުލަތުން މިހާތަނަށް ސަބްސިޑީތަކާއި އެހެނިހެން ހިލޭ އެހީއަށް ކޮށްފައިވާ ޚަރަދު މިހާރު ވަނީ 5.69 ބިލިއަން ރުފިޔާއަށް އަރައިފައެވެ. އެއީ އާސަންދައަށް ކޮށްފައިވާ 971 މިލިއަން ރުފިޔާއާއި ކައުންސިލްތަކަށް ދޫކޮށްފައިވާ 1.05 ބިލިއަން ރުފިޔާ ހިމެނޭ ގޮތަށެވެ. އެ ހުރިހާ އެހީތަކަށް ވަނީ ޖުމްލަ 10.6 ބިލިއަން ރުފިޔާ ބަޖެޓްކޮށްފައެވެ.
ރާއްޖޭގައި ކަރަންޓާއި ތެލާއި ނަރުދަމާގެ ޚިދުމަތާއި ކާޑުގެ ބާވަތްތަކުގެ ސަބްސިޑީއަށް ބޮޑު އަދަދެއް ޚަރަދުކުރެއެވެ. މި އަހަރުގެ ބަޖެޓު ފޮތުގައިވާ ގޮތުން ތެލަށް އެކަނި ވެސް 1.06 ބިލިއަން ރުފިޔާގެ ސަބްސިޑީ ވަނީ ކަނޑައަޅައިފައެވެ.
މި އަހަރުގެ ފެބްރުވަރީ މަހުގެ 28ގައި މެދުއިރުމަތީގައި ފެށި ހަނގުރާމައާ ގުޅިގެން ތެލުގެ އަގު ވަނީ ވަރަށް ބޮޑަށް އުފުލިފައެވެ. އޭގެ އަސަރު ރާއްޖެއަށް ވެސް ކޮށް، ތެލަށް ކުރާ ހޭދަ ވަނީ އިތުރުވެފައެވެ.
ރާއްޖޭގައި ސަބްސިޑީ އާއި އާސަންދަ ނިޒާމު ހިންގަނީ ދެމެހެއްޓެނިވި ގޮތަކަށް ނޫން ކަމަށް އޮޑިޓްތަކުންނާއި ބޭރުގެ މާލީ އިދާރާތަކުން ވެސް ފާހަގަކުރާތާ އަހަރުތަކެއް ވަނީ ވެފައެވެ.
އެ މައްސަލަ ހައްލުކުރުމަށް މި ސަރުކާރުން މިދިޔަ އަހަރު އިސްލާހީ ފިޔަވަޅުތަކެއް ބަޖެޓުކުރިއެވެ. އެގޮތުން ސަބްސިޑީ އެންމެންނަށް ދިނުމުގެ ބަދަލުގައި، އެހީ ބޭނުންވާ މީހުން ދެނެގަނެ އެހީ ފޯރުކޮށްދިނުމަށް ނިންމިއެވެ. އެހެން ނަމަވެސް ރައްޔިތުންނަށް ބުރަވެދާނެ ކަމަށް ވިދާޅުވެ، ރައީސް ޑރ. މުހައްމަދު މުއިއްޒު ފަހުން ވަނީ އެ ފިޔަވަޅު ތަންފީޒު ނުކުރުމަށް ނިންމަވައިފައެވެ.
އެ އިސްލާހީ ފިޔަވަޅުތަކުގެ ބަދަލުގައި މިދިޔަ އަހަރު ޚަރަދު ކުޑަ ކުރީ ތަރައްގީގެ މަޝްރޫއުތައް މަޑުޖައްސާލައިގެންނެވެ.
ދައުލަތުން ޚަރަދު ކުޑަކުރުމުގެ ހަރުކަށި ފިޔަވަޅުތައް އަޅަން ޖެހުނީ ފާއިތުވި އަހަރުތަކުގައި ނަގައިފައިވާ ދަރަނިތައް އިތުރުވެ، މި އަހަރު އެކަނިވެސް 1.1 މިލިއަން ޑޮލަރު ދައްކަން ޖެހިފައި އޮތުމުންނެވެ. އޭގެ ތެރެއިން މިދިޔަ އޭޕްރީލް މަހު އެއްފަހަރާ 500 މިލިއަން ޑޮލަރުގެ ދަރަންޏެއް ދައްކައިފައިވާއިރު، މިހާތަނަށް ބަޖެޓުން ދަރަނި ދައްކަން 8.71 ބިލިއަން ރުފިޔާ ވަނީ ޚަރަދުކޮށްފައެވެ. އެއީ މި އަހަރު ދަރަނި ދަައްކަން ބަޖެޓުގައި ހިމެނި 12.9 ބިލިއަން ރުފިޔާގެ 67.4 ޕަސެންޓެވެ.