ރާއްޖޭގެ މީޑިއާ ދާއިރާގައި އެންމެ އިތުބާރު ހިފޭ އެއް ނަން ކަމަށްވާ ސަން އޮންލައިންއަށް މިއަދު 19 އަހަރު ފުރިއްޖެއެވެ.
ވޭތުވެދިޔަ 19 އަހަރުގެ ދިގު މާޒީގައި ސަން އޮންލައިން ދެމިއޮތީ ރައްޔިތުންނަށް ތެދު ޚަބަރާއި މައުލޫމާތު ފޯރުކޮށްދިނުމުގެ މަތީގައެވެ. އަދި ކުރިމަގުގައި ވެސް މި ނޫހުގެ މިސްރާބު ހުރީ ހަމަ އެ ގޮތުގައި، ނޫސްވެރިކަމުގެ އަޚުލާގީ މިންގަނޑުތައް ހިފަހައްޓައިގެން ކުރިއަށް ދިއުމަށެވެ.
މި މުނާސަބަތާ ގުޅިގެން ސަން އޮންލައިން ހިންގާ, ސަން ސިޔާމް މީޑިއާގެ ސީއީއޯ މުޙައްމަދު އާސިފް (މޮންދު) ވިދާޅުވީ، ރާއްޖޭގައި މެދުކެނޑުމެއް ނެތި ހިންގާތާ އެންމެ ދުވަސްވީ އެއް ނޫހަކީ ސަން އޮންލައިން ކަމަށެވެ. އަދި ޚަބަރާއި މައުލޫމާތު ހޯދުމުގައި ގިނަ ރައްޔިތުންތަކެއްގެ ފުރަތަމަ އިޚުތިޔާރަކަށް ސަން ވުމަކީ ލިބިވަޑައިގަންނަވާ ވަރަށް ބޮޑު އުފަލެއް ކަމަށް އޭނާ ފާހަގަކުރެއްވިއެވެ.
ސަން އޮންލައިން ހިންގާ, ސަން ސިޔާމް މީޑިއާގެ ސީއީއޯ މުޙައްމަދު އާސިފް (މޮންދު) -- ސަން ފޮޓޯ
ތަފާސްހިސާބުތަކުން ދައްކާ ގޮތުގައި މިހާރު ވެސް ދުވާލެއްގެ މައްޗަށް ލައްކައަކަށްވުރެ ގިނަ ހިޓްސް ސަން އޮންލައިންއަށް ލިބެއެވެ. މިއީ ރައްޔިތުންގެ މެދުގައި އެ ނޫހަށް އޮތް މަގުބޫލުކަން ހާމަކޮށްދޭ އަލިގަދަ ހެއްކެއް ކަމަށް މޮންދު ވިދާޅުވިއެވެ.
"އަޅުގަނޑުމެންނަށް މި ގޮތަށް ކުރިއަށް މި ދެވެނީ މި މީޑިއާގެ ވެރިޔާ އަޙްމަދު ސިޔާމް މުޙައްމަދުގެ ފުރިހަމަ އެއްބާރުލެއްވުމުގެ ސަބަބުން. ނުފޫޒުން އެއްކިބާ ވެފައިވާ މިނިވަން މީޑިއާއެއް ހިންގެވުމަށް ސިޔާމް ދެއްވާ އެއްބާރުލުން ޝުކުރު ވެރިކަމާ އެކު ފާހަގަ ކުރަން،" ނޫހުގެ ކާމިޔާބީގެ ސިއްރާ ގުޅޭގޮތުން ވާހަކަދައްކަވަމުން މޮންދު ވިދާޅުވިއެވެ.
މީގެ އިތުރުން، ފާއިތުވި ދިގު މުއްދަތުގައި ނޫހަށް ޚިދުމަތްކޮށްދެއްވި ހުރިހާ ފަރާތްތަކެއްގެ އަގު ވަޒަންކުރައްވައި މޮންދު ވިދާޅުވީ، 19 އަހަރީ ވަރަށް ދިގު މުއްދަތެއް. މިހާ ހިސާބަށް ސަން އަށް އާދެވުނީ ވަރަށް ގިނަ ބައެއްގެ ޚިދުމަތުންކަން ފާހަގަކުރައްވާ ކަމަށެވެ. އަދި އެ ހުރިހާ ބޭފުޅުންނަށް ވެސް އަޅުގަނޑުމެން ޝުކުރު ދަންނަވާ ކަމަށެވެ.
ސަން އޮންލައިންގެ އެޑިޓޯރިއަލް ސިޔާސަތާ ގުޅޭގޮތުން ނޫހުގެ މެނޭޖިން އެޑިޓަރު އަޙްމަދު ސާއިލު ޢަލީ ވިދާޅުވީ، މި ނޫހަށް އަބަދުވެސް އެންމެ މުހިންމު ވާނީ ގައުމާއި ރައްޔިތުންގެ މަސްލަހަތު ކަމަށެވެ. އަދި ތެދު ނޫން އެއްވެސް މައުލޫމާތެއް ސަން އިން ގެނެސްނުދޭނެ ކަމުގެ ޔަގީންކަން އޭނާ ދެއްވިއެވެ. ސާއިލު ފާހަގަކުރެއްވި ގޮތުގައި، ނޫސްވެރިންގެ އެންމެ ބޮޑު ޒިންމާއަކީ ގައުމު ހަމަ މަގަށް އަޅުވައި، ގައުމުގެ ތަރައްގީއަށް އެއްބާރުލުން ދިނުމެވެ. އަދި ސަން އޮންލައިން އަބަދުވެސް ދެމިއޮންނާނީ އެ ގޮތުގެ މަތީގައި ކަމަށް އޭނާ ވިދާޅުވިއެވެ.
ސަން އޮންލައިންގެ މެނޭޖިން އެޑިޓަރު އަޙްމަދު ސާއިލު ޢަލީ -- ސަން ފޮޓޯ
"ސަން އިން ނޫސްވެރިކަން ކުރާނީ ޑިމޮކްރަސީގައި އެ ބާރު ދީފައިވާ މަގުސަދު ހާސިލު ކުރަން. އެ ނޫން މަގުސަދެއް އަޅުގަނޑުމެންގެ ނެތް،" ޑިމޮކްރެޓިކް މުޖުތަމައެއްގައި ނޫސްވެރިކަމުގެ ދައުރު ފާހަގަކުރައްވަމުން ސާއިލު ވިދާޅުވިއެވެ.
ސަން އޮންލައިންގެ ތާރީޚަށް ބަލާއިރު، މި ނޫސް އެންމެ ފުރަތަމަ ވުޖޫދަށް އައީ 2007 ވަނަ އަހަރު 'އިރު އޮބްޒާވާ' ގެ ނަމުގައެވެ. އޭގެ ފަހުން ޒަމާނާ އެއްގޮތަށް ބަދަލުތައް ގެނެސް، ނޫހުގެ ނަން ސަން އޮންލައިންއަށް ބަދަލުކުރެވުނެވެ. މީގެ ކުރިން ސަން މީޑިއާގެ ކުޑައިގެ ދަށުން ސަން އެފްއެމް އާއި ސަން ޓީވީ ވެސް ވަނީ ވަރަށް ކާމިޔާބުކަމާއެކު ހިންގާފައެވެ. މިހާރު ސަން ސިޔާމް މީޑިއާގެ ދަށުން މި މީޑިއާ ހިންގަމުން އަންނައިރު، ސަން އޮންލައިންގެ އިތުރުން އެސްއެސްޓީވީ އާއި ސަން ޕްލޭ ފަދަ އާންމުންގެ މެދުގައި މަގުބޫލު ޕްރޮޑަކްޓްތައް ދަނީ ހިންގަމުންނެވެ. މިއާއެކު، ރާއްޖޭގެ މީޑިއާ ލޭންޑްސްކޭޕްގައި ސަން ސިޔާމް މީޑިއާއިން އަންނަނީ މުހިންމު ދައުރެއް އަދާކުރަމުންނެވެ.