އިމާރާތް ކުރުމުގެ ދާއިރާއަށް އެންމެ މުހިންމު ތަކެތީގެ ތެރޭގައި ހިމެނޭ ސިމެންތި ބަސްތާއެއްގެ އަގު މާލޭ ބާޒާރުގައި ވެސް 300 ރުފިޔާއިން މައްޗަށް ގޮސްފިއެވެ.
އާއްމުކޮށް 140 ރުފިޔާއާއި 160 ރުފިޔާ އާ ދެމެދު ވިއްކަމުން ދިޔަ, ސިމެންތި ބަސްތާއެއްގެ އަގު 250 ރުފިޔާއަށް ބޮޑުވީ ނިމިދިޔަ މަހުގެ ފަހުކޮޅުގައެވެ. އޭރު މާލޭ ބާޒާރުގައި 250 ރުފިޔާއަށް ސިމެންތި ބަސްތާއެއްގެ އަގު އެރުމާއެކު ކުޅުދުއްފުށީ ސިޓީފަދަ ތަންތަނުގައި ބަސްތާއެއްގެ އަގު 300 ރުފިޔާއަށް ވުރެން މަތިވިއެވެ.
މިއަދު ސިމެންތި ލިބެންހުރި އަގުތަކަށް ބަލާއިރު ރާއްޖެއަށް އެންމެ ގިނައިން ސިމެންތި އެތެރެ ކުރާ އަމިއްލަ އެއް ކުންފުނި ކަމަށްވާ, ވިލާއިން މާލެއަށް ޑެލިވަރީ ކޮށްދެނީ ބަސްތާއެއް 313 ރުފިޔާއަށެވެ. ތިލަފުށީ ކޮޅުން ގަންނަނަމަ 302 ރުފިޔާއަށް ބަސްތާއެއް ދެއެވެ. މިއީ ކުރިއާ އަޅާބަލާއިރު ވަރަށް ބޮޑު އަގެކެވެ.
ވިޔަފާރިވެރިން ބުނަނީ މި ދުވަސްވަރު އެސްޓީއޯއިން ސިމެންތި ގަންނަން ނުލިބޭ ކަމަށެވެ. ނަމަވެސް މިކަމާ ގުޅިގެން އެސްޓީއޯގެ ރަސްމީ ބަހެއް އަދި ވަނީ ލިބޭގޮތް ނުވެފައެވެ.
"މަސައްކަތްތައް މުޅިން ގާތްގަނޑަކަށް ހުއްޓިއްޖެ. މި އަގަށް ސިމެންތި ގަނެގެން ދެކޮޅެއް ނުޖެހޭނެ," އދ. އަތޮޅު ރަށެއްގައި ގެސްޓްހައުސްއެއް އެޅުމުގެ މަސައްކަތް ކުރާ މީހަކު ބުންޏެވެ.
ވިލާއަކީ ރާއްޖޭން ބޭރުން ސިމެންތި ގެނެސް ރާއްޖޭގައި ބަންދުކޮށްގެން ވިއްކާ ކުންފުންޏެވެ. ކުއްލިއަކަށް ސިމެންތީގެ އަގު މިހާ ބޮޑުވާން ދިމާވީ ހަނގުރާމައިގެ ސަބަބުން އުޅަނދު ފަހަރުގެ ފްރައިޓް ކޯސްޓް ބޮޑުވުމުގެ ސަބަބުން ކަމަށްވެއެވެ.
މި ދޭތެރެއިން އެސްޓީއޯގެ ދަށުން ހިންގާ މޯލްޑިވް ގޭސްއިން ވެސް ގޭސް ސްޓޮކް މަދުވިއެވެ. އެ ފަހަރު އެ ކުންފުނިން ގޭސް ގަތީ ވިލާއިންނެވެ. ވިލާއިން ގޭސް ގަނެގެން އެ ކުންފުނިން އާއްމުންނަށް ވިއްކަމުން ދިޔައީ ލިމިޓް ކޮށްގެންނެވެ. ނަމަވެސް ގޭސް ލިބުމާއެކު މިހާރު މޯލްޑިވް ގޭސްއިން ވަނީ ލިމިޓް އުވާލައި އާއްމު އުސޫލުން ގޭސް ވިއްކަން ފަށައިފައެވެ.