ބަންޑާރަ މިސްކިތް ނުވަތަ މަސްޖިދުލް ސުލްތާން މުޙައްމަދު ޝަމްސުއްދީން ތާރީޚީ ތަނެއްގެ ގޮތުގައި ހިމާޔަތް ކުރުމަށް އެދި ރައްޔިތުންގެ މަޖިލީހަށް އީ ޕެޓިޝަނެއް ހުށަހަޅައިފިއެވެ.
މީގެ ތިން ވަރަކަށް ދުވަސް ކުރީން އިސްލާމިކް މިނިސްޓަރު ޑރ. މުޙައްމަދު ޝަހޫމް އަލީ ސައީދު ވަނީ، ބަންޑާރަ މިސްކިތަކީ އާސާރީ ތަރިކައިގެ ތެރޭ ހިމެނޭ ތަނެއް ނޫން ކަމަށާއި އެހެންކަމުން އެ ތަނުގައި އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރަން ބޭނުންވާ ކަމަށް ވިދާޅުވެފައެވެ.
އަދި، ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅަން ބޭނުންވާ އެހީތެރިކަން، ދީލަތި ފަރާތަކުން ހަމަޖައްސައިދީފައިވާ ކަމަށް މިނިސްޓަރު އޭރު ވަނީ ވިދާޅުވެފައެވެ.
ބަންޑާރަ މިސްކިތް ތަޅާލައި އެ ތަނުގައި ބޮޑު މިސްކިތެއް އަޅާވާހަކަ މިނިސްޓަރު ވިދާޅުވުމުން ސޯޝަލް މީޑީއާގައި ގިނަ ބަޔަކު ވަނީ އެތަން ހިމާޔަތްކުރުމަށް ގޮވާލާ، އެކަމަށް ފާޑުކިޔާފައެވެ. އެއާއެކު، އަންނަ ކައުންސިލް އިންތިޚާބުގައި މާލޭގެ މާފަންނު އުތުރު ދާއިރާއަށް ވާދަކުރައްވާ ހުސައިން ފުރުޝާން ވަނީ އެކަމާ ގުޅުވާ މަޖިލީހަށް ޕެޓިޝަނެއް ހުށަހަޅާފައެވެ.
އޭނާ ހުށަހަޅާފައިވާ ޕެޓިޝަނިގައި ވަނީ މާލޭ ބަންޑާރަ މިސްކިތް އެންމެ ޚާއްވަނީ އިނގިރޭސި ޙިމާޔަތުގެ އަޅުވެތިކަމަށް ދިޔުމާ އަދި އެ އަޅުވެތިކަމުން މިނިވަންވުމާ ބަންޑާރަ މިސްކިތާ ގުޅިފައިވާތީ ކަމަށެވެ. އަދި، އިނގިރޭސީންގެ އަތުން ރާއްޖެ މިނިވަންވުމާއި ގުޅިފައިވާ ހުރިހާ ތަނެއް މިހާރު ނައްތާލެވިފައިވާ ކަމަށާއި އެ ހަނދާންތައް މިހާރު ހަމައެކަނި ފެންނަން ހުރި ބިނާއަކީ ބަންޑާރަ މިސްކިތް ކަމަށް ޕެޓިޝަނުގައި ބުނެފައިވެއެވެ.
މާލޭގައި ހުންނަ ދުވަސްވީ ބަންޑާރަ މިސްކިތް ތަޅާލަން ސަރުކާރުން ނިންމައިފައިވާތީ، އެ މިސްކިތުގެ ތާރީޚަށް އަލިއަޅުއްވާލައްވައި، އެ މިސްކިތް ތަޅާލުމަކީ ތަރިކައެއް ނައްތާލުން ކަމަށް މޯލްޑިވްސް ނެޝަނަލް ޔުނިވާސިޓީ (އެމްއެންޔޫ)ގެ ކުރީގެ ވައިސް ޗާންސެލަރު ޑރ. ހަސަން ހަމީދުވެސް ވަނީ ވިދާޅުވެފައެވެ.
ޑރ. ޙަސަން ވިދާޅުވީ، ތާރީޚީ ބިނާތަކަކީ ވަރަށް މުހިއްމު ތަންތަން ކަމަށެވެ. ނަމަވެސް، ބޭރުގެ ގޮތްތަކަށް ހިތާވެފައިވާ ބައެއް ދިވެހީން'' ދިވެހި ތާރީޚަށާއި ދިވެހި ގައުމަށް އެއްވެސް ލޯތްބެއް ނެތްކަން އޭނާއަށް ފާހަގަކުރެފިވައި ވާކަމަށް އޭނާ ވަނީ ވިދާޅުވެފައެވެ.