މާލޭގައި ހުންނަ ދުވަސްވީ ބަންޑާރަ މިސްކިތް ތަޅާލަން ސަރުކާރުން ނިންމައިފައިވާތީ، އެ މިސްކިތުގެ ތާރީޚަށް އަލިއަޅުއްވާލައްވައި، އެ މިސްކިތް ތަޅާލުމަކީ ތަރިކައެއް ނައްތާލުން ކަމަށް މޯލްޑިވްސް ނެޝަނަލް ޔުނިވާސިޓީ (އެމްއެންޔޫ)ގެ ކުރީގެ ވައިސް ޗާންސެލަރު ޑރ. ހަސަން ހަމީދު ވިދާޅުވެއްޖެއެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިއްޔެ ވަނީ، މާލޭގެ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް މި ރޯދަމަށްފަހު ފަށާނެ ކަމަށް ވިދާޅުވެފައެވެ.
އެ ނިންމެވުމާ މެދު ގިނަ ބަޔަކު ކަންބޮޑުވުން ފާޅުކޮށް ވަނީ، އެ މަސައްކަތް ނުކުރުމަށާއި، ތާރީޚު ހިމާޔަތްކުރަން ގޮވާލައިފައެވެ.
އެ ފާޑުކިޔުންތަކާ ގުޅިގެން ޝަހީމް ވިދާޅުވީ، ބަންޑާރަ މިސްކިތަކީ އާސާރީ ތަރިކައިގެ ތެރޭ ހިމެނޭ ތަނެއް ނޫން ކަމަށާއި، ނަމަވެސް އެ ތަނުގައި އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރަން ބޭނުންވާ ކަމަށެވެ.
އެކަމާ ގުޅުވައި ޑރ. ޙަސަން ހަމީދު ލިޔުއްވާފައިވާ މަޒުމޫނެއްގައި ވަނީ، އެ މިސްކިތަކީ ދިވެހިރާއްޖޭގެ ތާރީޚާ ވަރަށް ބޮޑަށް ގުޅިފައިވާ މިސްކިތެއް ކަމަށް ވިދާޅުވެފައެވެ. އަދި އެކަން އެނގޭނީ، ދިވެހި ތާރީޚާ ބެހޭ ފޮތްތަކަށް ދަރިވަރުވީ ބަޔަކަށް ކަމަށް އޭނާ ވިދާޅުވިއެވެ. އެގޮތުން، މިސްކިތުގެ މުހިންމުކަން އަންގައިދޭ މިސާލެއް ވެސް އޭނާ ފާހަގަކުރެއްވިއެވެ.
"އެއް ފަހަރު ދިމާވި މައްސަލައެއްގައި، މާލޭގައި ތިބި ހުރިހާ ވޯރާއިން އެ މިސްކިތަށް ވަދެ ތަޅުލައި، ނުނިކުމެ ބަންދު ވިއެވެ. މިކަމާ ގުޅިގެން މުދާ ގަންނާނޭ ގޮތެއް ރައްޔިތުންނަށް ނެތިގެން، މުޙައްމަދު އަމީން އެމީހުންގެ ގާތަށް ވަޑައިގެން ވާހަކަ ދައްކަވައި، އެމީހުން ފިހާރަތަކަށް އަލުން ދާގޮތަށް ހަމަޖެހުނެވެ." ޑރ. ޙަސަން ލިޔުއްވާފައިވެއެވެ.
ބަންޑާރަ މިސްކިތް: ބަންޑާރަ މިސްކިތަކީ އާސާރީ ތަރިކައިގެ ތެރޭ ހިމެނޭ ތަނެއް ނޫން ކަމަށް ޝަހީމް ވިދާޅުވި -- ފޮޓޯ/ ޕީއެސްއެމް
ސަރުކާރުގެ ބޮޑު އިސްޓޯރާއި ކުޑަ އިސްޓޯރު، އެއީ މިހާރުގެ މޯލްޑިވްސް މޮނިޓަރީ އޮތޯރިޓީ އާއި އެސްޓީއޯގެ ފެށުން ގުޅިފައިވަނީ އެ ހާދިސާއާކަން އޭނާ ފާހަގަކުރެއްވިއެވެ.
ޑރ. ޙަސަން ވިދާޅުވީ، ތާރީޚީ ބިނާތަކަކީ ވަރަށް މުހިއްމު ތަންތަން ކަމަށެވެ. ނަމަވެސް ؛؛ބޭރުގެ ގޮތްތަކަށް ހިތާވެފައިވާ ބައެއް ދިވެހީން'' ދިވެހި ތާރީޚަށާއި ދިވެހި ގައުމަށް އެއްވެސް ލޯތްބެއް ނެތްކަން އޭނާއަށް ފާހަގަކުރެފިވައި ވާކަމަށް އޭނާ ވަނީ ވިދާޅުވެފައެވެ.
އޭނާ ވަނީ މީގެ ކުރީން ބަޔަކު ބިހުރޯޒު ކަމަނާ މިސްކިތް ތަޅާލަން މަސައްކަތް ކޮށްފައި ވާކަންވެސް ފާހަގަކުރައްވާފައެވެ. އަދި އެ ކަންކަމުން އެނގެނީ، ދިވެހީން ސަރުކާރުތަކުން ކުރާ ކަންތައްތަކާ މެދު ވަރަށް ބޮޑަށް ފާރަވެރިވާން ޖެހޭނޭ ކަން ކަމަށް މަޒުމޫނުގައި ވެއެވެ.
ޑރ. ޙަސަން އިޝާރާތް ކުރެއްވީ، 2018 ވަނަ އަހަރަށް ފާސްކުރި ބަޖެޓުގައި، ބިހުރޯޒު މިސްކިތާއި މަސްޖިފުލް އިމާމް އާދިލް ތަޅާލައި އެ ދެ މިސްކިތް ހުރި ބިމުގައި 12 ބުރީގެ މަލްޓިޕާޕަސް އިމާރާތެއް އަޅަން ހިމެނި ހިމެނުމަށެވެ. އޭރު، ރައީސް އަބްދުﷲ ޔާމީންގެ ސަރުކާރުން ވަނީ، ސަރުކާރުން އެފަދަ ނިންމުމެއް ނިންމާފައި ނުވާ ކަމަށް ފަހުން ބުނެފައެވެ.
މީގެ އިތުރުން ޑރ. ޙަސަންގެ މަޒުމޫނުގައި ވަނީ، ވޭތިވެދިޔަ ދެ އަހަރެއްގެ ތެރޭގައި ސަރުކާރުން ހާމަކޮށްފައިވާ ސިޔާސަތާ ކަނޑައެޅިގެން ޚިލާފު ކަންތައްތައް، އިސްލާމިކް މިނިސްޓްރީން ކޮށްފައިވާ ކަމަށް ވިދާޅުވެފައެވެ.
އެގޮތުން ފުރަތަމަ ކަމެއްގެ ގޮތުގައި އޭނާ ފާހަގަކުރެއްވީ، އިސްލާމިކް މިނިސްޓްރީއަށް ޝަހީމް އައްޔަންކުރިތާ މާ ގިނަ ދުވަހެއްނުވެ، ޒަކާތާ ބެހޭ އޮފީހަށް "ޒަކާތު ހައުސް"ގެ ނަމުން ނަންދެވުނުކަމެވެ.
ޑރ. ޙަސަން ވަނީ، ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގަތީ ގައުމިއްޔަތާއި ގައުމަށް އިސްކަންދޭނެ ކަމަށް ވަކާލާތުކުރައްވައިގެން ކަމަށްވާއިރު، ޒަކާތާ ބެހޭ އޮފީހަށް އިނގިރޭސި ނަމެއް ދިނުމާ ގުޅޭ ގޮތުން ސުވާލު އުފައްދަވައިފައެވެ.
ހަމައެއާއެކު، މަދަރުސާތަކުގައި އިސްލާމް މާއްދާ އިނގިރޭސި ބަހުން ކިޔަވައިދިނުން އެންމެ ރަނގަޅު ކަމަށް ޝަހީމް ވިދާޅުވިކަން ވެސް ފާހަގަކުރައްވައި ޑރ. ޙަސަން ވަނީ، އިސްލާމް މާއްދާ އިނގިރޭސި ބަހުން ކިޔަވައިދިނުމަކީ ގައުމިއްޔަތާއި ދިވެހިއްޔަތަށް އިސްކަން ދިނުންތޯ ސުވާލު އުފައްދަވައިފައެވެ.
އޭނާ ވިދާޅުވީ ސަރުކާރު ހިނގާ ގޮތް ދޯދިޔާ ވަމުން އަންނަ ކަމަށާއި މިނިސްޓަރުން ވެސް ''އެ މީހުންގެ ހިތަށް އެރިހާ ގޮތަކަށް ކަންތައްތައް ކުރަމުންދާ" ކަމަށް ވިދާޅުވެފައެވެ.
"ސިޔާސަތުތަކާއި ގަވާއިދުތައް ވަނީ ވީ ތަނެއްގައެވެ. މި ހާލަތުން އަރައިގަނެ، އެންމެން އެއް ދިމާއަކަށް ދަތުރުކުރުމަށް އައު ޖޯޝަކާއި ފޯރިއެއް ލާން ވެއްޖެއެވެ. ވަކި މިސްރާބެއް ނެތި ދަތުރުކުރުމުން އަޅުގަނޑުމެންނަށް ދެވޭނީ ކޮން މަންޒިލަކަށް ތޯއެވެ؟" ޑރ. ޙަސަން ލިޔުއްވާފައިވެއެވެ.
ބަންޑާރަ މިސްކިތް ތަޅާލަން ނިންމި ނިންމުމަށް ފާޑުކިޔުން އަމާޒުވުމުން މިނިސްޓަރު ޝަހީމް ވަނީ، މިނިސްޓްރީން ކަންކަން ކުރާނީ ރައްޔިތުންގެ އަޑުއެހުމަށް ފަހު އެއާ އެއްގޮތަށް ކަމަށް ވިދާޅުވެފައެވެ.