މެދުއިރުމަތީގައި މިހާރު ހަނގުރާމަ ކުރަމުން ދާއިރު، ޔުނައިޓެޑް އެރެބް އެމިރޭޓްސް (ޔޫއޭއީ)އިން އޮމާނަށް އެއްގަމުން ދިޔުމުގެ ހުރަހެއް ޔޫއޭއީ ސަރުކާރުގެ ނެތް ކަމަށާއި، ދިވެހީންނަށް އޮމާނުގެ ބޯޑަރު ހުރަސްކުރާއިރު ވިސާ ބޭނުންވާނެ ކަމަށް ޔޫއޭއީއަށް ކަނޑައަޅާފައިވާ ހުންނަވާ ދިވެހި ސަފީރު މުހައްމަދު ހުސައިން ޝަރީފް (މުންދު) އިއްޔެ ވިދާޅުވެއްޖެއެވެ.
ޔޫއޭއީގެ ދިވެހި އެމްބެސެޑަރު އިއްޔެ ވަނީ، ޔޫއޭއީގެ ފޮރިން މިނިސްޓަރު އަބްދުﷲ ބިން ޒައިދު ބިން ސުލްތާން އަލް ނަހްޔާންއާ ބައްދަލުކުރައްވާފައެވެ.
އެ ބައްދަލުކުރެއްވުމަށް ފަހު ޔޫއޭއީގައި އުޅޭ ދިވެހީން ތިބޭ ގްރޫޕަކަށް ފޮނުއްވި ވޮއިސް މެސެޖެއްގައި ސަފީރު ވިދާޅުވީ، އެ ގައުމުގައި ދިރިއުޅޭ މީހުންނަށް އިވޭ ބާރު އަޑުތަކަކީ، އެ ގައުމަށް ދެމުން އަންނަ މިސައިލް ހަމަލާތައް ޔޫއޭއީގެ ޑިފެންސް ސިސްޓަމުން ހުއްޓުވާ އަޑު ކަމަށެވެ.
ގައުމުގެ އެކި ތަންތަނަށް ވެއްޓޭ ގިނަ ތަކެއްޗަކީ، އެ ހަމަލާތަކުގައި ކުނި ނުވަތަ ޑެބްރީ ކަމަށާއި ހަމަލާ ދެމުން އަންނަނީ ވަކި ސަރަހައްދެއް ބަލައިގެނެއް ނޫން ކަމަށް އޭނާ ވިދާޅުވިއެވެ.
އީރާނުން ޔޫއޭއީގެ ސަރަހައްދަކަށް ދިން ހަމަލާއެއްގައި ތަނެއްގައި ރޯވެ، ކަޅު ދުން އަރަނީ --- ފޮޓޯ/ ލެ މޮންޑެ
އެ ހަމަލާތަކާ ގުޅިގެން، ޔޫއޭއީ ދޫކޮށް، އޮމާނަށް ދިޔުމާ ގުޅޭ ގޮތުން ދިވެހީން ސުވާލުކުރަމުން އަންނަކަން ސަފީރު ފާހަގަކުރެއްވިއެވެ.
އެ ވާހަކައަށް އިޝާރަތްކުރައްވައި ސަފީރު ވިދާޅުވީ، އެއްގަމުގައި އޮމާނަށް ދަތުރުކުރުގެ ހުރަހެއް ޔޫއޭއީ ސަރުކާރުގެ ނެތް ކަމަށެވެ. އެގޮތުން ގާތްގަނޑަކަށް ހަތް ގަޑިއިރު އެއްގަމުގައި ދަތުރުކޮށްގެން އޮމާނަށް ދެވުނު ނަމަވެސް، ބޯޑަރުތަކުގައި ކިޔޫ ބޮޑުވެގެން ގިނައިރު ވެދާނެ ކަމަށް ޔޫއޭއީ ސަރުކާރާ ހަވާލާދީ ސަފީރު ވިދާޅުވިއެވެ. އަދި، އޮމާނަށް ދިވެހީންނަށް އެތެރެވެވޭނީ އެ ގައުމުގެ ވިސާއެއް ހޯދައިގެންކަން ސަފީރު ފާހަގަކުރެއްވިއެވެ.
ދެ ދުވަހެއްގެ ތެރޭ އެންމެ ލަސްވެގެން އެ ވިސާ ލިބޭނެކަމަށް އޭނާ ވިދާޅުވިއެވެ.
ހަނދުމަފުޅުގައި ބަހައްޓަވާތި އޮމާނަކީ ދިވެހި ރައްޔިތުންނަށް ވިސާ ބޭނުންވާ ގައުމެއް. އެހެންވީމަ ވިސާއަށް އެޕްލައިކުރައްވައިގެން އޮމާންގެ ވިސާއެއް ހޯއްދަވައިގެން ނޫނީ ބޯޑަރު ހުރަހެއް ނުކުރެވޭނެ. އަދި ކާރެއްގައި ހުރަސްކުރާނަމަ، އެ ކާރެއްގެ ވަކި ޚާއްސަ ލިޔެކިޔުންތަކެއް ވެސް ހުރޭޔޫއޭއީއަށް ކަނޑައަޅާފައިވާ ހުންނަވާ ދިވެހި ސަފީރު މުހައްމަދު ހުސައިން ޝަރީފް
އޭގެއިތުރަށް، އޭނާ ވިދާޅުވީ، ނުފުރި ޔޫއޭއީގައި ތާށިވެފައި ތިބި ދިވެހީންނާއި ފަތުރުވެރިންނަށް އެ ގައުމުން ބައެއް އިންތިޒާމުތައް ހަމަޖައްސައިދީފައިވާ ކަމަށެވެ. މިގޮތުން، އަބޫދާބީ ނަމަ، އެ މީހަކު ހުރި ހޮޓަލެއްގައި އިތުރަށް ހުރެވޭނެ އިންތިޒާމު އެ ސަރުކާރުން ހަމަޖައްސަމުންދާ ކަމަށާއި އެ އިންތިޒާމުތައް ހަމަޖައްސައިދެނީ ދަތުރުކުރަން ހަމަޖެހިފައި އޮތް އެއާލައިނަކުން ކަމަށް ސަފީރު ވިދާޅުވިއެވެ.
ބައެއް ހާލަތްތަކުގައި މުއްދަތު ދިގު ވެއްޖިއްޔާ ކޮންމެވެސް ވަރެއްގެ ވައުޗާއެއް ދޭނެ ކަމަށް [ޔޫއޭއީ ސަރުކާރުން ބުނީ]. އޭގެ ވެސް އިތުރު ތަފުސީލު ލިބޭތޯ އެބަ މަސައްކަތް ކުރަންޔޫއޭއީއަށް ކަނޑައަޅާފައިވާ ހުންނަވާ ދިވެހި ސަފީރު މުހައްމަދު ހުސައިން ޝަރީފް
އިތުރަށް ސަފީރު ވިދާޅުވީ، އެ ގައުމުގައި ދިރިއުޅޭ ދިވެހީން ޔޫއޭއީއަށް އައުމުގައި ވިސާގެ މައްސަލައެއް އުޅޭނަމަ، އިތުރުކޮށްދޭނެ ކަމަށެވެ. މިގޮތުން، ކޮވިޑުގައި ކަން ކުރި ގޮތަށް އޮޓޯ ރިނިއުވަލްއަކަށް ދާނެ ކަމަށް ޔޫއޭއީ ސަރުކާރާ ހަވާލާދީ، ސަފީރު ވަނީ ވިދާޅުވެފައެވެ.
ޔޫއޭއީ ދިވެހި ސަފީރާއި އެގައުމުގެ ރައީސް --- ފޮޓޯ/ ފޮރިން މިނިސްޓްރީ
ފާހަގަކުރެވޭ ގޮތުގައި، ޔޫއޭއީއާއި މެދުއިރުމަތީގެ އިތުރު އެއާޕޯޓްތައް ހޮނިހިރު ދުވަހުގެ މެންދުރު ބަންދުކޮށްފައި ވަނީ އެމެރިކާއާއި އިސްރާއީލުން އީރާނަށް ދޭ ހަމަލާތަކުގެ ރައްދުގައި، އީރާނުން އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާ ދޭން ފެށުމުންނެވެ.
އީރާނުގެ ރައްދު ހަމަލާތައް އަމާޒުވެފައިވާ ގައުމުތަކުގެ ތެރޭގައި ގަތަރު، ބަހްރެއިން، ކުވޭތު އަދި ޔޫއޭއީ ހިމެނެއެވެ.