މެދުއިރުމަތީގެ ހަނގުރާމައިގެ ހަމަލާ ބަދަލުކުރުން ހުއްޓާލާފައިވާ (ސީޒްފަޔާ އިއުލާނުކޮށްފައިވާ) މި ދަނޑިވަޅުގައި ހޮރްމުޒް ކަނޑުއޮޅި "އެއްކޮށް ހުޅުވާލައިފި" ކަމަށް އީރާނުން އިއުލާނުކޮށްފިއެވެ.
ހަމަލާބަދަލުކުރުން ހުއްޓާލުމަށް އެއްބަސްވެފައިވާ މުއްދަތުގެ ބާކީ ބައިގައި ހޮރްމުޒް ކަނޑުއޮޅި "އެއްކޮށް ހުޅުވާލާފައި" އޮންނާނެކަން އިއުލާނުކުރީ އީރާނުގެ ފޮރިން މިނިސްޓަރު އައްބާސް އަރަގްޗީ 'އެކްސް'ގައި ކުރެއްވި ޕޯސްޓެއްގައެވެ. އޭނާ ވިދާޅުވީ ހުރިހާ ވިޔަފާރި އުޅަނދަކަށް މިހާރު އެ މަގު ހުޅުވިފައިވާ ކަމަށެވެ.
"ލުބުނާނުގެ ހަމަލާބަދަލުކުރުން ހުއްޓާލުމުގެ އެއްބަސްވުމާ އެއްގޮތްވާ ގޮތުގެ މަތިން، އެ އެއްބަސްވުމުގެ ބާކީ އޮތް މުއްދަތުގައި ހޮރްމުޒް ކަނޑުއޮޅިން ހުރިހާ ވިޔަފާރި އުޅަނދުފަހަރަކަށް ދަތުރުކުރެވޭ ގޮތަށް އެއްކޮށް ހުޅުވާލެވިފައި ވާނީ،" އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވިއެވެ.
އޭނާ ވިދާޅުވި ގޮތުގައި ކަނޑުއޮޅި ހުރަސްކޮށް ކުރާ ދަތުރުތައް ކުރިއަށް ދާނީ އީރާނުގެ ޕޯޓްސް އެންޑް މެރިޓައިމް އޯގަނައިޒޭޝަނުން ކުރިން އިއުލާނުކޮށްފައިވާ، ކަނޑައެޅިފައިވާ ވަކި މަގަކުންނެވެ.
މިކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ ސޯޝަލް މީޑިއާގައި ހޮރްމުޒް ކަނޑުއޮޅި "ފުރިހަމައަށް ހުޅުވާލެވިފައި" އޮތްކަން ކަށަވަރުކޮށްދެއްވާފައެވެ.
ޓްރަމްޕް ވަނީ، އެކަމަށް ޝުކުރު ވެސް އަދާކުރައްވައިފައެވެ.