ހުޅުމާލެ ފަރުކޮޅުފުށީގައި އިމާރާތްކޮށްފައިވާ ބުޅާ ފެސިލިޓީއަށް މިހާތަނަށް 352 ބުޅާ ގެންގޮސްފައިވާ ކަމަށާއި އަންނަ ހަފުތާގައި އިތުރު ބުޅާތައް ގެންދަން ތާވަލުކޮށްފައިވާ ކަމަށް އެނިމަލްވެލްފެއާ މިނިސްޓަރު ޑރ. މަރިޔަމް މާރިޔާ މިއަދު ވިދާޅުވެއްޖެއެވެ.
ދެހާސް ސައުވީސް ވަނަ އަހަރުގެ ނޮވެންބަރުގައި ހުޅުވި އެ ފެސިލިޓީއަށް އެކަށީގެންވާ ވަރަށް ބުޅާ ނުގެންދާ ކަމުގެ ޝަކުވާ ވަނީ ބޮޑުވެފައެވެ. އަދި، ފެސިލިޓީ ހުޅުވި ފަހުން ވެސް ބުޅަލުގެ މައްސަލައަށް އެދެވޭ ހައްލެއް ނާންނާތީ މީހުންގެ ޝަކުވާތައް ގިނައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު މާރިޔާ ވަނީ، އެ ފެސިލިޓީއާ ގުޅޭ އިތުރު ތަފުސީލުތަކެއް ދެއްވާފައެވެ.
މިގޮތުން، އެ ތަނުގައި ވެޓެރިނަރީ ކުލިނިކުގެ މަސައްކަތް ފަށައި، ބުޅާތައް ނިއުޓާ ކުރުން ނުވަތަ އާލާނުކުރުމުގެ މަސައްކަތް ފަށާފައިވާ ކަމަށް މިނިސްޓަރު ވިދާޅުވިއެވެ. ބުޅާ ނިއުޓާ ކުރުމަކީ، ބުޅާ އާލާވުން ހުއްޓުވުމަށް ފިރިހެން ބުޅާތަކުގެ ކުރާ ސާޖަރީއެކެވެ.
އެގްރިކަލްޗާ އެންޑް އެނިމަލްވެލްފެއާ މިނިސްޓަރު ޑރ. މަރިޔަމް މާރިޔާ --- ފޮޓޯ/އެގްރިކަލްޗާ އެންޑް އެނިމަލް ވެލްފެއާ މިނިސްޓްރީ
މިހާތަނަށް 60 ބުޅާ ނިއުޓާކޮށް، ފަސް އަންހެން ބުޅާ ސްޕޭކޮށްފައިވާ ކަމަށް މާރިޔާ ވިދާޅުވިއެވެ. ސްޕޭކުރުމަކީ، ވެސް ބުޅާ އާލާވުން ހުއްޓުވުމަށް ކުރާ ސާޖަރިއެކެވެ.
އޭގެއިތުރުން، މިނިސްޓަރު ވަނީ މިހާތަނަށް އެ ފެސިލިޓީއަށް ގެންގޮސްފައިވާ ބުޅާތަކުގެ ތަފުސީލުތައް ވެސް ހާމަކުރައްވާފައެވެ.
ފެސިލިޓީއަށް މިހާތަނަށް 352 ބުޅާ ވަނީ ގެންދެވިފައި. އަދި އަންނަ ހަފުތާގައި އިތުރު ބުޅާތައް ފެސިލިޓީއަށް ގެންދިޔުމަށް ވަނީ ޕްލޭން ކުރެވިފައިއެނިމަލްވެލްފެއާ މިނިސްޓަރު ޑރ. މަރިޔަމް މާރިޔާ
މިނިސްޓަރު އެފަދައިން ވިދާޅުވިއިރު، މާލެ ތެރޭގައި ބުޅާ ގިނަވެ، ނަޖިހަށް އެރޭ ކަމުގެ ކަންބޮޑުވުން ފާޅުކުރާކަން މާލޭގެ މޭޔަރު އާދަމް އާޒިމް ވަނީ މިދިޔަ ޖަނަވަރީ މަހުގެ ފަހުކޮޅު ފާހަގަކުރައްވާފައެވެ.
މިގޮތުން، މާލެ ތެރެއަށް ބުޅަލުގެ ނަޖިސް އެޅެން ދޫކުރާނެ އުޒުރެއް ސަރުކާރަށް ނުދެއްކޭނެ ކަމަށް ވިދާޅުވެ، ބުޅާ ފެސިލިޓީ މާލެ ސިޓީ ކައުންސިލާ ހަވާލުކުރުމަށް ދެ ފަހަރަށް އެދެފައިވާ ކަމަށް އޭރު މޭޔަރު ވަނީ ވިދާޅުވެފައެވެ.
މިދިޔަ އަހަރުގެ މެއި މަހު މާރިޔާ ވިދާޅުވި ގޮތުގައި، ފެސިލިޓީގެ ޖުމުލަ ބަޖެޓުން ބުޅަލަކަށް މަހަކު 368 ރުފިޔާ ޚަރަދުވާނެ ކަމަށާއި، އަހަރަކު 5،416 ރުފިޔާ ޚަރަދުވާނެ ކަމަށް އޭރު މިނިސްޓަރު ވިދާޅުވިއެވެ.