މިދިޔަ އަހަރުގެ އޭޕްރިލް މަހާއި، މި އަހަރުގެ މެއި މަހާ ދޭތެރޭ އޮޅުހިޔާއަށް 3.4 މިލިއަން ރުފިޔާ ޚަރަދުކޮށްފައިވާ ކަމަށް އެގްރިކަލްޗާ މިނިސްޓްރީން ހާމަކޮށްފިއެވެ.
މާލޭގެ މަގުތަކުގައި ބުޅާ ގިނަވުމުގެ މައްސަލައަށް ހައްލެއް ހޯދުމަކީ ރައީސް ޑރ. މުޙައްމަދު މުއިއްޒުގެ ވައުދުފުޅެކެވެ. އެގޮތުން އެ މައްސަލައަށް ހައްލެއް ހޯދުމަށް، ބުޅާ ގެންގުޅޭ ފެސިލިޓީއެއް ހެދުމުގެ މަސައްކަތް މި ސަރުކާރުގައި ފެށިއެވެ.
އެ ފެސިލިޓީ ހެދީ އެޗްޑީސީން މާލޭ ސިޓީ ކައުންސިލަށް ދޫކުރި 5،000 އަކަފޫޓުގެ ބިމެއްގައެވެ. އެ ފެސިލިޓީ ނިންމައި، ބުޅާތައް ގެންދިޔުމުގެ މަސައްކަތް ސިޓީ ކައުންސިލުން ފަށަން ތައްޔާރުވެފައި ވަނިކޮށް، ކުރީގެ އެނިމަލް ވެލްފެއާ މިނިސްޓްރީން ވަނީ އެ ފެސިލީޓީ ސަރުކާރާ ހަވާލުކުރުމަށް އެދިފައެވެ. އެއީ އެ މިނިސްޓްރީން ފުރިހަމަ ކުރަން ބުނި ބައެއް މަސައްކަތްތައް ކައުންސިލުން ކޮށްފައި ނުވާތީ ކަމަށް ބުނެއެވެ.
އޭގެ ފަހުން، މިދިޔަ އަހަރުގެ ފެބުރުވަރީ މަހު 26ގައި މިނިސްޓްރީން ފެސިލިޓީއާ ހަވާލުވެ، ބުޅާ ގެންދަން ފެށިއެވެ. މި ސަރުކާރަށް ގެނައި ބަދަލުތަކެއްގެ ދަށުން އެނިމަލް ވެލްފެއާ މިނިސްޓްރީ އުވާލައިފައިވާއިރު، އެ މިނިސްޓްރީގެ ޒިންމާތައް ހަވާލުކޮށްފައިވަނީ އެގްރިކަލްޗާ މިނިސްޓްރީއާއެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "ސަން"އިން ހުށަހެޅި ސުވާލަކަށް އެގްރިކަލްޗާ މިނިސްޓްރީން ދިން ޖަވާބުގައިވާ ގޮތުން، މިދިޔަ އަހަރުގެ އޭޕްރިލް މަހާއި މި އަހަރުގެ މެއި މަހާ ދޭތެރޭ އޮޅުހިޔާ ފެސިލިޓީއަށް ވަނީ 3.4 މިލިއަން ޚަރަދުކޮށްފައެވެ. އެއީ:
2025
އޭޕްރިލް: 30,960.90 ރުފިޔާ
މެއި: 37,047.84 ރުފިޔާ
ޖޫން: 72,952.78 ރުފިޔާ
ޖުލައި: 4,943.75 ރުފިޔާ
އޯގަސްޓު: 42,380.69 ރުފިޔާ
ސެޕްޓެންބަރު: 25,531.20 ރުފިޔާ
އޮކްޓޯބަރު: 136,497.96 ރުފިޔާ
ނޮވެންބަރު: 175,960.15 ރުފިޔާ
ޑިސެންބަރު: 1,600,475.30 ރުފިޔާ
2026
ޖަނަވަރީ: 20,550.00 ރުފިޔާ
ފެބުރުވަރީ: 309,622.73 ރުފިޔާ
މާރިޗް: 195,133.33 ރުފިޔާ
އޭޕްރިލް: 523,647.70 ރުފިޔާ
މެއި: 273,703.33 ރުފިޔާ
މިނިސްޓްރީން ބުނި ގޮތުގައި އެ ޚަރަދުތަކުގެ ތެރޭގައި އޮޅުހިޔާގައި ފެންސުޖެހުމާއި މަރާމާތު ކުރުމާއި ސެކިއުރިޓީ ބެލެހެއްޓުމާއި އެ ތަނުގައި އުފެދޭ ކުނިބުނި ނައްތާލުމުގެ ހޭދަތައް ހިމެނެއެވެ. އަދި އެ ތަން ސާފުތާހިރުކޮށް ބެލެހެއްޓުމާއި ފެނާއި ކަރަންޓާއި އެ ތަނަށް ބޭނުންވާ ސާމާނާއި ބުޅަލަށް ކާންދޭ އެއްޗެއްސާއި ބޭސްފަރުވާގެ ޚަރަދުތައް ވެސް އޭގެ ތެރޭގައި ހިމެނެއެވެ.
މިނިސްޓްރީން ހާމަކުރި މައުލޫމާތު އެނގޭ ގޮތުގައި ފެސިލިޓީގައި ގެންގުޅޭ ބުޅަލުގެ އަދަދުތައް އަންނަނީ އިތުރުވަމުންނެވެ. އެގޮތުން، މިދިޔަ އަހަރުގެ ޑިސެންބަރު މަހު އޮޅުހިޔާގައި ގެންގުޅުނީ 161 ބުޅާ ނަމަވެސް، އޭގެ ފަހުން ކޮންމެ މަހަކު ވެސް ބުޅަލުގެ އަދަދު އަންނަނީ އިތުރުވަމުންނެވެ. އެގޮތުން މިދިޔަ މެއި މަހު ނިޔަލަށް، ބުޅަލުގެ އަދަދު ވަނީ 255އަށް އަރައިފައެވެ.
އެގްރިކަލްޗާ މިނިސްޓްރީން ވަނީ، އެ މުއްދަތުގައި ބުޅާ ފެސިލިޓީއަށް ގެންގޮސްފައިވާ އެއްވެސް ބުޅަލެއް އަނބުރާ މަގު މައްޗަށް ދޫކޮށްލައިފައިނުވާ ކަމަށް ބުނެފައެވެ. އަދި އެ ތަނަކީ މަގުމަތީގައި އުޅޭ ބުޅާތައް އުމުރަށް ރައްކާތެރިކަމާއެކު ބެލެހެއްޓުމުގެ މަސައްކަތް ކުރާ ތަނެއް ކަމަށްވާއިރު، އެ ފެސިލިޓީން ބުޅާ އެޑޮޕްޓްކުރުމުގެ ފުރުސަތުތައް ދިނުމަށް ރާވައިފައިވާކަން މިނިސްޓްރީން ހާމަކުރިއެވެ.