އަންނަ އޭޕްރިލް މަހު ބާއްވާ ލޯކަލް ކައުންސިލް އިންތިޚާބާއި، ރައްޔިތުންގެ ޚިޔާލު ހޯދުމަށް ނަގާ އާންމު ވޯޓާ ގުޅިގެން، އިލެކްޝަންސް ކޮމިޝަން (އީސީ)ން 77 މުވައްޒަފުން ހޯދަން އިއުލާންކޮށްފިއެވެ.
އަންނަ އޭޕްރިލް މަހުގެ ހަތަރު ވަނަ ދުވަހު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެންބަރުން ހޮވުމުގެ އިތުރުން، ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ރައްޔިތުންގެ ރުހުން އޮތްތޯ ބެލުމަށް ވޯޓެއް ނަގާނެއެވެ.
އީސީން ވަނީ އެ ވޯޓުތަކާ ގުޅިގެން ކޮމިޝަނުގެ އެކިއެކި މަސައްކަތްތަކަށް ބޭނުންވާ މުވައްޒަފުން ހޯދުމަށް އިއުލާނުކޮށްފައެވެ. އެގޮތުން ކޮމިޝަނުން ހޯދަން އިއުލާނުކޮށްފައިވަނީ:
- 40 އޮފިސަރުން
- 26 ސީނިއާ އޮފިސަރުން
- ދެ މެއިންޓަނަންސް އޮފިސަރުން
- ދެ ލޮޖިސްޓިކްސް އޮފިސަރުން
- ގްރެފިކްސް ޑިޒައިނަރެއް
- ފަސް ޓެކް އޮފިސަރުން
- ސީނިއާ އޮފިސަރެއް (ފޮޓޯގްރާފަރު)
އެ މަގާމުތަކަށް ނަގަނީ ކޮންޓްރެކްޓް އުސޫލުން ކަމަށްވާއިރު، ކޮންޓްރެކްޓް ދެމިއޮންނާނީ އިންތިޚާބާއި ވޯޓުގެ މަސައްކަތްތައް ނިމެންދެން ކަަމަށް އިއުލާނުގައިވެއެވެ.
އޭގެ ތެރެއިން އެންމެ ގިނަ މީހުން ހޯދާ މަގާމު ކަމަށްވާ އޮފިސަރެއްގެ އަސާސީ މުސާރައަށް 4465 ރުފިޔާއާއި ސާވިސް އެލަވަންސަށް 1500 ރުފިޔާ ހިމަނައިފައިވެއެވެ. އަދި މަސައްކަތަށް ނުކުންނަ ކޮންމެ ދުވަހަކަށް 155 ރުފިޔާ ލިބޭނެ ކަމަށް ބުނެފައިވެއެވެ.
ސީނިއާ އޮފިސަރެއްގެ އަސާސީ މުސާރައާއި އެލަވަންސް 7610 ރުފިޔާއަށް އަރާއިރު، މަސައްކަތަށް ނުކުންނަ ކޮންމެ ދުވަހަކަށް 170 ރުފިޔާ ލިބޭނެއެވެ.
އީސީން ވަނީ މި މަގާމުތަކަށް ޝައުގުވެރިވާ މީހުން، އަންނަ ހަފުތާގެ އަންގާރަ ދުވަހުގެ 15:00ގެ ކުރީން އެ ކޮމިޝަނުގެ ވަޒީފާއަށް އެދޭ ފޯމު ފުރިހަމަކުރުމަށްފަހު އެ ކޮމިޝަނުގެ ރިސެޕްޝަން ނުވަތަ އީމެއިލަށް [email protected] އަށް ހުށަހެޅުމަށް އެދިފައެވެ. އަދި އީމެއިލް މެދުވެރިކޮށް ހުށަހަޅާނަމަ 3004472އަށް ގުޅައި އީމެއިލް އެ ކޮމިޝަނަށް ލިބިފައި ވާކަން ކަޝަވަރުކުރުމަށް ވެސް އެ ކޮމިޝަނުން ވަނީ އެދިފައެވެ.
އީމެއިލް ކުރާއިރު ހުރިހާ ލިޔެކިޔުމެއް، އެއް ފައިލެއްގެ ގޮތުގައި 10 އެމްބީއަށްވުރެ ކުޑަ ފައިލް ސައިޒަކަށް އެޓޭޗްކުރުމަށް ވެސް އެ ކޮމިޝަނުން ވަނީ އެދިފައެވެ. އެ ކޮމިޝަނުން ވަނީ ވަޒީފާއަށް އެދޭ ފޯމު އެ ކޮމިޝަނުގެ ރިސެޕްޝަނާއި ކޮމިޝަނުގެ ރަސްމީ ވެބްސައިޓު www.election.gov.mv މެދުވެރިކޮށް ޑައުންލޯޑު ކުރެވޭނެކަން ފާހަގަކޮށްފައެވެ.
މިދިޔަ އަހަރު އީސީން ވަނީ ކައުންސިލް އިންތިޚާބަށް 80 މިލިއަން ރުފިޔާ ޚަރަދު ވާނެ ކަމަށް ލަފާކޮށްފައެވެ. މިދިޔަ މަހު އެ ކޮމިޝަނުން ވަނީ އެ އިންތިޚާބާއި ޚިޔާލު ހޯދުމުގެ ވޯޓު އެއްކޮށް ބާއްވާނަމަ، އިތުރު 20 މިލިއަން ރުފިޔާ ޚަރަދުވާނެކަމަށް ބުނެފައެވެ.
މައި ދެ އިންތިޚާބު އެއްކޮށްލުމާ ގުޅޭ ގޮތުން މި ސަރުކާރުން ޚިޔާލު ހޯދަނީ، ދެ އިންތިޚާބު އެއްކޮށް ބޭއްވުމުން ޚަރަދު ކުޑަކުރެވޭނެ ކަމަށް ލަފާކޮށްފައެވެ.