އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރީންގެ އަދަަދު ނިމިދިޔަ އަހަރުގެ މި މުއްދަތާ އަޅާބަލާއިރު 7000 އަށްވުރެ އިތުރުވެފައި ވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
މިއީ ނިމިދިޔަ އަހަރުގެ ޖެނުވަރީ މަހާއި އަޅާބަލާއިރު 3.9 އިންސައްތައިގެ އިތުރުވުމެކެވެ.
ޓޫރިޒަމް މިނިސްޓްރީއިން އާންމުކޮށްފައިވާ ވީކްލީ ސްޓެޓިސްޓިކްސް ރިޕޯޓުން ދައްކާގޮތުގައި މިމަހުގެ 28 ވީ ބުދަ ދުވަހުގެ ނިޔަލަށް، ރާއްޖެއަށް 200،801 ފަތުރުވެރީން ވަނީ ޒިޔާރަތްކޮށްފައެވެ. ނިމިދިޔަ 2025 ވަނަ އަހަރުގެ ޖެނުވަރީ މަހުގައި ރާއްޖެއަށް ޒިޔާރަތްކޮށްފައި ވަނީ 193،174 ފަތުރުވެރީންނެވެ.
މީގެ ތެރެއިން 68.8 ޕަސެންޓު ފަތުރުވެރީން ރިސޯޓުތަކަށް އައިސްފައިވާއިރު، 26.4 ޕަސެންޓު ފަތުރުވެރީން އައިސްފައިވަނީ ގެސްޓްހައުސްތަކަށެވެ. އަދި ހޮޓެލްތަކަށް 2.7 ޕަސެންޓު ފަތުރުވެރީން ވަނީ ހޮޓެލްތަކަށް އައިސްފައެވެ.
ފަތުރުވެރީން އައިސްފައިވާ މާކެޓްތަކަށް ބަލާލާއިރު މި އަހަރު އެންމެ ގިނައިން ރާއްޖެ އައިސްފައި ވަނީ ރަޝިއާއިންނެވެ. ދެވަނައަށް އެންމެ ގިނަ ފަތުރުވެރީން އިޓަލީއިން އައިސްފައި ވާއިރު، ތިން ވަނައިގައި އުޅެނީ ޗައިނާއެވެ. އަދި ހަތަރުވަނައަށް އެންމެ ގިނަ ފަތުރުންވެރީން އިނގިރޭސިވިލާތުން އައިސްފައިވާއިރު ފަސްވަނައަށް އެންމެ ގިނަ ފަތުރުވެރީން އައިސްފައި ވަނީ ޖަރުމަނުވިލާތުންނެވެ.
ސަރުކާރުން ވަނީ މި އަހަރު 2.4 މިލިއަން ފަތުރުވެރިން ރާއްޖެ ގެނެވޭނެ ކަމަށް ލަފާކޮށްފައެވެ.