ހުޅުމާލެ ފަރުކޮޅުފުށީގައި އިމާރާތްކޮށްފައިވާ ބުޅާ ފެސިލިޓީގެ ބައެއް ތަންތަން މަރާމާތު ކޮށްދޭނެ ބަޔަކު ހޯދުމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން މިއަދު އިއުލާނުކޮށްފިއެވެ.
އެ މިނިސްޓްރީން އިއުލާނުކުރީ، 'އޮޅުހިޔާ'ގެ ނަމުގައި އިމާރާތްކުރި އެ ފެސިލިޓީގެ އައިސޮލޭޝަން ޔުނިޓާއި ޖެނެރަލް ހޯލްޑިން އޭރިއާއި ފާޚާނާއާއި އޮފީހާއި ފާރަވެރިންގެ ކޮޓަރި މަރާމާތު ކޮށްދޭނެ ބަޔަކު ހޯދުމަށެވެ.
އެ ކަމަށް ޝައުގުވެރިވާ މީހުން މައުލޫމާތު ސާފު ކުރުމަށް އަންނަ މަހު ތިނެއްގައި ދާން ޖެހެނީ، އޮޅުހިޔާއަށެވެ. އަންދާސީ ހިސާބު ހުށަހެޅުން އޮތީ، އަންނަ މަހު ދިހައެއްގައި އެގްރިކަލްޗާ މިނިސްޓްރީ ހިންގާ ސްކައުޓު ބިލްޑިންގުގެ ފަސް ވަނަ ފަންގިފިލާގައެވެ.
އޮޅުހިޔާއަށް ގެންދިޔަ ބުޅަލެއް -- ފޮޓޯ/ އެނިމަލް ވެލްފެއާ މިނިސްޓްރީ
ބުޅާ ފެސިލިޓީއަކީ މާލެ ސިޓީ ކައުންސިލްގެ ޚަރަދުގައި އިމާރާތްކުރި ތަނެކެވެ. އެ ތަން ރައީސް ޑރ. މުހައްމަދު މުއިއްޒު ނޮވެންބަރު، 2024 ގައި ވަނީ ހުޅުވައިދެއްވާފައެވެ.
އޭގެ ފަހުން، އެ ތަން ހިންގުމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީއާ ވަނީ ހަވާލުކޮށްފައެވެ. އެކަމަކު، މާލެ ސަރަހައްދުގައި އޮތް ބުޅަލުގެ މައްސަލައަށް އެދެވޭ ހައްލެއް ނާދެއެވެ.
އެ ކަންބޮޑުވުން ދާދި ފަހުން މާލެ ސިޓީ ކައުންސިލުގެ ޖަލްސާއެއް ވަނީ ފާޅުކޮށްފައެވެ. މިދިޔަ ހަފުތާގައި ބޭއްވި އެ ޖަލްސާގައި މާލޭގެ މޭޔަރު އާދަމް އާޒިމް ވިދާޅުވީ، މާލެތެރެއަށް ބުޅަލުގެ ނަޖިސް އެޅެން ދޫކުރާނެ އުޒުރެއް ސަރުކާރަށް ނުދެއްކޭނެ ކަމަށާއި ބުޅާތައް ގެންދަން ފަރުކޮޅުފުށީގައި އެޅި ބުޅާ ފެސިލިޓީ ހަވާލުކުރުމަށް ދެ ފަހަރަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީގައި އެދިފައިވާނެ ކަމަށެވެ.
މިދިޔަ އަހަރުގެ މެއި މަހު އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ ވިދާޅުވި ގޮތުގައި، މާލެ ސަރަހައްދުގައި އުޅޭ ބުޅާތައް ގެންދިޔުމަށް ހުޅުމާލޭ ފަރުކޮޅުފުށީގައި ގާއިމުކުރި "އޮޅު ހިޔާ"އަށް ނޮން-ރިކަރަންޓް ޚަރަދުގެ ގޮތުގައި 1.2 މިލިއަން ރުފިޔާ ޚަރަދުވާނެއެވެ.
ފެސިލިޓީގެ ޖުމުލަ ބަޖެޓުން ބުޅަލަކަށް މަހަކު 368 ރުފިޔާ ޚަރަދުވާނެ ކަމަށާއި، ފެސިލިޓީގެ ޖުމުލަ ބަޖެޓުން ބުޅަލަކަށް އަހަރަކު 5،416 ރުފިޔާ ޚަރަދުވާނެ ކަމަށް އޭރު މިނިސްޓަރު ވިދާޅުވިއެވެ. އަދި އެ ފެސިލިޓީއަށް އަހަރަކު 10.8 މިލިއަން ރުފިޔާ ޚަރަދުވާނެ ކަމަށް އޭނާ ވިދާޅުވެފައިވެއެވެ.