ދިވެހިރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް) އިން ތެލާއި މައުދަން ހޯދުމުގެ މަސައްކަތް ކުރުމަށް ހުއްދަ ދިނީ، މުސްތަގުބަލަށް ވިސްނުމެއް ނެތި ކަމަށާއި އެ ކަމުން ރާއްޖޭގެ މަސްވެރިކަމާއި ފަތުރުވެރިކަން ނެތި ދިޔުމުގެ ބިރު އެބަ އޮތް ކަމަށް ކުރީގެ އެންވަޔަރަމަންޓް މިނިސްޓަރު އައިމިނަތު ޝައުނާ މިއަދު ވިދާޅުވެއްޖެއެވެ.
އެސްއީޒެޑްގައި ހިންގޭ މަސައްކަތްތަކަށް ތެލާއި މައުދަން ހޯދުން ރައީސް ޑރ. މުހައްމަދު މުއިއްޒު އިއްޔެ ވަނީ އިތުރުކުރައްވާފައެވެ.
އެ ނިންމުމާ ގުޅިގެން ކަންބޮޑުވުން ފާޅުކުރައްވައި، ޝައުނާ އެކްސްގައި ލިޔުއްވި ޕޯސްޓެއްގައި ވަނީ، ކަނޑު އަޑިން ތެލާއި މައުދަން ނެގުމަށް ގާނޫނުން ބާރުދިނުމަކީ، ކަނޑު އަޑީގެ ދިރުންތަކަށް އޮތް ނުރައްކަލެއް ކަމަށެވެ.
އެ ކަމުގެ ސަބަބުން، ފަތުރުވެރިކަމަށް ނޭދެވޭ އަސަރުކޮށް، މަސް ކަނޑުތައް ހަލާކުވާނެ ކަމަށް އޭނާ ވިދާޅުވިއެވެ.
ތިމާވެށީގެ އެކި ކަންކަމުގައި ވަކާލާތު ކުރައްވާ ޝައުނާގެ މި ކަންބޮޑުވުންތަކުގެ ތަފްސީލު 'ސަން'އަށް މިއަދު ދެއްވަމުން އިތުރަށް ވިދާޅުވީ، މި ސަރަހައްދުގެ ގިނަ ކަނޑުތަކުން ތެލާއި މައުދަން ހޯދުން ފަދަ މަސައްކަތްތައް ކުރުމުން އެތައް ދިރުމެއް ނެތި ގޮސްފައިވާ ކަމަށެވެ.
އެފަދަ ނިންމުންތައް ގިނަ ގައުމުތަކުން ނިންމާފައި ހުރީ އެހާ ބޮޑު ވިސްނުމެއް ނެތި ކަމަށާއި އެ ގައުމުތަކުގައި އެ ފަދަ މަސައްކަތްތައް ކުރުމުން މަސްވެރިކަމަށް ކުރި އަސަރާއި ކަނޑުގެ ދިރުންތައް ވަރަށް ބޮޑަށް ނެތި ދިޔަ މަންޒަރު ފެނުނު ކަމަށް އޭނާ ވިދާޅުވިއެވެ.
މިގޮތުން، ތެލާއި މައުދަން ހޯދުމުގެ މަސައްކަތް ގިނަ އަހަރުތަކެއް ވަންދެން ކުރި ގައުމުތަކުން އެ ނިންމުންތައް ކަނޑުގެ ދިރުންތައް އަލުން އިއާދަކުރުމަށް ބަދަލުކޮށްފައި އެބަހުރި ކަން އޭނާ ފާހަގަކުރެއްވިއެވެ.
ކަނޑުގެ ދިރުންތަކަށް ރާއްޖޭން ވަރަށް ބޮޑަށް ބަރޯސާވާއިރު، ޝައުނާ ވިދާޅުވި ގޮތުގައި، ސަރުކާރުން ކަނޑުން ތެލާއި މައުދަން ހޯދުމަށް ނިންމާފައި ވަނީ، މުސްތަގުބަލަށް ވިސްނުމެއް ނެތިއެވެ.
އެ ނިންމުމުގެ ސަބަބުން ރާއްޖެއަށް ކުރާނެ އަސަރު ކަންބޮޑުވުމާ އެކު، އޭނާ ވަނީ ކިޔައިދެއްވާފައެވެ. މިގޮތުން، ތެލާއި މައުދަން ހޯދުމުގެ މަސައްކަތަކީ، ފަތުރުވެރިކަމާއި މަސްވެރިކަން ވަރަށް ބޮޑަށް ހަލާކުވެދާނެ ކަމުގެ ބިރު އޮތް ކަމެެއް ކަން ޝައުނާ ފާހަގަކުރެއްވިއެވެ.
އެހެންވީމައި އަޅުގަނޑުމެންގެ އިގުތިޞާދު ބިނާވެފައި މި އޮތީ ކަނޑުގެ ދިރުންތަކާއި އެކީގައި. [އެހެން އެކަން އޮއްވައި] އަޅުގަނޑަކަށް ހަމަ އެއް ގޮތަކަށް ވެސް ނުވިސްނޭ މިހާ ޑިސްޓްރަކްޓިވް އިކޮނޮމިކް ދާއިރާއެއް ރާއްޖެއަށް ތައާރަފު މި ކުރަނީ ކީއްވެ ކަމެއްކުރީގެ އެންވަޔަރަމަންޓް މިނިސްޓަރު އައިމިނަތު ޝައުނާ
އިތުރަށް ވާހަކަދައްކަވަމުން އޭނާ ވިދާޅުވީ، އެމްޑީޕީ ސަރުކާރުގައި ކަނޑުގެ ބޮޑުބައެއްގެ ދިރާސާއެއް ހަދާފައިވާ ކަމަށެވެ. ރާއްޖޭގެ ކަނޑުގެ އާ ދިރުންތަކެއް ހުރިކަން އެ ދިރާސާއިން ދައްކާފައިވާ ކަމަށް ޝައުނާ ވިދާޅުވިއެވެ.
މިގޮތުން، އެ ދިރުންތައް ނައްތާލުމަށް ވުރެ، އެ ކަމުގެ ފައިދާ އިގުތިޞާދަށް ކުރާނެކަން އޭނާ ގަބޫލުކުރައްވައެވެ. އަދި، މިއީ، ބައިނަލްއަގުވާމީ ބައްދަލުވުންތަކުގައި ދައްކާ ވާހަކަތަކާ ޚިލާފު ނިންމުމެއްގެ ގޮތުގައި އޭނާ ވަނީ ސިފަކުރައްވާފައެވެ.
ކަނޑުއަޑިން ތެލާއި މައުދަން ހޯދަން ހުއްދަ ދިނުމުން ކަންބޮޑުވުން ފާޅުކުރެއްވި އިރު، ޝައުނާ ވަނީ، ކަނޑުގެ ވަސީލަތްތައް ދެމެހެއްޓެނިވި ގޮތުގައި ބޭނުންކުރުމާ ގުޅޭ ގޮތުން އިލްމު ހޯދުމަށް މަސައްކަތްކުރާ، އދ.ގެ ޑެކޭޑް އޮފް އޯޝަން ސައެންސް ފޯ ސަސްޓެއިނަބަލް ޑެވެލޮޕްމެންޓް 2021-2030 (އޯޝަން ޑެކޭޑް)ގެ ބޯޑަށް އައްޔަނުކޮށްފައެވެ.
ޝައުނާއަކީ ތިމާވެށްޓާ ގުޅޭ އެކި ކަންކަމުގައި ވަކާލާތުކުރައްވާ، އޭނާގެ މިނިސްޓަރުކަމުގެ ދަށުން ތިމާވެށީގެ އެކި މަޝްރޫއުތައް ކުރިއަށްގެންގޮސްފައިވާ ބޭފުޅެކެވެ. އޭނާ ވަނީ ވޯލްޑް އިކޮނޮމިކް ފޯރަމްއިން 2020 ވަނަ އަހަރު ޔަންގް ގްލޯބަލް ލީޑަރުގެ މަގާމާއި، މަޝްހޫރު މެގަޒިން ބްލޫމްބާގް އިން ދޭ "ނިއު އިކޮނޮމީ ކެޓަލިސްޓް" މަގާމު 2023ގައި ހޯދައިފައެވެ.