ދިވެހިރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް)އެއްގައި ހިންގޭ މަސައްކަތްތަކަށް ތެލާއި މައުދަން ހޯދުން ރައީސް ޑރ. މުހައްމަދު މުއިއްޒު މިއަދު އިތުރުކުރައްވައިފިއެވެ.
ރައީސް މިއަދު އެ ކަން އިއުލާނުކުރެއްވީ، ގެޒެޓުގައި ޝާއިއުކުރެއްވި ގަރާރެއްގައެވެ.
މިދިޔަ އަހަރުގެ ގަރާރުގައި އޮތީ ހަމައެކަނި ގޭސް ހޯދުމެވެ. އެކަމަކު، މި އަހަރުގެ ގަރާރަށް ވަނީ، ގޭހާއި ތެލުގެ އިތުރަށް މައުދަން ހޯދުމުގެ މަސައްކަތް އިތުރުކޮށްފައެވެ.
އެގޮތުން، އެސްއީޒެޑްގައި ހިންގިދާނޭ އިޤްތިޞާދީ މަސައްކަތްތައް ކަމުގައި ކަނޑައަޅުއްވާފައިވަނީ، ޖުމުލަ 100 މިލިއަން އެމެރިކާ ޑޮލަރަށްވުރެ ކުޑަނޫން އަދަދުގެ އިންވެސްޓުމަންޓުތަކާއި ޖުމުލަ 500 މިލިއަން އެމެރިކާ ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓް ހިމެނޭގޮތަށް ތަރައްގީ ކުރުމަށް ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫޢުތަކެވެ.
އެ އިންވެސްޓުމަންޓުތަކުގެ ތެރޭގައި ހިމެނެނީ:
- އެކްސްޕޯޓަށް އިސްކަންދީގެން ހިންގާ މެނުފެކްޗަރިންގެ އެކި ބާވަތުގެ މަސައްކަތްތައް
- ޓްރާންސްޝިޕްމަންޓް ޕޯޓް، އިންޓަނޭޝަނަލް ލޮޖިސްޓިކްސް، ޕޯޓް، އެއާޕޯޓް،
- ބަލްކް ބްރޭކިން، ބަންކަރިން، ޑޮކިން ސާވިސަސް.
- ޔުނިވާސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސާޗް އެންޑް ޑިވެލޮޕްމަންޓް ފެސިލިޓީތައް.
- ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައިސީޓީ) ޕާކް، އައިސީޓީއާ ގުޅޭ ފެސިލިޓީތައް
- އިންޓަނޭޝަނަލް ފައިނޭންޝަލް ސާވިސަސް، އިންޓަނޭޝަނަލް ޓްރޭޑް ސެންޓަރުތައް
- އިޢާދަކުރަނިވި ހަކަތައިގެ ދާއިރާ
- ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް
- ފުޑް ސެކިއުރިޓީގެ ދާއިރާ
- ތެލާއި ގޭހާއި މިނަރަލް އެކްސްޕްލޮރޭޝަންގެ މަސައްކަތްތައް
ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތަކުގައި މިނިމަމް އިންވެސްޓްމަންޓުގެ ގޮތުގައި ކަނޑައަޅައިފައިވާ 500 މިލިޔަން އެމެރިކާ ޑޮލަރު ޚާއްސަ ކުރަންވާނީ ސަސްޓެއިނަބަލް ޓައުންޝިޕް ޑިވެލޮޕްމަންޓުގެ ކޮމްޕޯނަންޓްތަކަށް ކަމަށް ވެސް ގަރާރުގައި ކަނޑައަޅުއްވާފައިވެއެވެ.
މީގެ ކުރިން ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި އެސްއީޒެޑް އިންވެސްޓްމެންޓަކަށް ކަނޑައެޅުއްވި އެންމެ ކުޑަ އަގަކީ 150 މިލިއަން ޑޮލަރެވެ. ނަމަވެސް 2023 ވަނަ އަހަރު ރައީސް ނެރުއްވި ގަރާރަކުން ވަނީ، އެސްއީޒެޑް އިންވެސްޓްމެންޓް ފެށޭ އަގު 100 މިލިއަން ޑޮލަރަށް ދަށްކުރައްވައިފައެވެ.
އެސްއީޒެޑް ގާނޫނުގެ ދަށުން ދިން ފުރަތަމަ ހުއްދަ، މި ސަރުކާރުން ދީފައިވަނީ ކަރަންޓު ފޯރުކޮށްދިނުމަށް މާލޭ ސަރަހައްދުގައި ފްލޯޓިން ސޯލާ ނިޒާމެއް ގާއިމުކުރުމަށް ކެނެޑާގެ އަބްރަކްޒަސް ޕަވާ ކޯޕް އަށެވެ. އެ ކުންފުނިން އެ ޕްރޮޖެކްޓު ހިންގަނީ ޗައިނާގެ ސަންގްރޯ ޕަވާ ސްޕްލައި ކޯ ލިމިޓެޑާ ގުޅިގެން ކަމަށް އިކޮނޮމިކް މިނިސްޓްރީން ބުނެފައިވެއެވެ.