މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ގާނޫނު ބާތިލުކޮށްދިނުމަށް އެދި، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ހައިކޯޓަށް ދުސްތޫރީ މައްސަލައެއް މިއަދު ހުށަހަޅައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އެމްޖޭއޭގެ ރައީސް އަހުމަދު ނާއިފް ވިދާޅުވީ، އެ މައްސަލަ ނިމެންދެން މީޑިއާތަކުގެ މައްޗަށް ފިޔަވަޅު ނޭޅޭ ގޮތަށް ކޮމިޝަނުގެ މައްޗަށް ވަގުތީ އަމުރެއް ނެރެދިނުމަށް އެދިފައިވާ ކަމަށެވެ. އެ ގާނޫނަކީ ރާއްޖޭން ބައިވެރިވެފައި ހުރި ބައިނަލްއަގުވާމީ މުއާހަދާތަކާއި ރާއްޖޭގެ ގާނޫނުއަސާސީއާ ޚިލާފަށް އެކުލަވާލާފައި އޮތް ގާނޫނެއް ކަމަށް ނާއިފު ވިދާޅުވިއެވެ.
އިތުރަށް އޭނާ ވިދާޅުވީ، އަދަދު ނޫހުގެ އިތުރަށް އެހެން މީޑިއާތަކުގެ މައްޗަށް ކޮމިޝަނުން ފިޔަވަޅު އަޅާނެ ކަމުގެ ބިރު އެބަ އޮތް ކަމަށެވެ. މިގޮތުން، މީޑިއާ ކޮމިޝަނުން ފިޔަވަޅު އަޅަނީ، ގާނޫނާ ޚިލާފަށް ކަމަށް އެމްޖޭއޭއިން ދެކޭ ކަމަށް ނާއިފް ވިދާޅުވިއެވެ.
މީޑިއާ ކޮމިޝަނުގެ ގާނޫނު ބާތިލުކޮށްދޭން އެދި މައްސަލައެއް ހުށަހެޅިއިރު، އަދަދުގެ ސޯޝަލް މީޑިއާގައި މަކަރާއި ހީލަތާ ގުޅޭ މަންޒަރު ދޭހަވާ ގޮތަށް ޝާއިއުކުރި އެ ކާޓޫނަކީ އިސްލާމްދީނުގެ އަސާސްތަކަށް ފުށޫއަރާ ކަންތައްތަކެއް ހުރި ކާޓޫނެއް ކަމަށް މީޑިއާ ކޮމިޝަނުން ވަނީ ތުހުމަތުކޮށްފައެވެ.
އެހެންކަމުން، އެ މައްސަލަ ބަލަމުންދާ ކަމަށާއި، އެ ކާޓޫނު އެއްވެސް ފަރާތަކުން ދައުރު ނުކުރަން އެންމެ ފުރަތަމަ ވަނީ އެދިފައެވެ.
ނަމަވެސް، އެ އިއުލާނު ސޯޝަލް މީޑިއާއިން ޑިލީޓްކުރުމަށްފަހު އަލުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ނެރުނު އިއުލާނުގައި ބުނީ "މީޑިއާތަކުން އެ ކޮންޓެންޓް ދައުރު ނުކުރަން އަންގާ" ކަމަށެވެ.