ދެކުނު ކޮރެއާގެ ސިޔާސީ މައިދާނުގައި ނުފޫޒުގަދަ، ކުރީގެ ބޮޑުވަޒީރު ލީ ހައެ-ޗަން، ވިއެޓްނާމަށް ކުރެއްވި ރަސްމީ ދަތުރުފުޅެއްގެ ތެރެއިން ކުއްލި ގޮތަކަށް އަވަހާރަވެއްޖެއެވެ.
އުމުރުފުޅުން 73 އަހަރުގެ ލީ އަވަހާރަވީ އާދީއްތަ ދުވަހު ވިއެޓްނާމްގެ ހޯޗީމިން ސިޓީގައި، ހާޓް އެޓޭކަކަށް ފަރުވާ ދެމުން ދަނިކޮށް ކަމަށް ދެކުނު ކޮރެއާގެ ރައީސްގެ އެޑްވައިޒަރީ ޕެނަލުން ވަނީ ކަށަވަރުކޮށްދީފައެވެ.
މި ޚަބަރާ ގުޅިގެން ދެކުނު ކޮރެއާގެ ރައީސް ލީ ޖައެ މިޔުންގް ވިދާޅުވީ، ގައުމަށް ގެއްލިގެން ދިޔައީ ޑިމޮކްރަސީގެ ތާރީޚުގައި ވަރަށް މުހިންމު މަގުދައްކައިދިން މެންޓަރެއް ކަމަށާއި، އޭނާއަކީ މުޅި ހަޔާތް ޑިމޮކްރެޓިކް އުސޫލުތައް ގާއިމްކުރުމަށް ހޭދަކުރެއްވި ބޭފުޅެއް ކަމަށެވެ.
ލީ ހައެ-ޗަންއަކީ 2004 އިން 2006 އަށް ދެކުނު ކޮރެއާގެ ބޮޑުވަޒީރުކަން ކުރެއްވުމުގެ އިތުރުން، ހަތް ދައުރުގައި ގާނޫނު ހަދާ މަޖިލީހުގެ މެންބަރުކަން ކުރައްވާފައިވާ ތަޖުރިބާކާރު ސިޔާސީ ޝަޚްސިއްޔަތެކެވެ.
އޭނާގެ ސިޔާސީ މަސައްކަތްޕުޅު ފެއްޓެވީ 1970 ގެ އަހަރުތަކުގައި ކިޔަވާ ކުދިންގެ އެކްޓިވިސްޓެއްގެ ގޮތުގައި ކަމަށްވާއިރު، އޭރު އޮތް ވެރިކަމާ ދެކޮޅަށް ޑިމޮކްރަސީއަށް ވަކާލާތު ކުރެއްވުމުގެ ސަބަބުން ޖަލު ހުކުމެއްވެސް ތަންފީޒު ކުރެއްވިއެވެ.
ލީއަކީ ހަތް ދައުރުގައި ގާނޫނު ހަދާ މަޖިލީހުގެ މެންބަރުކަން ކުރައްވާފައިވާ ތަޖުރިބާކާރު ސިޔާސީ ޝަޚްސިއްޔަތެއް --- ފޮޓޯ: އޭޕީ
ސިޔާސީ މައިދާނުގައި "ކުޅަދާނަ ސްޓްރެޓެޖިސްޓެއް" ގެ ގޮތުގައި މަޝްހޫރުވެފައިވާ ލީއަކީ، މިހާރުގެ ރައީސް ހިމެނޭހެން "ލިބަރަލް" ފިކުރުގެ ހަތަރު ރައީސަކު ވެރިކަމަށް ގެނައުމުގައި އެންމެ އިސް ދައުރެއް އަދާކުރެއްވި ބޭފުޅާއެވެ.
އިދިކޮޅު ކޮންޒަވޭޓިވް ޕީޕަލް ޕަވާ ޕާޓީން ނެރުނު ބަޔާނެއްގައި، ލީގެ ވަކިވުމަކީ ކޮރެއާގެ ސިޔާސީ ތާރީޚުގެ މުހިންމު ބާބެއް ނިމިގެންދިޔުން ކަމަށް ސިފަކޮށް އާއިލާއަށް ތައުޒިޔާ ފޮނުވާފައިވެއެވެ.
ލީ ވިއެޓްނާމަށް ވަޑައިގަތީ އުތުރު ކޮރެއާގެ ސިޔާސަތުތަކާ ބެހޭ ގޮތުން ސަރުކާރަށް ލަފާދޭ "ޕީސްފުލް ޔުނިފިކޭޝަން އެޑްވައިޒަރީ ކައުންސިލް" ގެ ބައްދަލުވުމަކަށެވެ.
ވިއެޓްނާމްގެ ސަރުކާރުން ބުނި ގޮތުގައި، ލީގެ ހާލަތު ގޯސްވުމާ ގުޅިގެން އެންމެ ފެންވަރު ރަނގަޅު ސިއްހީ ފަރުވާ ދިނުމަށް އެ ގައުމުގެ ފޮރިން މިިނިސްޓްރީއާއި ސިޓީ ކައުންސިލުން ގިނަ މަސައްކަތްތަކެއް ކުރި ނަމަވެސް، އޭނާ ސަލާމަތް ކުރެވޭ ގޮތް ވަނީ ނުވެފައެވެ.
ދެކުނު ކޮރެއާގެ ސަރުކާރުން މިހާރު ދަނީ ވިއެޓްނާމްގެ ކަމާބެހޭ ފަރާތްތަކާ ގުޅިގެން ލީގެ ހަށިކޮޅު ގައުމަށް ގެންދިއުމުގެ އިންތިޒާމުތައް ހަމަޖައްސަމުންނެވެ.