ޔާމީން ސައީދަށް: ސަރުކާރު ނުދަރައޭ ބުނާ ބަހުގެ މާނައަކީ ކޮބާ؟

މި ސަރުކާރުން ރާއްޖެ ދަރުވައިނުލައި ސަލާމަތްކޮށްދީފައިވާ ކަމަށް ބުނާބަހުގެ މާނައަކީ ކޮބައިތޯ ކުރީގެ ރައީސް އަބްދުﷲ ޔާމީން އަބްދުލް ގައްޔޫމް އިކޮނޮމިކް މިނިސްޓަރު މުހައްމަދު ސައީދާ ސުވާލު ކުރައްވައިފިއެވެ.

ޔާމީން މިފަދައިން ސުވާލިު ކުރެއްވީ ޕީއެންއެފުން މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރާއްޖެ ބަނގުރޫޓުވަމުން ދަނިކޮށް މި ސަރުކާރުން އައިސް އެ ކަމުން ސަލާމަތްކޮށްދީފައިވާ ކަމަށް ސަރުކާރުން ބުނަމުންދާއިރު، ޔާމީން ވަނީ ރާއްޖެއިން ޗައިނާއަށާއި އިންޑިއާއަށް ދޭންޖެހޭ ފައިސާ ކޮބައިތޯ އައްސަވައިފައެވެ.

"[ރައީސް މުއިއްޒު] ރިޔާސީ ބަޔާނުގައި މި ވިދާޅުވާ ވާހަކައިގައި އެންމެ ފާހަގަކޮށްލެވޭ ކަމަކީ، ސަރުކާރު ނުދަރައި މި އަހަރު ސަލާމަތްކޮށްދީފީމޭ. އަޅުގަނޑު ސައީދުމެންނަށް ހަމަ ދަންނަވައިލަން އޮތް ވާހަކައަކީ ސަރުކާރު ނުދަރަނީ ކޮން ގޮތަކަށްހޭ؟ ދަރަނި މާނަކުރައްވަނީ ކިހިނެއްހޭ؟" ޔާމީން ސުވާލު އުފެއްދިއެވެ.

ސައީދުގެ ކިބައިން ޔާމީން އެދިވަޑައިގަތީ ޒިންމާދާރު ކަމާއެކު މަސައްކަތް ކުރެއްވުމަށެވެ.

ރޭ ބޭއްވި އަހާ ފޯރަމްގައި ސައީދު ވަނީ، މި އަހަރު ރާއްޖޭގެ އިންފްލޭޝަން ހަ ޕަސެންޓަށް އުފުލިގެންދާނެ ކަމަށް ބޭރުގެ މާލީ އިދާރާތަކުން އަންދާޒާކުރި ނަމަވެސް، އެ ރޭޓު ތިން ޕަސެންޓުގައި ހިފެހެއްޓިފައިވާ ކަމަށް ވިދާޅުވެފައެވެ.

މި ކަމާ ގުޅިގެން ޔާމީން ވިދާޅުވީ އެއީ ރޯ ބުހުތާން ވާހަކައެއް ކަމަށާއި، ރާއްޖޭގެ އިންފްލޭޝަން ކަނޑައެޅިގެން މި ވަގުތު ހުންްނާނީ ތިން ޕަސެންޓުގައި ނޫން ކަމަށެވެ. ޒިންމާދާރު ކަމެއް ނެތި އަދަދުތަކެއް ވިދާޅުވަނީ ކަމަށް ތުހުމަތު ކުރައްވައި، ޔާމީން ވަނީ އެއީ ކާކު ހެއްދެވި ހިސާބެއްތޯ ވެސް އައްސަވައިފައެވެ.

ޔާމީން ވިދާޅުވި ގޮތުގައި ވޯލްޑް ބޭންކުން ދިވެހިރާއްޖޭގެ އިގުތިސާދީ ހާލަތާ ގުޅިގެން އަންދާޒާކުރި އެއް ކަމެއް ވެސް އަދި ދެކޮޅަށް ހިނގާފައެއް ނުވެއެވެ. ޔާމީން ވިދާޅުވީ މާލީ އިދާރާތަކުން ލަފާކޮށްފައިވާ ހާލަތަށްވުރެ ރާއްޖޭގެ އިގުތިސާދު ބޮޑުތަނުން ރަނގަޅުނަމަ، އެ ކަމެއް އެ ވީ ސަރުކާރުން ކޮން ކަމެއް ކޮށްގެންތޯ ވެސް ބުނެދޭންވާނެ ކަމަށެވެ.

".... ތިމަންމާމެން އިގުތިސާދު މެނޭޖުކޮށްފީމޭ އިންފްލޭޝަން މި ހުރީ ތިން ޕަސެންޓުގައޭ، މިއީ ހަމަ ރޯ ބުހުތާން ވާހަކައެއް. ރާއްޖޭގެ އިންފްލޭޝަން މި ވަގުތު ނުހުންނާނެ ތިން ޕަސެންޓުގައެއް. އިމްޕޮސިބަލް. އެކަމު ހަމަ ފިގާއެއް ބުނަން ވެގެން ބުނަނީ. ކާކު ހެދި ހިސާބެއްތޯ މިއީ؟" ޔާމީން ވިދާޅުވިއެވެ.

ތަކެތީގެ އަގު ހިފެހެއްޓިފައިވާ ކަމަށް ސަރުކާރުން ބުންޏަސް، ތަކެތީގެ އަގު ބޮޑުވާކަމުގެ ޝަކުވާތައް އާންމުން ކުރާކަމަށް ވެސް ޔާމީން ވިދާޅުވިއެވެ.

ރާއްޖޭގެ އިގްތިޞާދީ ހާލަތާ ގުޅޭ ގޮތުން ޔާމީން މިރޭ ކަންބޮޑުވުން ފާޅުކޮށްފައި ވާއިރު، ފިނޭންސް މިނިސްޓްރީން އެންމެ ފަހުން އާންމުކުރި ދައުލަތުގެ އާމްދަނީއާއި ޚަރަދުގެ ތަފާސްހިސާބުން، މިދިޔަ އަހަރުގެ މި މުއްދަތާ އަޅައިބަލާއިރު އާމްދަނީ ދަށްވެފައިވާ ކަމަށް ވަނީ ދައްކާފައެވެ.

https://sun.mv/202609

މި ސަރުކާރުން އަންނަނީ އާމްދަނީ އިތުރުކުރުމަށް އިގުތިސާދު ސިންދަފާތު ކުރުމަށް މަސައްކަތްތަކެއް ފެށުމުގެ އިތުރުން، ޚަރަދު ކުޑަކުރުމުގެ ފިޔަވަޅުތަކެއް ވެސް އަޅަމުންނެވެ.

މިދިޔަ އަހަރު ދައުލަތުގެ އިގުތިސާދީ ހާލަތު ދަށްވުމާ ގުޅިގެން ބޭރުގެ އިދާރާތަކުން ވަނީ ޚަރަދު ކުޑަކުރުމުގެ ފިޔަވަޅުތައް އަވަސް ކުރުމަށް ގޮވާލައިފައެވެ.

އިންޓަނޭޝަނަލް މަނިޓަރީ ފަންޑު (އައިއެމްއެފް)ގެ ވަފުދެއް ރާއްޖެ އައިސް، ރާއްޖޭގެ އިގްތިސާދީ އަދި މާލީ ހާލަތު ވަޒަންކުރުމަށް ފަހު މިދިޔަ ހަފުތާގައި ރައްޔިތުންގެ މަޖިލީހާ މައުލޫމާތު ހިއްސާކުރަމުން ވެސް ވަނީ އިސްލާހީ ފިޔަވަޅުތައް އަވަސް ކުރުމަށް ގޮވާލައިފައެވެ.