ހއ. ދިއްދޫގައި އެއާޕޯޓު އެޅުމަކީ އެމްޑީޕީގެ ވިސްނުމެއް ކަމަށް ވިދާޅުވެ، 2026ވަނަ އަހަރުގެ ކުރިން އެ މަސައްކަތް ނިންމަން ރައީސް ޑރ. މުހައްމަދު މުއިއްޒަށް އެމްޑީޕީގެ ރައީސް އަބްދުﷲ ޝާހިދު މިރޭ ޗެލެންޖު ކުރައްވައިފިއެވެ.
ރައީސް މުއިއްޒު އުތުރުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރޭ ދިއްދޫއަށް ވަޑައިގެން ވިދާޅުވީ އެ ރަށުގައި އެއާޕޯޓެއް އެޅުމަކީ މި ސަރުކާރުގެ ސަރަހައްދީ ތަރައްގީ ސިޔާސަތުގެ ދަށުން ކުރަން ނިންމާފައިވާ ކަމެއް ކަމަށެވެ. އަދި ދެން އެ ރަށަށް ވަޑައިގަންނަވާނީ މަސައްކަތް ނިންމައި، އެއާޕޯޓު ރަސްމީކޮށް ހުޅުވުމަށް ކަމަށް އެމަނިކުފާނު ވިދާޅުވިއެވެ.
އެމްޑީޕީން މިރޭ ހުޅުމާލޭގައި ބޭއްވި ކަންމަތީ ޖަލްސާގައި މި ކަމާ ގުޅިގެން ވާހަކަ ދައްކަވަމުން ޝާހިދު ވިދާޅުވީ 2026ވަނަ އަހަރު އޮންނަ ލޯކަލް ކައުންސިލް އިންތިޚާބުގެ ކެމްޕޭނަށް، ރައީސް މުއިއްޒު ދިއްދޫއަށް ވަޑައިނުގަންނަވާނެ ކަމަށް ލަފާކުރެވޭ ކަމަށެވެ. ސަބަބަކީ ވައުދާ އެއްގޮތަށް އެއާޕޯޓު ނޭޅުންކަމަށް އޭނާ ވިދާޅުވިއެވެ.
"އަޅުގަނޑު މިރޭ މިހެން ބުނީތީ، ސަރުކާރުގެ ހުރިހާ ވަސީލަތެއް ބޭނުންކޮށްގެން އެ އެއާޕޯޓު އަޅުއްވާނެ. އެމްޑީޕީން އެ ކަން ކޮށްދޭނީ. އެއީ އެމްޑީޕީގެ ވިސްނުމެއް. ދިއްދޫގައި އެއާޕޯޓެއް އެޅުން އެއީ އެމްޑީޕީގެ ވިސްނުމެއް"
"އެމްޑީޕީގެ ރައީސްގެ ހައިސިއްޔަތުން އަޅުގަނޑު މިރޭ ރައީސުލްޖުމްހޫރިއްޔާއަށް ޗެލެންޖު މި ކުރަނީ މަނިކުފާނު 2026ވަނަ އަހަރު ދިއްދޫއަށް އަރާވަޑައިގަންނަވާނީ ވައިގެ މަގުންނޭ ވިދާޅުވުމަށް، އޭގެ ކުރިން އެ އެއާޕޯޓު އަޅުއްވާށޭ"" ޝާހިދު ވިދާޅުވިއެވެ.
ރައީސް މުއިއްޒު ރޭ ދިއްދޫއަށް ވަޑައިގެން ވިދާޅުވީ ދިއްދޫގައި އެއާޕޯޓު އެޅުމަށް އަމަލީ މަސައްކަތް ފެށުމަށް ޓަކައި ކަންކަން ތަރުތީބު ކުރެވިފައިވާ ކަމަށެވެ.
މި އަހަރުގެ ތެރޭގައި އެ ރަށުގެ ބިން ހިއްކުމާއެކު އެއާޕޯޓުގެ އަމަލީ މަސައްކަތް ބާރު ސްޕީޑުގައި ނިންމައިދޭނެ ކަމުގެ ޔަގީންކަން ރައީސްވަނީ ދިއްދޫގެ ރައްޔިތުންނަށް ދެއްވައިފައެވެ. ވިދާޅުވީ ދެން އެ ރަށަށް ވަޑައިގަންނަވާނީ އެއާޕޯޓުގެ މަސައްކަތް ނިންމައި އެ ތަން ރަސްމީކޮށް ހުޅުވުމަށް ކަމަށެވެ.
ދިއްދޫ އެއާޕޯޓަކީ އެމްޑީޕީގެ ވިސްނުމެއް ކަމަށް ޝާހިދު ވިދާޅުވިއިރު، އެ ރަށުގައި އެއާޕޯޓެއް އެޅުމަށް އެންމެ ފުރަތަމަ ވައުދުވެ ވަޑައިގަތީ ކުރީގެ ރައީސް އަބްދުﷲ ޔާމީނެވެ. މިދިޔަ އެމްޑީޕީ ސަރުކާރުގައި އޭރުގެ ރައީސް އިބްރާހީމް މުހައްމަދު ޞާލިހު ދިއްދޫއަށް ވަޑައިގެން، އެ ރަށުގައި އެއާޕޯޓު އެޅުމަށް ތާއީދުކުރާ މޭރުމަކުން އޮތީ ވާހަކަފުޅު ދައްކަވައިފައެވެ.