ގާނޫނީ އަދަދަށް މެންބަރުން ހަމަނުވުމުގެ ސަބަބުން އިލެކްޝަންސް ކޮމިޝަން (އީސީ)ން އެކި ފަހަރުމަތިން ނޯޓިސްދިނުމަށްފަހު، އެންމެ ފަހުން މޯލްޑިވްސް ރިފޯމް މޫވްމެންޓް (އެމްއާރުއެމް) އުވާލައި، ސިޔާސީ ޕާޓީތަކުގެ ދަފުތަރުން އުނިކޮށްފިއެވެ.
ސިޔާސީ ޕާޓީއެއްގައި މަދުވެގެން ތިބެންޖެހޭ މެންބަރުންގެ ގާނޫނީ އަދަދަކީ 3،000އެވެ. އެ އަދަދަށް މެންބަރުން ހަމަނުވާ ޕާޓީތަކަށް ނޯޓިސް ދިނުމަށް ފަހު ވެސް އަދަދު ހަމަނުވެއްޖެ ނަމަ، އީސީން އެ ޕާޓީއެއް އުވައިލާނެއެވެ.
އެމްއާރުއެމް އުވައިލުމުގެ މަސައްކަތް އީސީން ފެށީ، އެ ޕާޓީއަށް 2023ވަނަ އަހަރުގެ ފެބްރުއަރީ 22ގައި ތިން މަހުގެ ނޯޓިސްއެއް ވެސް ދިނުމަށް ފަހުގައެވެ.
އީސީން ނިންމި މި ނިންމުމަކީ ގަވާއިދާ ޚިލާފަށް ނިންމި ނިންމުމެއް ކަމަށް 2024ގެ ފެބްރުއަރީ 12ގައި ސިވިލް ކޯޓުން ވަނީ ހުކުމްކޮށްފައެވެ. އެހެން ނަމަވެސް އީސީން ވަނީ އެ މައްސަލަ ހައިކޯޓުގައި އިސްތިއުނާފު ކޮށްފައެވެ.
މިދިޔަ އަހަރުގެ އޮގަސްޓުމަހުގެ 25ގައި ވެސް އީސީން ވަނީ އެމްއާރުއެމް އުވައިލަން ނިންމާފައިވާކަން ހާމަކޮށްފައެވެ. އޭގެ ފަހުން އޮކްޓޫބަރުގައި ވެސް އެމްއާރުއެމް އުވައިލުމުގެ މަސައްކަތް ފަށާފައިވާކަން، އީސީންވަނީ ގެޒެޓުގައި އިއުލާންކޮށްފައެވެ.
އީސީން އާންމުކުރި އެންމެ ފަހުގެ ހިސާބުތަކުން ދައްކާ ގޮތުގައި އެމްއާރުއެމްގައި ތިބީ 1،867 މެންބަރުންނެވެ. އެ ޕާޓީ އުވައިލުމުގެ އެންމެ ފަހުގެ މަރުހަލާ ކުރިއަށްދާ ކަމަށް އީސީން އޭރު ވަނީ ބުނެފައެވެ.
އެމްއާރުއެމަކީ، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ރައީސްކަމުގައި ވެސް ހުންނެވި ކުރީގެ ރައީސް މައުމޫން އަބްދުލް ގައްޔޫމް އެ ޕާޓީން ވަކިވެ ވަޑައިގެން އުފެއްދެވި ސިޔާސީ ޕާޓީއެކެވެ.
މިދިޔަ ރިޔާސީ އިންތިޚާބުގައި އެމްއާރުއެމްގެ ފަރާތުން ވާދަ ކުރެއްވުމަށް މައުމޫންގެ ދަރިކަލުން، އަހުމަދު ފާރިސް މައުމޫން މަސައްކަތް ކުރެއްވި ނަމަވެސް، އެ ޕާޓީގައި މެންބަރުން ހަމަނުވާ މައްސަލައާ ގުޅިގެން ވާދަ ކުރެއްވީ އަމިއްލަ ކެންޑިޑޭޓެއްގެ ގޮތުގައެވެ.
މި ފަހުން އެ ޕާޓީ އުވައިލުމާ ހަމަޔަށް ވެސް ޕާޓީގެ ރައީސްކަމުގައި ހުންނެވީ ފާރިސްއެވެ.