ތެހެރާން (29 ޖަނަވަރީ 2025): ފަލަސްތީނުގެ ބިންތަކަށް ގަދަބާރުން ވެރިވެގަނެގެން އުޅޭ އިސްރާއީލު މީހުން ގްރީންލެންޑަށް ފޮނުވާލައި ފަލަސްތީނު ބިން ސާފުކުރުމަށް އީރާނުން އެމެރިކާއަށް ގޮވާލައިފިއެވެ.
އީރާނުގެ ޚާރިޖީ ވަޒީރު އައްބާސް އިރަގްޖީ އާ ހަވާލާދީ އެގައުމުގައި ޝާއިއުކޮށްފައިވާ މީޑިއާ ރިޕޯޓްތަކެއް ބުނާގޮތުން ޣައްޒާގެ ރައްޔިތުން މިސްރާއި އުރުދުންއަށް ފޮނުވާލުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލެއްވުމުން އޭނާ ވަނީ އެކަމަށް ރައްދު ދެއްވައިފައެވެ. އެގޮތުން އީރާނުގެ ޚާރިޖީ ވަޒީރު ވަނީ އިސްރާއީލު މީހުންނަކީ އެމެރިކާއާއި ޔޫރަޕުން ފަލަސްތީނަށް އައިސް ފަލަސްތީނުގެ ބިންތަކަށް ގަދަބާރުން ވެރިވެގަނެގެން އުޅޭ ބައެއްކަމަށާއި އެހެންކަމުން އިސްރާއީލު މީހުން އެމީހުންގެ އަސްލު ގައުމުތަކަށް ފޮނުވާލުމަށް ނޫނީ ޑެންމާކު އަތުން އެމެރިކާ ގަންނަން އުޅޭ ގްރީންލެންޑަށް އިސްރާއީލު މީހުން ފޮނުވާލުމަށް ޓްރަމްޕަށް ގޮވާލައްވާފައެވެ.
އީރާން ދެކޭގޮތުގައި އިސްރާއީލަކީ ހުޅަނގުގެ މަސްލަހަތަށްޓަކައާއި އިސްލާމީ ދުނިޔޭގައި ހަމަނުޖެހުން އުފެއްދުމަށް މެދުއިރުމަތީގައި ހުޅަނގުން އުފައްދާފައިވާ ކެންސަރު ސެލްއެކެވެ. އެހެންކަމުން އިސްރާއީލަކީ އިސްލާމީ ދުނިޔޭގެ ޖިސްމުން ނައްތާލަންޖެހޭ ބަލިމަޑުކަމެކެވެ.
އެމެރިކާ އީރާނާ ޖައްސާލައި އީރާނާ ދެކޮޅަށް ދަތިކުރުމުގެ ފިޔަވަޅުތައް އަޅާ މައިގަނޑު ސަބަބަކީ އިސްރާއީލުގެ މައްސަލައެވެ. އިސްރާއީލާ ދެކޮޅަށް މިނިވަންކަމުގެ ޖިހާދުކުރާ ޖަމާއަތްތަކަށް އީރާން ވާގިވެރިވާތީއާއި އިސްރާއީލަށް ރައްދު ދެވޭފަދަ ބަލިސްޓިކް މިސައިލް ޓެކްނޮލޮޖީ އާއި ނިއުކްލިޔާ ޓެކްނޮލޮޖީ ފަދަ ޒަމާނީ ބަރު ހަތިޔާރުގެ ޓެކްނޮލޮޖީ އީރާނުން ތަރައްގީ ކުރާތީއެވެ.
އެމެރިކާ ދެކޭގޮތުގައި މިބާވަތުގެ ބަރު އަދި ސްޓްރެޓީޖިކް ހަތިޔާރަކީ މެދުއިރުމަތީގައި ހަމައެކަނި އިސްރާއީލު އަތުގައި ހުންނަންޖެހޭ ހަތިޔާރެވެ. އަރަބި އިސްލާމީ ގައުމަކަށް އުފައްދަން އެނގޭ ހަތިޔާރަށް ވެގެންނުވާނެއެވެ. އިސްރާއީލު ނޫން ގައުމަކުން މިފަދަ ހަތިޔާރު އުފެއްދުމުގެ ގާބިލްކަން ހޯދައިފިނަމަ ފަލަސްތީނުގެ ބިމުގައި އަމާންކަމާއެކު އިސްރާއީލު ދެމިއޮތުމަށް ނުރައްކާވާނެ ކަމަށް އިސްރާއީލެކޭ އެއްގޮތަށް އެެމެރިކާވެސް އަދި ޔޫރަޕް ވެސް ދެކެއެވެ.
އެމެރިކާއާއި ޔޫރަޕްގެ ސިޔާސަތުތައް ބައްޓަންކޮށްފައިވަނީ މެދުއިރުމަތީގައި އިސްރާއީލު ބޭނުންވާ ކޮންމެ ގައުމަކަށް އިސްވެ ހަމަލާދީ އިސްރާއީލު ބޭނުންވާ ތަނެއް ހަލާކުކޮށް ފުނޑާލުމުގެ ބާރު އިސްރާއީލަށް ލިބިދޭގޮތަށް އަދި އިސްރާއީލުގެ ހަމަލާތަކުގެ ޝިކާރައަކަށްވާ ގައުމުތަކަށް އޭގެ ރައްދު އިސްރާއީލަށް ނުދެވޭފަދަ ބަލިކަށި ހާލަތުގައި މެދުއިރުމަތީގެ އަރަބި އިސްލާމީ ގައުމުތައް ބޭއްވުމުގެ މައްޗަށެވެ.
ނަމަވެސް އީރާން ވަނީ އެމެރިކާގެ މިސިޔާސަތުތަކަށް ގޮންޖަހައި އިސްރާއީލަށް ރައްދު ދެވޭވަރުގެ ބާރުގަދަ އަސްކަރީ ޓެކްނޮލޮޖީ އަމިއްލައަށް ތަރައްގީކޮށްފައެވެ. އިސްރާއީލަށް ރައްދު ދެވޭފަދަ ބާރުގަދަ ގައުމަކަށް ވެފައެވެ.
ޣައްޒާގެ ހަނގުރާމައިގެ ދުވަސްވަރު އީރާންވަނީ އިސްރާއީލުން އީރާނުގެ މަސްލަހަތުތަކާ ދެކޮޅަށް ދިން ހަމަލާތަކަކަށް ރައްދު ދިނުމުގެ ގޮތުން ސީދާ އިސްރާއީލަށް އެތައް ހާސް މިސައިލާއި ޑްރޯން ބޭނުންކޮށްގެން ދެ ފަހަރެއްގެ މަތިން ވަރުގަދަ ހަމަލާތަކެއް ދީފައެވެ. މި ހަމަލާތަކާ ގުޅިގެން އީރާނަށް މާބޮޑު ރައްދެއްދޭން އިސްރާއީލަށް ކެރިފައެއް ނުވެއެވެ. އަދި އިސްރާއީލު އިންޒާރު ދޭ ގޮތަށް އީރާނުގެ ނިއުކްލިޔާ މަރުކަޒުތަކަށްވެސް ހަމަލާ ދޭން އިސްރާއީލަށް ކެރިފައެއް ނުވެއެވެ.
ޣައްޒާއިން ޣައްޒާގެ ރައްޔިތުން ބޭރުކޮށް އުރުދުން އާއި މިސްރަށް އެމީހުން ފޮނުވާލުމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ގޮވާލައްވާފައެވެ. މިއާއެކު މިމައްސަލާގައި ޓްރަމްޕްވަނީ އުރުދުންގެ ރަސްގެފާނު އަބްދުﷲ އަށް ފޯނުން ގުޅުއްވައި މިކަމަށް އެދިވަޑައިގެންފައެވެ. ނަމަވެސް އުރުދުންއާއި މިސްރުންވަނީ ޓްރަމްޕްގެ މިގޮވާލެއްވުމަށް ފާޅުގައި ދެކޮޅު ހަދައި ބަޔާން ނެރެފައެވެ.
މިމައްސަލާގައި މިސްރުގެ ރައީސް އަބްދުލްފައްތާހް އައްސީސީ އަށްވެސް ފޯނުން ގުޅުއްވާނެކަމަށް މީގެ ދެދުވަސްކުރިން ޓްރަމްޕް ވިދާޅުވެފައި ވެއެވެ. ނަމަވެސް މިސްރުގެ މަސްއޫލުވެރިން ވިދާޅުވިގޮތުގައި މިކަމަށް އެއްބާރުލުން ނުދޭނެކަމަށް ބުނެ މިސްރުގެ ޚާރިޖިއްޔާއިން ބަޔާނެއް ނެރެފައިވާތީ މިކަމާ ގުޅިގެން މިސްރުގެ ރައީސަށް ފޯނުކުރައްވަން ޓްރަމްޕަށް އަދި ކެރިވަޑައިގެން ފައެއް ނުވެއެވެ.