ދެކުނު ކޮރެއާގެ ބޫސާންގައި އޮންނަ ވައިގެ ބަނދަރަކުން ނައްޓާލަން އުޅުނު މަތިންދާބޯޓެއްގައި ރޯވެ، ބޮޑެތި ގެއްލުންތަކެއް ލިބިއްޖެއެވެ.
ރޮއިޓާސް ނޫހުން ރިޕޯޓުކޮށްފައިވާ ގޮތުގައި، ރޯވީ ގިމްހޭ އިންޓަނޭޝަނަލް އެއާޕޯޓުގައި އޮތް އެއާ ބޫސާންގެ މަތިންދާބޯޓެއްގައެވެ. އެ ބޯޓުގައި ރޯވީ ހޮންކޮންގްއަށް ދަތުރު ފަށަން އުޅެނިކޮށް ކަމަށް އެ ނޫހުގައިވެއެވެ.
ރޮއިޓާސްގައިވާ ގޮތުން ރޯވިއިރު ބޯޓުގައި 169 ފަސިންޖަރުންނާއި ހަ ކުރޫއިން ތިއްބެވެ. އެ އެންމެން ވެސް ރައްކާތެރިކަމާއެކު ބޯޓުން ފޭބި ކަމަށާއި، ނަމަވެސް އެކަކަށް ކުދި އަނިޔާތަކެއް ލިބުމާ ގުޅިގެން ހޮސްޕިޓަލަށް ގެންދިޔަ ކަމަށް ބޫސާންގެ އޮފިޝަލުން ވިދާޅުވިއެވެ.
ދެކުނު ކޮރެއާގެ މީޑިއާތަކުން ވަނީ ބޯޓު ރަންވޭ މަތީގައި އޮއްވައި އަލިފާން ނިއްވާލާފައިވާ މަންޒަރު ފެންނަ ފޮޓޯތަކާއި ވީޑިއޯތައް ހިއްސާކޮށްފައެވެ.
އަލިފާން ނިއްވުމުގައި ހަރަކާތްތެރިވި ފަރާތްތަކާ ހަވާލާދީ ރޮއިޓާސްގައިވާ ގޮތުން ރޯވީ މަތިންދާބޯޓުގެ އެތެރޭގައެވެ.
ފްލައިޓްރޭޑާ24އިން ދައްކާ ގޮތުގައި އެ ބޯޓަކީ އެއާބަސް އޭ321 މޮޑެލްއެކެވެ.
އެއާބަސް ކުންފުނިން ވަނީ އެ ހާދިސާގެ މައުލޫމާތު ލިބިފައިވާ ކަމަށާއި އެއާ ބޫސާންއާ ވާހަކަ ދައްކަމުން އަންނަ ކަމަށް ބުނެފައެވެ.
ދެކުނު ކޮރެއާގައި އެ ހާދިސާ ހިނގައިފައިވަނީ، އެ ގައުމުގައި މިހާތަނަށް ހިނގި އެންމެ ނުރައްކާތެރި ވައިގެ އެކްސިޑެންޓަށް މަހެއް ވާން އުޅެނިކޮށެވެ.
މިދިޔަ ޑިސެމްބަރު މަހުގެ 29ގައި ހިނގި އެ ހާދިސާގައި ޖެޖޫ އެއާގެ މަތިންދާބޯޓެއް، ދެކުނު ކޮރެއާގެ މުއާން އިންޓަނޭޝަނަލް އެއާޕޯޓަށް ޖައްސަން އުޅުމުގެ ތެރޭގައި ވެއްޓި އަލިފާން ރޯވިއެވެ. އެ ހާދިސާގައި، އެ ބޯޓުގައި ތިބި 181 މީހުންގެ ތެރެއިން އެންމެ ދެ މީހަކު ފިޔަވައި އެންމެން ވަނީ މަރުވެފައެވެ.