ކުޅުދުއްފުށި ސިޓީގައި ކުޑަކުއްޖަކު ޕިކަޕެއް ދުއްވަނިކޮށް އެކްސިޑެންޓުވުމުން، ފުލުހުން އެ މައްސަލަ ބަލަން ފަށައިފިއެވެ.
ކުޅުދުއްފުށީގައި ބާރު ސްޕީޑުގައި ދުއްވާފައި ދިޔަ ޕިކަޕެއް، އެ ސިޓީގެ އެއާޕޯޓުގެ ފެންސުގައި ޖެހިފައިވާ ކަމަށް ބުނެ، ސޯޝަލް މީޑިއާގައި އަންނަނީ ވީޑިއޯއެއް ދަައުރުވަމުންނެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، އެ ވީޑިއޯ ފުލުހުންގެ ސަމާލުކަމަށް އައިސްފައިވާ ކަމަށެވެ.
އެ މައްސަލައާ ގުޅިގެން މިހާތަނަށް ބެލިބެލުމުން ޕިކަޕް ދުއްވާފައިވަނީ 18 އަހަރު ނުފުރޭ ކުޑަކުއްޖެއްކަން އެނގިފައިވާ ކަމަށް ފުލުހުން ބުންޏެވެ.
އެ މައްސަލަ ތަހުގީގު ކުރަން ފަށައިފައިވާއިރު، ފުލުހުން ވަނީ ޕިކަޕް ޓޯކޮށްފަައެވެ.
ސޯޝަލް މީޑިއާގައި ދައުރުވަމުން އަންނަ ވީޑިއޯއިން، ޕިކަޕް ކޮންޓްރޯލް ނުވެގެން ގޮސް ފެންސެއްގައި ޖެހޭ މަންޒަރު ފެނެއެވެ. އަދި ފިރިހެނަކު ޕިކަޕުން ފައިބައި އުޅަނދުގެ ހާލަތު ބަލަން ހުއްޓައި، ކުޑަކުއްޖަކު ވެސް ޕިކަޕުން ފައިބާ މަންޒަރު ފެނެއެވެ.
އެއަށްފަހު ޕިކަޕުގައި ހިފައި ފަހަތަށް ޖައްސައި، ބޮޑު މީހާއާއި ކުއްޖާ ޕިކަޕަށް އަރައިގެން ދުއްވާފައިދާ މަންޒަަރު ވީޑިއޯއިން ފެނެއެވެ.