ނޫސްވެރިކަމާއި އިންޓަނެޓްގެ ވަސީލަތްތައް ރެގިއުލޭޓްކުރަން ބިލެއް ތައްޔާރުކުރައްވަމުން ގެންދެވި ނަމަވެސް އޭގެ ބޭނުމަކީ މިހާރުގެ ނިޒާމުގައި ހުރި މައްސަލަތަކަށް ހައްލު ގެނެސް ރިފޯމްކުރުން ކަމަށާއި، ބާރުތައް ހަނިކުރުން ނޫންކަމަށް ރައްޔިތުންގެ މަޖިލީހުގެ ނައިބު ރައީސް އަދި ޕީއެންސީގެ މެންބަރު އަހުމަދު ނާޒިމް މިރޭ ވިދާޅުވެއްޖެއެވެ.
ސަން އޮންލައިންގެ "އެޑިޓަރުގެ ސުވާލު" ޕްރޮގްރާމްގައި ވާހަކަ ދައްކަވަމުން ނާޒިމް ވަނީ، ނޫސްވެރިކަމާއި އިންޓަނެޓްގެ ވަސީލަތްތައް މިހާރު އޮންނަ ނިޒާމުގެ ތެރެއިން ސެލްފް ރެގިއުލޭޓްނުކުރެވޭ ކަމަށެވެ. އެހެންވެ، އެކަމާ ގުޅުން ހުރި ބިލެއްގެ މަސައްކަތް ކުރައްވާތާ ދެ މަހެއްހައި ދުވަސްވެއްޖެ ކަމަށް އޭނާ ވިދާޅުވިއެވެ.
ރާއްޖޭގެ މީޑިއާތަކުގައި އެ ވަހަކަ ރިޕޯޓުކުރަން ފެށުމާއެކު ސަރުކާރުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، ނޫސްވެރިކަމާއި އިންޓަނެޓް ރެގިއުލޭޓް ކުރާ ބިލެއް ތައާރަފު ކުރާން ސަރުކާރުން އެެއްވެސް މަސައްކަތެއް ނުކުރާ ކަމަށާއި އެއީ ސަރުކާރުން ހުށަހަޅަން ނިންމައިފައިވާ ބިލުތަކުގެ ތެރޭގައި ހިމެނޭ ބިލެއް ނޫން ކަމަށެވެ.
ހީނާ ވިދާޅުވީ މި ސަރުކާރުން އެންމެ ފުރަތަމަ ދުވަހުން ފެށިގެން ވެސް އެންމެ އިސްކަންދޭ ސިޔާސަތަކީ މީޑިއާގެ މިނިވަންކަން އެންމެ ފުޅާ ދާއިރާއެއްގައި ގާއިމުކޮށް ދެމެހެއްޓުން ކަމަށެވެ.
މީޑިއާތަކުން އެ ވާހަކަ މާނަކުރީ އޮޅުން އަރައިފަދަ ގޮތަކަށްކަން ފާހަގަކުރައްވައި، އެ ކަން ސާފުކޮށްދެއްވުމުގެ ގޮތުން ނާޒިމް އެކްސްގައި ނެރުއްވި ބަޔާނެއްގައި ވިދާޅުވީ ރާއްޖޭގައި މީޑިއާތައް ރެގިއުލޭޓްކުރަން ދެ މުއައްސަސާއެއް އޮތް ނަމަވެސް އެ ދެ މުއައްސަސާ ވެސް ރަނގަޅަށް މަސައްކަތްނުކުރާކަން މީޑިއާތަކުން ވެސް ގަބޫލުކުރާނެ ކަމަށެވެ.
"އެހެންވެ އަޅުގަނޑުގެ މަގްސަދަކީ މިފަދަ ދޯހަޅި ގޮތްގޮތަކަށް ހުރި މުއައްސަސާތައް ރިފޯމްކުރުމެވެ،" ނާޒިމްގެ ބަޔާނުގައިވެއެވެ.
މީގެ އިތުރުން މިހާރު ސޯޝަލް މީޑިއާގެ އެކި މަންސަތައް ޒުވާނުން ބޭނުންކުރާ މިންވަރު އިތުރުވެފައިވާއިރު، މުނިފޫހިފިލުވުމާއި، އާމްދަނީ ހޯދުމާއި، ޝުއޫރުތައް ފާޅުކުރާ އެންމެ ވަރުގަަދަ ތަނަކީ ސޯޝަލް މީޑިއާއަށް ވެފައިވާކަމަށް ނާޒިމް ވިދާޅުވިއެވެ.
އެހެންވެ އެ މަންސަތައް ރެގިއުލޭޓްކުރުމަކީ މުހިންމު ކަމެއްކަމަށް ހުރިހާ އެންމެން ވެސް އެއްބާސްވާނެކަމަށާއި، އެއީ އެއްވެސް މިންވަރަކަށް އެ ފަދަ މަންސަތައް ބްލޮކްކޮށް ނުވަަތަ މީޑިއާގެ މިނިވަންކަން ނިގުޅައިގަތުން ނޫންކަމަށް ނާޒިމް ވިދާޅުވިއެވެ.
"މިފަދަ މަންސަތައް ބޭނުންކުރެވޭއިރު، އަނެކާގެ އަބުރާއި، އިއްޒަތް ވެސް އެއީ އޮންނާނެ އެއްޗެއްކަން ދެެނެގަންނަން އެބަޖެހެއެެވެ. އަނިޔާ ލިބޭ ފަރާތުން، އިންސާފު ހޯދުމަށް ދޮރުގައި ޓަކިޖަހާއިރު، އިންސާފު ހޯދަައިދިނުމަށް އޮންނާނެ ވަސީލަތަކީ ކަޅާއިހުދުން ލިޔެފައި އޮންނަ ގާނުނުކަމާއި، އަދި މިވަގުުތު އެފަދަ ގާނޫނެއް ދިވެހިރާއްޖޭގައި ނެތްކަން އެއީ ދެބަސްވެވެން ނެތް ހަގީގަތެކެވެ،" އެ ބަޔާނުގައިވެއެވެ.
އެއާއެކު ނާޒިމް ވަނީ އޭނާއަކީ އެއްވެސް ޒަމާނެއްގައި މީޑިއާއާ ދެކޮޅު ބޭފުޅެއް ނޫންކަމަށާއި، މީޑިއާގެ މިނިވަންކަމަށް ހުރަސް އަޅުއްވާނެ މީހެއް ނޫންކަމަށް ވެސް ވިދާޅުވެފައެވެ. އެ ފަަދަ ކަމަކަށް ދުވަހަކު ވެސް ތާއީދުނުކުރައްވާނެ ކަމަށް ނާޒިމް ވިދާޅުވިއެވެ.