ހުރިހާ މީޑިއާތަކުން ވެސް ޒިންމާދާރު ގޮތުގައި، ކަމަށް ކަމޭހިތައިގެން ނޫސްވެރިކަން ކުރެއްވުމަށް ރައީސްގެ އަނބިކަނބަލުން ސާޖިދާ މުހައްމަދު މިއަދު ގޮވާލައްވައިފިއެވެ.
އެ ކަމަނާ މިހެން ގޮވައިލެއްވީ ބްރޯޑްކާސްޓިން ދުވަހާ ގުޅިގެން ބްރޯޑްކާސްޓިން ކޮމިޝަން (ބްރޯޑްކޮމް)އިން ބޭއްވި "ވިޝަންސް އޮފް ދަ ފިއުޗާ" ކުރެހުމުގެ މުބާރާތުގެ އިނާމު ދިނުމުގެ ޖަލްސާގައި ވާހަކަފުޅުދައްކަވަމުންނެވެ.
ސާޖިދާގެ ވާހަކަފުޅުގައިވަނީ ޒިންމާދާރު ނޫސްވެރިކަމެއް ކުރުމުގެ އިތުރުން، މީޑިއާގައި ބޭނުންކުރާ ކޮންޓެންޓަކީ ބަހުގެ ހަމަތަކާ އެއްގޮތަށް ތައްޔާރު ކުރެވޭ އެއްޗަކަށް ހެދުމަށް އެދިވަޑައިގެންފައެވެ. އަދި ވަކީން ޚާއްސަކޮށް، މުޖުތަމައުގައި ހީނަރުވަމުންދާ އިޖުތިމާއީ ފޭރާން ރަނގަޅުކޮށް، އާރޯކަން ގެނެސްދިނުމަށް އެދިވަޑައިގަތެވެ.
މި ޒަމާނުގައި ވެސް ޓީވީ އަދި ރޭޑިއޯއަކީ ޚަބަރު ފެތުރުމުގައި މުހިންމު ދައުރެއް އަދާކުރާ ވަސީލަތްތަކެއްކަން ފާހަގަ ކުރައްވައި، އަންނަން އޮތް ޖީލުތަކަށް އެ ވަސީލަތްތަކުގެ މުހިންމުކަން އަންގައިދިނުމުގެ މުހިންމުކަން ވެސް އެ ކަމަނާ ފާހަގަކުރެއްވިއެވެ.
އެ ގޮތުން ކުޑަކުދިންނަށް އެކަށީގެންވާ ޕްރޮގްރާމްތައް އަޑުއަހައި ބެލުމަށް، ބެލެނިވެރިން އެ މީހުންގެ ދަރިންނަށް ހިތްވަރު ދިނުމަކީ މުހިންމު ކަމެއްކަން ސާޖިދާ ފާހަގަ ކުރެއްވިއެވެ. ސާޖިދާ ވިދާޅުވީ އެއީ އެ ކުދީން ދިވެހިބަހަށް ހޭނުމާއި ލޯބި ކުރުމަށް ބާރުއަޅާނެ ކަމަކަށް ވާނެކަމަށެވެ.
"ދިވެހި ބްރޯޑްކާސްޓަރުން ރޭޑިއޯއިން ޖުވަތަ ޓީވީން ފޮނުވާ ކޮންޓެންޓް، ނުވަތަ އެކިއެކި ބައިތަކުން ދިވެހި ބަހާއި ސަގާފަތާއި ދިވެހިރާއްޖޭގެ ތާރީޚީ ޞަފުހާތައް ހާމަވެ، އާދަކާދަތައް އަދި ތަރިކަތައް ދަސްކުރުމުގެ ފުރުސަތު ހުޅުވައިގެންދޭ. އެ ފަދަ އަދަބީ ކޮންޓެންޓުގެ ސަބަބުން ދަރިވަރުންގެ ދިބެހިބަހުގެ އަދަބީ ފެންވަރަށް ހެޔޮ އަސަރުކުރާނެކަން ހަމަ ޔަގީން،" ސާޖިދާ ވިދާޅުވިއެވެ.
އެ ކަމަނާގެ ވާހަކަފުޅުގައި، ބްރޯޑްކާސްޓިން ދާއިރާއިން ރާއްޖޭގައި އަދާކޮށްފައިވާ މުހިންމު ދައުރުގެ މައްޗަށް އަލިއަޅުއްވާލައްވައި ވާހަކަފުޅު ދެއްކެވިއެވެ.
އެގޮތުން ސާޖިދާ ވިދާޅުވީ އެއީ ރާއްޖޭގައި ވަރަށް ފަޚުރުވެރި ޚިދުމަތެއް ކަމަށެވެ. ސާޖިދާ ސިފަ ކުރެއްވި ގޮތުގައި، ގޮތުން ބްރޯޑްކާސްޓިން ދާއިރާއަކީ ދުރުދުރުގައި، މާ ކަނޑެއްގެ އުސް ރާޅުގެތަކުގެ ނިވަލުގައި އެތުރިފައިވާ ރަށްތައް ގުޅުވައިލައިދިން ގައުމީ ބަދަހިކަމުގެ އަގުހުރި ޚާދިމެކެވެ.
ބްރޯޑްކާސްޓިން ދާއިރާއިން ރައްޔިތުންނަށް ދީނީ މައުލޫމާތުގެ އިތުރުން، ގައުމިއްޔަތާއި، ރިވެތި އަޚުލާގުގެ އިތުރުން، ބަހާއި ތަރިކަ ދަސްކޮށްދިނުމާއި، ޚަބަރު ފޯރުކޮށްދިނުމުގައި އަދާކުރާ މުހިންމު ދައުރު އެ ކަމަނާ ފާހަގަކުރެއްވިއެވެ.
އެ ކަމަނާގެ ވާހަކަފުޅު ނިންމަވައިލެއްވީ ބްރޯޑްކާސްޓިން ދާއިރާ އިތުރަށް ފުޅާވެ، ތަނަވަސްވެގެން ދިއުމަށް އެދިވަޑައިގަންނަވަމުންނެވެ.