ފުވައްމުލަކު ސިޓީއަށް ބޯޓެއްގައި މަސްތުވާތަކެތި ގެންދިޔަ ކަމަށް ތުހުމަތުވާ މައްސަލައެއްގައި މިއަދު ހައްޔަރުކުރި ދިވެހި އަންހެން މީހާ ދޫކޮށްލައިފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، ފުލުހުންގެ އިންޓެލިޖެންސްއަށް ލިބުނު މައުލޫމާތަކާ ގުޅިގެން ފުވައްމުލަކުގައި އޮޕަރޭޝަނެއް ހިންގި ކަމަށެވެ.
އެ އޮޕަރޭޝަނުގައި، ފުވައްމުލަކަށް ބޯޓަކުން ގެނައި ފޮށިގަނޑެއް ބަލައި ފާސްކުރިއިރު މަސްތުވާތަކެތި ކަމަށް ޝައްކު ކުރެވޭ އެއްޗެއް ފެނުނު ކަމަށް ފުލުހުން ބުންޏެވެ.
އެ މައްސަލައާ ގުޅިގެން މިއަދު ހެނދުނު 10:45 ހާއިރު 40 އަހަރުގެ ދިވެހި އަންހެނަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ނަމަވެސް އެ މައްސަލައާއި އަންހެން މީހާއާ ގުޅުމެއް ނެތްކަން ޔަގީންވާތީ މިހާރު ދޫކޮށްލައިފައިވާކަމަށް ބުންޏެވެ.