މިހާތަނަށް ނެރުނު އެންމެ މަގުބޫލު އެއް ކޮރިއަން ފިލްމު ކަމަށްވާ "ޕެރަސައިޓް"ގެ ޑައިރެކްޓަރު ބޮންގް ޖޫން ހޯގެ ހޮލީވުޑް ފިލްމު ޑިލޭއަށް ފަހު އަންނަ މާޗު މަހުގައި ދައްކަން ފެށުމަށް ތައްޔާރުވެއްޖެ އެވެ.
ހޯގެ އާ ފިލްމަކީ ހޮލީވުޑްގެ ބޮޑެތި ތަރީންނާއެކު ތައްޔާރުކުރާ ވަރުގަދަ ފިލްމެކެވެ. "މިކީ 17" ނަމަކަށް ކިޔާ ފިލްމަކީ ކޮރިއަން ޖާންރާގެ ބޭރުން ސައިންސް ފިކްޝަން ޖާންރާގެ ފިލްމެކެވެ.
މަޝްހޫރު ހޮލީވުޑް ތަރި ރޮބާޓް ޕެޓިންސަން ލީޑުން ފެންނަ މި ފިލްމު އެންމެ ފުރަތަމަ އިއުލާނު ކޮށްފައިވަނީ 2022ވަނަ އަހަރުއެވެ. ފިލްމު އިއުލާނު ކުރުމަށް ފަހު 2023ވަނަ އަހަރު އިއުލާނު ކޮށްފައި ވަނީ މިދިޔަ އަހަރުގެ ތެރޭގައި ފިލްމު ރިލީޒް ކުރާނެ ކަމަށެވެ. ނަމަވެސް އެންމެފަހުން ފިލްމު ޑިލޭ ކުރީ މިއަހަރަށެވެ.
މިހާރު ފިލްމުގެ ޕްރޮމޯޝަނަލް މަސައްކަތް ކުރިއަށްދާއިރު އެކި ޕްރިމިއާ އިވެންޓުތައް ވެސް ދަނީ ބާއްވަމުންނެވެ. މިހާރު ތާވަލު ކޮށްފައިވާ ގޮތުގައި މާޗު މަހުގެ ހަތްވަނަ ދުވަހު ފިލްމު ޕްރިމިއާ ކުރާނެއެވެ.
މިކީ 17 އަކީ ސައިންޓިސްޓުންގެ ގްރޫޕެއް އާ ޕްލެނެޓެއް ބަލައި އެ ތަނަށް ދިރިއުޅުން ބަދަލު ކުރުމަށް މަސައްކަތް ކުރާތަން ދައްކައިދޭ ފިލްމެކެވެ. މި ބަދަލުގެ ތެރޭގައި ދިމާވާ އާދަޔާ ހިލާފު ކަންތައްތައް ފިލްމުން ފެނިގެންދާނެއެވެ. ފިލްމުގައި ޕެޓިންސަންގެ އިތުރުން ޓޯނީ ކޮލެޓް އާއި ސްޓީވެން ޔޫން ފަދަ ބޮޑެތި އެކްޓަރުން ހިމެނޭނެއެވެ.
ސައިންސްފިކްޝަންގެ އިތުރުން ކޮމެޑީގެ ރަހަތަށް ހިމެނޭ މި ފިލްމަކީ ގިނަ ބަޔަކު އިންތިޒާރު ކުރަމުން އަންނަ ފިލްމެކެވެ. އަދި ހޯގެ ޑައިރެކްޝަންގެ ދަށުން ނެރޭ ފިލްމަކަށް ވާތީ މި ފިލްމަކީ މޮޅު ފިލްމަކަށް ވާނެ ކަމަށް ވެސް އެތައް ބަޔަކު އަންނަނީ ބުނަމުންނެވެ.