އިނގިރޭސި ޕްރިމިއާ ލީގުގައި އެންމެ ފަހުގެ ޗެމްޕިއަން މެންޗެސްޓާ ސިިޓީން ފަސޭހަކަމާ އެކު އިޕްސްވިޗް ބަލިކޮށްފިއެެވެ.
އިޕްސްވިޗްގެ ދަނޑުގައި ކުޅުނު މި މެޗު ސިޓީން ކާމިޔާބުކޮށްފައިވަނީ 6-0 އިންނެވެ.
މިއީ މިސީޒަންގައި ޕްރިމިއާ ލީގުގައި ސިޓީއަށް މިހާތަނަށް ނެރެވުނު އެންމެ ތަފާތު ބޮޑު ނަތީޖާއެވެ. ސިޓީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅުމުގެ އިތުރުން ގިނަ ހަމަލާ އުފައްދާފައިވަނީ ވެސް ސިޓީންނެވެ.
މެޗުގައި ސިޓީން ކާމިޔާބުކުރި ފުރަތަމަ ލަނޑު މެޗުގެ 27 ވަނަ މިނެޓުގައި ކާމިޔާބުކޮށްފައިވަނީ ފިލް ފޯޑެންއެވެ. މި ލަނޑު ޖެހިތާ ތިން މިނެޓު ފަހުން ފޯޑެން ތަނަވަސްކޮށްދިން ފުރުސަތެއްގައި މަޓިއޯ ކޮވަސިޗްވަނީ އެ ޓީމުގެ ލީޑު ފުޅާކޮށްދީފައެވެ.
މެޗުގައި ސިޓީގެ ތިންވަނަ ލަނޑު ފުރަތަމަ ހާފު ނިމެން ތިން މިނެޓަށް ވެފައިވަނިކޮށް ކާމިޔާބުކޮށްދިނީ ފުރަތަމަ ލަނޑު ވެސް ޖަހައިދިން ފޯޑެންއެވެ.
ދެވަނަ ހާފު ސިޓީން ފަށާފައިވަނީ ފުރަތަމަ ހާފު ނިންމާލި ހިސާބުންނެވެ. ކުޅުން ފެށިތާ ހަތަރުވަނަ މިނެޓުގައި ޖެރެމީ ޑޯކޫވަނީ އެ ޓީމުގެ ހަތަރުވަނަ ލަނޑު ކާމިޔާބުކޮށްދީފައެވެ. މެޗުގައި ސިޓީގެ ފަސްވަނަ ލަނޑު މެޗުގެ 57 ވަނަ މިނެޓުގައި ކާމިޔާބުކޮށްދިނީ ދާދި ފަހުން ނުވަ އަހަރަށް ވުރެ ދިގު އެއްބަސްވުމެއްގައި ސިޓީއާ އެކު ސޮއިކުރި އާލިން ހާލަންޑެވެ. މިއީ މި ފަހަރު ލީގުގައި އޭނާ ކާމިޔާބުކުރި 17 ވަނަ ލަނޑެވެ. މިއާއެކު އޭނާ މިވަނީ ލަނޑު ލިސްޓްގެ އެއްވަނައިގައި އޮތް ލިވަޕޫލްގެ މުހައްމަދު ސަލާހާއި އެއް ލަނޑަށް ގާތްކޮށްފައެވެ.
މިދިޔަ ދެ ސީޒަންގައި ވެސް ލީގުގައި އެންމެ ގިނަ ލަނޑު ޖަހާފައިވަނީ ހާލަންޑެވެ. މެޗުގައި ސިޓީގެ ފަހު ލަނޑު މެޗުގެ 69 ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިޔާ ޖޭމްސް މެކަޓީއެވެ.
މި ކާމިޔާބަށް ފަހު ސިޓީ ވަނީ ހަތަރުވަނައަށް ކުރިއަށް ޖެހިލާފައެވެ. އެއީ، ކުޅުނު 22 މެޗުން ލިބިފައިވާ 38 ޕޮއިންޓާ އެކުއެވެ. އިޕްސްވިޗް އޮތީ 16 ޕޮއިންޓާ އެކު 18 ވަނައިގައެވެ.
މުބާރާތުގައި ތިންވަނައިގައި އޮތް ނޮޓިންހަމް ފޮރެސްޓާއި ސައުތެމްޕްޓަން ބައްދަލުކުރި މެޗު 3-2 އިން ކާމިޔާބުކޮށްފައިވަނީ ފޮރެސްޓެވެ. މެޗުގައި ފޮރެސްޓްގެ ތިން ލަނޑު އެ ޓީމަށް ކާމިޔާބުކޮށްދިނީ އެލިއޮޓް އެންޑަސަން، ކެލުމް ހަޑްސަން އޮޑޯއި އަދި ކްރިސް ވުޑެވެ. ސައުތެމްޕްޓަންއިން މެޗުގެ ދެވަނަ ހާފުގައި ރަނގަޅު ކުޅުމެއް ދެއްކި ނަމަވެސް އެ ޓީމަށް ކާމިޔާބުކުރެވޭގޮތްވީ ދެ ލަނޑެވެ. ދެ ލަނޑު އެ ޓީމަށް ކާމިޔާބުކޮށްދިނީ ޔާން ބެޑްނަރެކް އަދި ޕޯލް އޮނުއަޗޫއެވެ.
މި ކާމިޔާބީއާ އެކު ފޮރެސްޓް މިހާރު ވަނީ 44 ޕޮއިންޓާ އެކު ދެވަނައިގައި އޮތް އާސެނަލާ ޕޮއިންޓްގެ ގޮތުން ހަމަކޮށްފައެވެ. ސައުތެމްޕްޓަން އޮތީ ހަ ޕޮއިންޓާ އެކު އެންމެ ފުލުގައެވެ.