ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ރޯދައަށް ގޭބިސީތަކަށް ހިލޭ ބަހާ މަސްދަޅުން 40 ގްރާމް މަސް އުނި ނުކުރާކަމަށް މޯލްޑިވްސް އިންޑަސްޓްރިއަލް ފިޝަރީސް ކޮމްޕެނީ (މިފްކޯ)އިން މިއަދު ބުނެފިއެވެ.
ރޯދައަށް ހިލޭ ބަހާ މަސްދަޅުތަކުން 40 ގްރާމް މަސް އުނިކޮށްފައިވާ ކަމަށް ބުނެ، ބައެއް ފަރާތްތަކުން އަންނަނީ މީސްމީޑިއާގައި ނުރުހުން ފާޅުކުރަމުންނެވެ.
މިފްކޯއިން އެކްސްގައި ކުރި ޕޯސްޓްއެއްގައި ބުނީ، ގޭބިސީތަކަށް ހިލޭ ބަހާ މަސްދަޅުން 40 ގްރާމް މަސް އުންނިކޮށްފައިވާކަމަށް ފަތުރަމުން ދަނީ ދޮގު ވާހަކަތަކެއް ކަމަށާއި 140 ގްރާމްގެ މަސް ދަޅު ބާޒާރަށް ނެރުނީ ކުދި ގޭބިސީތަކަށް އަދި އެއްފަހަރު ބޭނުންކުރެވޭ އެއްޗެއްގެ ގޮތުގައި ކަމަށެވެ. އެއީ، މަސް ދަޅު ފްރިޖު ކުރުމަކީ ރަނގަޅު ކަމަކަށް ނުވާތީ ކަމަށެވެ.
މިހާރު މިފްކޯގެ ސީއީއޯގެ މަގާމުގައި ހުންނަވަނީ ޔޫކްރެއިންގެ ރައްޔިތެއް ކަމަށްވާ ލްޔުބިމޯވްއެވެ. މިފްކޯއަކީ ފައިދާނުވެ، ގެއްލުމުގައި ހިންގާތާ ދިގު މުއްދަތެއް ވެފައިވާ ކުންފުންޏެކެވެ.
މިފްކޯއަކީ 1993ގެ އަހަރުތަކުގެ ކުރީކޮޅު އޭރުގެ މަސް ކުންފުނި އެފްޕީއައިޑީގެ ނަން ބަދަލުކޮށް، އުފެއްދި ދަރަންޏަށް ޒިންމާވާ ވަކި ކުންފުންޏެކެވެ.
މި ސަރުކާރުން ވަނީ މަސްވެރިކަމުގެ ދާއިރާ ހަރުދަނާކޮށް ކުރިއަށް ގެންދިޔުމުގެ މަގުސަދުގައި، މިފްކޯއަކީ 100 ޕަސެންޓު ސަރުކާރު ކުންފުންޏަކަށް ބަދަލުކޮށްފައެވެ.