ހުޅުމާލޭ ދެވަނަ ފިޔަވަހީގައި ހުރި ޓްރާންސްފޯމަރަކުން މީހަކު ވައްކަން ކުރަނިކޮށް، އެ ތަނަށް ދިޔަ ސްޓެލްކޯގެ މުވައްޒަފުގެ ބޯފަޅައިލާ އަނިޔާކުރުން ހަރުކަށި އިބާރާތުން ކުށްވެރިކުރާ ކަމަށާއި އެ ކަން ވަރަށް ސީރިއަސް ކަމާއެކު ބަލާނެ ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ މިރޭ ވިދާޅުވެއްޖެއެވެ.
"ސަން"އާ ވާހަކަދައްކަވަމުން ފަހުމީ މިރޭ ވިދާޅުވީ، މިރޭ 10:30 ހާއިރު އެމްޕީއެލް ޓަވަރުތަކުން ކެނޑިގެން އެ ކުންފުނީގެ މުވައްޒަފުން ޓްރާންސްފޯމަރުތައް ހުންނަ ތަނަށް ދިޔަ ކަމަށެވެ.
އޭރު ދިޔައިރު ޓްރާންސްފޯމަރުތަކުން ވައްކަން ކުރަން އުޅުނު ދެ މީހަކު ސްޓެލްކޯގެ މުވައްޒަފުންނަށް ފެނުނު ކަމަށާއި އޭގެތެރެއިން އެކަކު ސްޓެލްކޯގެ މުވައްޒަފަކަށް ރެންޗަކުން ހަމަލާދީފައިވާ ކަމަށް ފަހުމީ ވިދާޅުވިއެވެ.
އޭނާގެ ބޯ ފަޅައިގެން ގޮސް ވަރަށް ބޮޑަށް ލޭ އަންނަ ތަން ފެންނަ ފޮޓޮއެއް ފަހުމީ ހިއްސާކުރެއްވިއެވެ.
މި ކަމާ ގުޅިގެން ފަހުމީ މިރޭ އެކްސްގައި ވިދާޅުވީ، އެ ހަމަލާ ވަރަށް ހަރުކަށި އިބާރާތުން ކުށްވެރިކުރައްވާ ކަމަށެވެ. ބޮޑު ރެންޗަކުން ދިން އެ ހަމަލައަކީ މަރުން ނުވަތަ، އުމުރަށް މީހާ ނުކުޅެދޭފަދަ ހާލަތަކުން ކިރިޔާ ސަލާމަތްވި ހަމަލައެއް ކަމަށް ފަހުމީ ވިދާޅުވިއެވެ.
ފަހުމީ ވަނީ އެ މުވައްޒަފުގެ ފަރާތުން ދެއްކި ހިތްވަރުގެ އަގު ވަޒަންކުރާނެކަމުގެ ޔަގީންކަން ދެއްވައިފައެވެ. އަދި އެ ކުންފުނީގެ އެއްވެސް މުވައްޒަފަކަށް ދިމާވާ ކޮންމެ ނުރައްކަލެއް ވެސް ބަލައި، އެ ކަންކަން ވަރަށް ސީރިއަސްކަމާއެކު ބަަލައި ފިޔަވަޅު އަޅުއްވާނެ ކަމަށް ވިދާޅުވިއެވެ.
ޓްރާންސްފޯމަރުތަކުން ވައްކަންކުރުން މިހާރުވަނީ ވަރަށް އާންމު ކަމަކަށް ވެފައެވެ. މިދިޔަ ހޮނިހިރު ދުވަހުގެ ފަތިހު ވެސް ޓްރާންސްފޯމަރަކުން ވަނީ ވައްކަންކޮށްފައެވެ.
ފަހުމީ ވިދާޅުވި ގޮތުގައި، ހުޅުމާލޭ ދެވަނަ ފިޔަވަހީގައި ބަހައްޓާފައި ހުރި ޓްރާންސްފޯމަރުތަކަކީ އެ ކުންފުނިން ކުރިއަށް ގެންދިޔަ ޕްރޮޖެކްޓެއްނޫން ކަމުން، އެ ތަންތަނުގައި ސީސީޓީވީ ނެތް ކަމަށެވެ.
އެހެންވެ، މިހާރުގެ އެޗްޑީސީގެ މެނޭޖުމަންޓާ ގުޅިގެން އެ ތަނުގައި ސީސީޓީވީ ފުޓޭޖް ބެހެއްޓުުމުގެ މަސައްކަތް ކުރަމުން އަންނަކަން އޭނާ ފާހަގަކުރެއްވިއެވެ.