ރޯދައަށް އިތުރު 17 މެގަވޯޓުގެ ކަރަންޓު އުފެއްދޭ 12 ޖެންސެޓު މާލޭ ސަރަހައްދުގައި ބަހައްޓަނީ

ރޯދަ މަހަށް މާލެ ސަރަހައްދުގައި އިތުރު 17 މެގަވޯޓުގެ ކަރަންޓު އުފެއްދޭ 12 ޖެންސެޓު ބަހައްޓަން ސްޓެލްކޯއިން މަަސައްކަތް ފަށައިފިއެވެ.

"ސަން"އަށް މައުލޫމާތު ދެއްވަމުން ސްޓެލްކޯގެ މީޑިއާ އޮފިޝަލަކު ވިދާޅުވީ ޖުމްލަ ސްޓެލްކޯއިން ގެނައީ 13 ޖެންސެޓު ކަމަށެވެ. ނަމަވެސް އޭގެ ތެރެއިން އެއް ޖެންސެޓު، އައްޑޫގެ ކަރަންޓު މައްސަލައަށް ހައްލު ގެނައުމަށް ފެނަކައަށް ދިނުމުން، މިވަގުތަށް މާލެ ސަރަހައްދުގައި އިތުރަށް ބަހައްޓަނީ 12 ޖެންސެޓުކަމަށް ވިދާޅުވިއެވެ.

އެއާއެކު މި ޖެންސެޓުތަކުން 17 މެގަވޯޓުގެ ކަރަންޓު އުފެއްދޭނެކަމަށް އޮފިޝަލް ވިދާޅުވިއެވެ.

މީގެ އިތުރުން އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ "ސަން"އަށް ވިދާޅުވީ، މިހާރު ހުޅުމާލޭގައި އާ އިންޖީނު ގެޔެއް އެޅުމުގެ މަސައްކަތް ކުރަމުން އަންނަ ކަމަށެވެ.

އަލަށް އިންސްޓޯލުކުރާ ޖެނަރޭޓަރުތައް ބަހައްޓާނީ އެ އިންޖީނު ގޭގައި ކަމަށާއި އެ މަސައްކަތް މިދިޔަ ބުރާސްފަތި ދުވަހު ފަށައިފައިވާ ކަމަށް އޭނާ ވިދާޅުވިއެވެ.

ޖެނެރޭޓަރާއެކު ޓްރާންސްފޯމަރު ބެހެއްޓުމާއި އެތަނަށް ބޭނުންވާ ފިއުލް ލައިން އެޅުމާއި ފިއުލް ޓޭންކް ބެހެއްޓުމުގެ މަސައްކަތް ކުރާނެ ކަމަށް ފަހުމީ ވިދާޅުވިއެވެ.

މީގެ އިތުރުން އެ ތަނުގައި ތިބޭ މުވައްޒަފުން ނަމާދު ކުރުމަށާއި ރޯދަ ވީއްލުމުގެ ކަންތައްތައް ކުރުމަށް ވެސް ޖާގަތައް ހެދުމުގެ މަސައްކަތް ކުރާ ކަމަށް ފަހުމީ ވިދާޅުވިއެވެ.

އޭނާ ވިދާޅުވީ ގާތްގަނޑަކަށް 17 މެގަވޯޓުގެ ކަރަންޓު އުފައްދާ އެ ޖެނެރޭޓަރުތައް ބެހެއްޓުމަކީ ބުރަ މަސައްކަތެއް ކަމަށާއި ނަމަވެސް އަށް ދުވަސްތެރޭ މަސައްކަތް ނިންމަން އަމާޒު ހިފައިފައިވާ ކަމަށެވެ.

އެ ޖެނެރޭޓަރުތަކާއެކު، ރޯދަ މަހުގެ ޑިމާންޑާ އެއްވަރަށް ކެޕޭސިޓީ އިތުރުކުރެވޭނެ ކަމަށް ވެސް އޭނާ ވިދާޅުވިއެވެ.

ރޯދަމަހަކީ އާންމު ގޮތެއްގައި ވެސް މާލެ ސަރަހައްދުގައި ކަރަންޓު ބޭނުންކުރާ މިންވަރު އެތައް ގުނައެއް އިތުރުވާ މަހެކެވެ. ޚާއްސަކޮށް ހޫނު މޫސުމާއި، ރޯދަ މަސް އެއް ދުވަސްވަރަކާ ދިމާވާތީ ވެސް ކަރަންޓު ބޭނުންކުރާ މިންވަރު އިތުރުވާން މަގުފަހިވެއެވެ.