ހުޅުމާލޭ ދެވަނަ ފިޔަވަހީގައި ހުރި ޓްރާންސްފޯމަރަކުން މީހަކު ވައްކަން ކުރަނިކޮށް، އެތަނަށް ދިޔަ ސްޓެލްކޯގެ މުވައްޒަފަކު އެކަން ހުއްޓުވަން އުޅުމުން އެ މުވައްޒަފަށް މިރޭ ރެންޗަކުން ހަމަލާދީފިއެވެ.
މިކަމާ ގުޅިގެން އިތުރު މައުލޫމާތު 'ސަން'އާ ހިއްސާކުރައްވައި ސްޓެލްކޯގެ މެނޭޖިން ޑިރެކްޓަރު ޙުސައިން ފަހުމީ ވިދާޅުވީ، މީގެ 30 މިނެޓު ކުރިން އެމްޕީއެލް ޓަވަރުތަކުން ކެނޑިގެން އެ ކުންފުނީގެ މުވައްޒަފުން ޓްރާންސްފޯމަރުތަކަށް ދިޔަ ކަމަށެވެ.
އޭރު ދިޔައިރު ޓްރާންސްފޯމަރުތަކުން ވައްކަން ކުރަން އުޅުނު ދެމީހަކު ސްޓެލްކޯގެ މުވައްޒަފުންނަށް ފެނުނު ކަމަށާއި އޭގެތެރެއިން އެކަކު ސްޓެލްކޯގެ މުވައްޒަފަކަށް ރެންޗަކުން ހަމަލާދީފައިވާ ކަމަށް ފަހުމީ ވިދާޅުވިއެވެ.
އެ ހަމަލާގެ ސަބަބުން ސްޓެލްކޯގެ މުވައްޒަފެއްގެ ބޯފަޅައިގެން ގޮސްގެން މިހާރު ހޮސްޕިޓަލުގައި ފަރުވާ ދެމުން އަންނަ ކަން ފަހުމީ ފާހަގަކުރެއްވިއެވެ.
އިތުރަށް ވާހަކަދައްކަވަމުން ފަހުމީ ވިދާޅުވީ، ވައްކަން ކުރަން އުޅުނު ދެ މީހުންގެ ތެރެއިން އެކަކު އަތުލައިގަނެވި ފުލުހުންނާ ހަވާލުކޮށްފައިވާ ކަމަށާއި އެކަމުގައި ބައިވެރިވި ދެވަނަ މީހާ ފިލާފައިވާ ކަމަށެވެ.
ޓްރާންސްފޯމަރަށް ވަރަށް ބޮޑަށް ގެއްލުންދީފައި ހުރީ. ވޭތުވެދިޔަ ތިން ދުވަސް ތެރޭ ޓްރާންސްފޯމަރަށް ހަމަލާދީ، ހަލާކުކޮށްލާފައި ވަނީ، ވަރަށް ބޮޑު އަދަދަކުން ގެއްލުންދީފައި ވަނީ
މީގެއި ތުރުން، މިފަދަ ހާދިސާތަކަކީ ވައްކަން ކުރާ މީހުންނަށާއި އާންމު ރައްޔިތުންނަށް ނުރައްކާތެރިކަން އޮތް ކަމެއް ކަން ފާހަގަކުރައްވައި، ފަހުމީ ވަނީ ވައްކަމުގެ މިފަދަ ހާދިސާއެއް ހިނގާކަން އެނގޭނަމަ ވީ އެންމެ އަވަހަށް ސްޓެލްކޯއަށް ނުވަތަ ފުލުހުންނަށް އެކަމެއް ރިޕޯޓުކުރުމަށް އެދިވަޑައިގެންފައެވެ.
ފަހުމީ ވިދާޅުވި ގޮތުގައި، ހުޅުމާލޭ ދެވަނަ ފިޔަވަހީގައި ބަހައްޓާފައި ހުރި ޓްރާންސްފޯމަރުތަކަކީ އެ ކުންފުނިން ކުރިއަށް ގެންދިޔަ ޕްރޮޖެކްޓެއްނޫން ކަމުން، އެ ތަންތަނުގައި ސީސީޓީވީ ނެތް ކަމަށެވެ.
އެހެންވެ، މިހާރުގެ އެޗްޑީސީގެ މެނޭޖުމަންޓާ ގުޅިގެން އެ ތަނުގައި ސީސީޓީވީ ފުޓޭޖް ބެހެއްޓުުމުގެ މަސައްކަތް ކުރަމުން އަންނަކަން އޭނާ ފާހަގަކުރެއްވިއެވެ.
ޓްރާންސްފޯމަރުތަކުން ވައްކަންކުރުން މިހާރުވަނީ ވަރަށް އާންމު ކަމަކަށް ވެފައެވެ.