އައްޑޫ ސިޓީގެ ގުޅިފައިވާ ރަށްތަކުން ކަރަންޓުގެ ޚިދުމަތް ކެނޑޭތާ ހަފުތާއަކަށްވުރެ ގިނަ ދުވަސް ވެފައިވާ ކަމަށާއި އެ މައްސަލައަށް އަދިވެސް ހައްލެއް ލިބިފައި ނުވާކަމަށް އެ ސިޓީގެ ކައުންސިލުން ބުނެފިއެވެ.
"ސަން"އަށް މައުލޫމާތު ދެއްވަމުން އައްޑޫ ސިޓީ ކައުންސިލްގެ ހިތަދޫ މެދު ދާއިރާގެ މެމްބަރު މުޙައްމަދު ޝުއާއު ވިދާޅުވީ އައްޑޫ ސިޓީން ކަރަންޓުގެ ޚިދުމަތް އިރުއިރުކޮޅާ ކެނޑެމުންދާތާ މިހާރު ހަފުތާއަކަށްވުރެ ގިނަދުވަސް ވެފައި ވާކަމަށެވެ.
އޭނާ ވިދާޅުވީ ކަރަންޓު ދެމުންދާ ދެ އިންޖީނެއް ހަލާކުވުމުގެ ސަބަބުން ލޯޑް ނުހިފަހައްޓާތީ އެކި ސަރަހައްދުތަކަށް ބަހައިގެން ކަރަންޓު ދެމުންދާކަމަށެވެ. ޝުއާއު ވިދާޅުވީ ހަލާކުވި ދެ އިންޖީނުގެ ތެރެއިން އެއް އިންޖީނު ފެނަކައިގެ މުވައްޒަފުން މަރާމާތު ކުރުމަށްފަހު އަނެއް އިންޖީނު މަރާމާތުކުރުމުގެ މަސައްކަތް މިހާރު ކުރަމުން އަންނަ ކަމަށެވެ.
"އައްޑުއަށް ބޭނުންވާ ވަރަށް ކަރަންޓު އުފެއްދޭނެ ކެޕޭސިޓީއެއް މިހާރު ފެނަކައަކު ނެތް. ދާއިމީ ހައްލެއް ލިބޭނެ ދުވަހެއް ޔަގީންކަމާ އެކީ އެއްވެސް ފަރާތަކަށް މައުލޫމާތެއް ނުދޭ،" އޭނާ ވިދާޅުވިއެވެ.
ޝުއާއު ވިދާޅުވީ އައްޑޫގައި ބޭނުންކުރަމުންދަނީ ޒަމާންވީ ބާ އިންޖީނުތައް ކަމަށާއި އަޕްގްރޭޑް ކުރުމުގެ މަޝްރޫއު ވެސް ފައިސާ ހަމަނުޖެހިގެން މަޑުޖެހިފައި ވާކަމަށެވެ. މިހާރު އައްޑޫގައި ކަރަންޓު ބޭނުންކުރާ ނިސްބަތް އިތުރުވަމުން އަންނައިރު، މި ސަރުކާރަށް އަހަރެއް ވީއިރުވެސް ކަރަންޓު ކެނޑުމުގެ މައްސަލަ ހައްލުކުރަން ކުރެވުނު މާބޮޑު ކަމެއް ނެތް ކަމަށް އޭނާ ވިދާޅުވިއެވެ.
"ކުރީގައި ފެއްޓިފަހުރި ޕަވާ ހައުސް އަޕްގްރޭޑް މަސައްކަތްވެސް ހުއްޓިފައި. އެތައް ރައްޔިތުންނެއް ބޭނުންކުރަމުންދާ އަގުބޮޑު މުދާ، އޭސީއާއި ރިފްރިޖިރޭޓަރު ފަދަ ތަކެތި ހަލާކު. އެ ރައްޔިތުން ކަނު އަނދިރީގައި ތިބުމާއެކީ މާލީ އެތަކެއް ގެއްލުމަކާ އެބަ ކުރިމަތިލާ. މިއަދުވެސް ދެ ގެއަކުން ގުޅި އޭސީ ހަލާކުވެގެން. އިއްޔެވެސް ހަމަ އެ ހާލެއްގައި،" ޝުއާއު ވިދާޅުވިއެވެ.
މީގެ އިތުރުން އެ މައްސަލަ ހައްލުނުވެ ހަފުތާއެއްވާއިރު ސަރުކާރުން ހަނު އޮތުމަކީ ހިތާމަކުރާ ކަމެއް ކަމަށް އޭނާ ވަނީ ވިދާޅުވެފައެވެ.
އައްޑޫ ސިޓީއަށް ކަރަންޓުގެ ޚިދުމަތް ފޯރުކޮށްދެމުން އަންނަ ފެނަކައިން މިރޭ ވަނީ މިމައްސަލަ ވީހާވެސް އަވަހަށް ހައްލުކޮށް ކަރަންޓުގެ ޚިދުމަތް އާންމު ހާލަތަށް ގެނައުމަށްޓަކައި މަސައްކަތް ކުރަމުން ދާނެކަމަށް ބުނެފައެވެ.
އެ މައްސަލަ ހައްލުކުރުމަށްޓަކައި ޖެންސެޓަށް ބޭނުންވާ ސްޕެއާ ޕާޓްސް ހޯދުމުގެ މަސައްކަތް ފެނަކައިން މިހާރުވެސް ކުރަމުން އަންނަ ކަމަށާއި ސްޕެއާ ޕާޓްސް ލިބި އެއް ޖެންސެޓުގެ މައްސަލަ މާދަމާ ހައްލުކުރެވޭނެ ކަމަށް ފެނަކައިން ވަނީ ބުނެފައެވެ.
އަދި ސްޕެއާ ޕާޓްސް ލިބުނުހާ އަވަހަކަށް ދެންހުރި ޖެންސެޓުތަކުގެ މައްސަލަ ހައްލުކުރުމުގެ މަސައްކަތް ކުރާނެ ކަމަށް ފެނަކައިން ވަނީ ބުނެފައެވެ.
"މި މައްސަލަ ފުރިހަމައަށް ހައްލު ކުރެވެންދެން ކަރަންޓު ލޯޑު ހިފެހެއްޓުމަށް ޓަކައި ގުޅިފައިވާ ރަށްތަކުގެ އެކި ސަރަހައްދުތަކުން، އެކުލަވާލެވޭ ތާވަލާ އެއްގޮތަށް ކަރަންޓު ކެނޑުމަށް ހަމަޖެހިފައިވާކަން ވެސް މައުލޫމާތަށްޓަކައި ދަންނަވަމެވެ." އެ ބަޔާނުގައިވެއެވެ.
އައްޑޫ ސިޓީގެ ގުޅިފައިވާ ރަށްތަކަށް ކަރަންޓުގެ އިތުރުން ފެނުގެ ޚިދުމަތް މެދުކެނޑުމުގެ މައްސަލަ ވެސް ދޭތެރެއަކުން ދިމާވެއެވެ.
މިދިޔަ އަހަރުގެ އޮގަސްޓު މަހު ފެނަކައިން ވަނީ، އައްޑޫ ސިޓީގެ ކަރަންޓުގެ މައްސަލައަށް ދެ އަހަރުން ދާއިމީ ހައްލެއް ގެނެވޭނެ ކަމަށް ބުނެފައެވެ.