ވެރިކަން ހިންގާ ޕީއެންސީގެ ސެކްރެޓަރީ ޖެނެރަލްގެ މަގާމުގައި ހުންނެވި ޒީނާޒު އަދުނާންގެ މަގާމުގެ މުއްދަތު ހަމަވުމުން އިތުރު ފުރުސަތެއް ނުދެއްވައި, ޑިފެންސް މިނިސްޓްރީގެ ސްޓޭޓް މިނިސްޓަރު މުއާޒު ހަލީމު އެ މަގާމަށް މިއަދު އައްޔަނުކުރައްވައިފިއެވެ.
މި ސަރުކާރުގެ ލޯކަލް ގަވަނަންސް މިނިސްޓަރު އާދަމް ޝަރީފް އުމަރުގެ އަނބިކަނބަލުން ޒީނާޒު ޕީއެންސީގެ އެސްޖީއަކަށް އައްޔަން ކުރެއްވީ މިދިޔަ އަހަރުއެވެ.
'ސަން' އަށް އެނގިފައިވާ ގޮތުގައި ޒީނާޒްގެ ދައުރު ހަމަވެފައި ވަނީ މިދިޔަ ޑިސެމްބަރު 31، ގެ ނިޔަލަށެވެ. އެ މުއްދަތު ހަމަވުމުން އިތުރު ފުރުސަތެއް ޒީނާޒަށް ނުދެއްވަން ޕާޓީގެ ލީޑާޝިޕުން ނިންމީއެވެ.
އޭގެ ފަހުން މިއަދާ ހަމައަށް އެ މަގާމު ހުސްކޮށް އޮތުމަށް ފަހު މިއަދު ވަނީ އެ މަގާމަށް މުއާޒު އައްޔަނުކުރައްވާފައެވެ.
ޕީއެންސީގެ އިދާރީ ކަންކަން ހިންގުމާ ހަވާލުވެ ހުންނަވާނީ އެ އިރެއްގައި އެސްޖީކަމުގައި ހުންނަވާ ބޭފުޅެވެ.
ޕީއެންސީއަށް ވަގު ފޯމު ފުރައިގެން މެންބަރުން ވައްދާ ކަމުގެ އަޑުތައް ވެސް މިހާރު އޮތީ ގަދަވެފައެވެ. އެގޮތުން ވައިކަރަދޫ ދާއިރާގެ އެމްޑީޕީގެ މެންބަރު ހުސައިން ޒިޔާދު (ފިއްޓޭ) އަށް ވެސް ނޭނގި އޭނާ ޕީއެންސީއަށް ވެއްދި މައްސަލައެއް މިއަދު ވަނީ ފެންމަތިވެފައެވެ.