މިދިޔަ ސަރުކާރުން ހިންގި ބޯހިޔާވަހިކަމުގެ މަޝްރޫއު، ގެދޮރުވެރިޔާ ސްކީމަށް ކުރިމަތިލާފައިވާ 20،000 މީހުންގެ ފޯމުތައް އިވެލުއޭޓްކުރުމުގެ ބަދަލުގައި މިދިޔަ ސަރުކާރުން އިއުލާނުކުރި 4000 މީހުންގެ ފުލެޓު ލިސްޓު ވެރިފައިކުރުމުގެ މަސައްކަތް ކުރަން ސަރުކާރުން ނިންމައިފިއެވެ.
ނޫސްވެރިންގެ ބައްދަލުވުމެއްގައި ވާހަކަދައްކަވަމުން ހައުސިން މިނިސްޓަރު ޑރ. އަބްދުﷲ މުއްތަލިބް ވިދާޅުވީ، ގެދޮރުވެރިޔާ ސްކީމުގެ ދަށުން ދެ ކޮޓަރި އަދި ތިން ކޮޓަރީގެ އެޕާޓްމެންޓަށް އެދި ޖުމުލަ 20،709 ފޯމު ހުށަހަޅާފައިވާ ކަމަށެވެ.
ދެ ކޮޓަރީގެ އެޕާޓްމެންޓަށް އެދި 6،208 ފޯމު އަދި ތިން ކޮޓަރީގެ އެޕާޓްމެންޓަށް އެދި 14،489 ފޯމު ހުށަހަޅާފައިވާ ކަމަށް މިނިސްޓަރު މުއްތަލިބު ވަނީ ވިދާޅުވެފައެވެ. އޭނާ ވިދާޅުވީ، 4000 ހައުސިން ޔުނިޓުގެ ތެރޭގައި ދެ ކޮޓަރީގެ 1250 ޔުނިޓު އަދި ތިން ކޮޓަރީގެ 2750 ޔުނިޓު ހިމެނޭ ކަމަށެވެ.
ހުށަހެޅުނު ފޯމުތައް އިވެލުވޭޓްކުރަން ގެދޮރުވެރީންގެ ކޮމެޓީގެ ނަމުގައި ކޮމިޓީއެއް އުފައްދައި، އެ ކޮމިޓީގެ ބެލުމުގެ ދަށުން ފޯމުތައް އިވެލުއޭޓްކޮށް، ވަގުތީ ލިސްޓު އާންމުކޮށްފައިވާއިރު ފުރަތަމަ ލިސްޓް ގެޒެޓުކުރީ ނޮވެމްބަރު ހަތަރެއް، 2023 ގައެވެ.
މިނިސްޓަރު ވިދާޅުވީ، ގެދޮރުވެރިކަމާ ބެހޭ މަސައްކަތް ހަވާލުވުމުން، ކަންކަން ހިނގާފައިވާ ގޮތަށް ބަލައި އިއުލާނުކުރެވިފައިވާ ލިސްޓާ ގުޅޭގޮތުން ރައީސް ޑރ. މުހައްމަދު މުއިއްޒުގެ ސިޔާސަތުތަކާ އެއްގޮތަށް ގެންދިއުމަށްޓަކައި ފުލެޓު ލިސްޓަށް ފޯމު ލާފައިވާ ހުރިހާ އެންމެން އިވެލުއޭޓް ކުރުމުގެ ބަދަލުގައި 15 ނޮވެމްބަރުގައި އިއުލާންކޮށްފައިވާ ލިސްޓުގެ ވެރިފިކޭޝަން ޕްރޮސެސް ކުރިއަށް ގެންދަން ނިންމާފައިވާ ކަމަށެވެ.
ކޮންސްޓްރަކްޝަން މިނިސްޓަރު މުއްތޮލިބް: ވިދާޅުވީ، ފޯމުތައް އެއްކޮށް އިވެލުއޭޓް ނުކުރަން ނިންމާފައިވާ ކަމަށް -- ސަން ފޮޓޯ/ މޫސާ ނަދީމް
"މި ވެރިފިކޭޝަން ޕްރޮސެސް ކުރިއަށް ގެންދާއިރު ބަލާނީ 26 ޖޫން 2022 ގައި ގެޒެޓުކުރެވުނު ގެދޮރުވެރިޔާ ސްކީމްގެ ދަށުން ފުލެޓު ދޫކުރާ އުސޫލު ޖީ 20/ 2022 އަށް،" މިނިސްޓަރު ވިދާޅުވިއެވެ.
އޭނާ ވިދާޅުވީ، މާލޭގައި 15 އަހަރު ދިރިއުޅުނުކަން ސާބިތުކޮށްދޭން ހުށަހެޅިދާނެ ލިޔެކިޔުންތައް ކަމަށް ޕޯޓަލްގައި ބަޔާންކޮށަފއިވާ ލިޔުންތަކަކީ މި ސްކީމުގައި ފޯމުތައް އިވެލުއޭޓްކުރަން ބަލަންޖެހޭ ލިޔުންތައް ކަމަށެވެ.
އޭގެ ތެރޭގައި:
- މާލޭގައި ވަޒީފާ އަދާ ކުރިކަމުގެ ލިޔުން.
- އަނބިމީހާ، ފިރިމީހާ ކައިވެނި ކުރުމަށް ފަހު ވަޒީފާ އަދާ ކުރިކަމުގެ ލިޔުން.
- ސްކޫލު، ކޮލެޖް، ޔުނިވާސިޓީގައި ކިޔަވަމުންދާކަމުގެ ލިޔުން.
- އަނބިމީހާ، ފިރިމީހާ ކައިވެންޏަށް ފަހު ސްކޫލް، ކޮލެޖް، ޔުނިވާސިޓީގައި ކިޔަވަމުންދާކަމުގެ ލިޔުން.
- ދަރިން މާލެ ސްކޫލް، ކޮލެޖު، ޔުނިވާސިޓީގައި ކިޔަވަމުންދާކަމުގެ ލިޔުން.
- ޕެންޝަނާ ބެހޭ ލިޔުންތައް.
މިނިސްޓަރު ވިދާޅުވީ، ޕޯޓަލްގައި ހުށަހެޅިދާނެ ކަމަށް ބަޔާންކޮށަފައިވާ ލިޔުންތައް ނޫން ލިޔުންތަކަކީ ގާނޫނީ ގޮތުން ބަލައިގަނެވިދާނެ ލިޔުންތަކެއް ނޫން ކަމަށެވެ.
ރައީސް މުއިއްޒު ވަނީ ބަޔަކަށް ލިބިފައި އޮތް ފުލެޓެއް އަތުލުމުގެ ވިސްނުންފުޅެއް ނެތް ކަމަށާއި ފުލެޓު ލިބޭ މީހުންގެ ދާއިމީ ލިސްޓު، ރޯދަ މަހުގެ ކުރިން އިއުލާނުކުރެވޭނެކަމުގެ ބޮޑު ޔަޤީންކަމެއް އެބައޮތް ކަމަށް މީގެ ކުރިން ވިދާޅުވެފައެވެ.
ގެދޮރުވެރިޔާ ސްކީމްގެ ދަށުން ފުލެޓު ލިބޭ މީހުންގެ ލިސްޓު ކުރިން އާންމުކުރި ނަމަވެސް، އެ ލިސްޓުގައި ބޮޑެތި ގޯސްތަކެއް އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ)ން ކުރިން އެކަން ހުއްޓުވިއެވެ. އެހެންވެ، މި ސަރުކާރުން ލިސްޓު ރީއިވޭލުއޭޓްކުރަން ނިންމައިފައިވެއެވެ.
ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުންނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ.