ޏ. ފުވައްމުލަކުގައި ފުޅާ ދާއިރާއެއްގައި ޑުރަގު ވިއްކައި، މަނީލޯންޑާކުރި ކަމުގެ ތުހުމަތުގައި މިދިޔަ ޑިސެންބަރު މަހު ނުވައެއްގައި ހައްޔަރު ކުރި ދެމީހުން ހައިކޯޓުން ދޫކޮށްލާފައި ވަނިކޮށް، އަލުން ހައްޔަރުކުރުމަށް ކްރިމިނަލް ކޯޓުން އަމުރެއް ނެރެފިއެވެ.
އެ މައްސަލާގައި ހައްޔަރުކޮށްފައި ހުރީ، ޏ. ފުވައްމުލަކު ދޫޑިގަން، ކަރަންކާވިލާ އުމުރުން 34 އަހަރުގެ އަޙުމަދު ނިއުޝާދާއި ޏ. ފުވައްމުލަކު ދޫޑިގަން، ޒަމާނީގެ އުމުރުން 29 އަހަރުގެ ޙަސަން ޢާޒިމެވެ.
އެ ދެމީހުންގެ މައްޗަށް ކުރަނީ މަސްތުވާތަކެއްޗާއި މަނީ ލޯންޑަރިންގެ ދައުވާއެވެ.
މިމަހުގެ ނުވައެއްގައި ހައިކޯޓުން ވަނީ އެ ދެމީހުން ވެސް ދޫކޮށްލާފައެވެ. ނަމަވެސް އިއްޔެ ކްރިމިނަލް ކޯޓުން ނެރުނު އަމުރުގައި ވަނީ އެ ދެމީހުން އަލުން ހައްޔަރުކުރުމަށް އަމުރުކޮށްފައެވެ.
ކްރިމިނަލް ކޯޓު އަމުރުގައި ބުނެފައިވާ ގޮތުގައި އެ މައްސަލައާ ގުޅިގެން އެ ދެމީހުން ޝަރީއަތް ނިމެންދެން ބަންދުގައި ބަހައްޓަން ޏ. ފުވައްމުލަކު ކޯޓުން ނެރުނު އަމުރު ރާއްޖޭގެ ހައިކޯޓުން ބާތިލުކުރި ނަމަވެސް، އައު އަމުރެއްގެ ދަށުން އެ ދެމީހުން އަލުން ހައްޔަރުކޮށް ބަންދުކުރުމަށް ހުރަހެއް އޮތްކަމަށް ނުފެންނަ ކަމަށެވެ.
އަދި އެ މައްސަލައިގެ ތަހުގީގު މިދިޔަ އަހަރުގެ ޖޫން މަހުން ފެށިގެން ކުރިއަށްދާ ކަމަށާއި، އެ މައްސަލައިގައި ހިމެނޭ އިތުރު ބައެއްގެ މައްޗަށް ދައުވާކޮށްފައިވާ ކަމަށް ވެސް އިންވެސްޓިގޭޓިވް އޮފިސަރު (އައިއޯ) ފާހަގަކޮށްފައިވާ ކަމަށް ބުނެފައިވެއެވެ.
އެ މައްސަލައިގައި އޭނާގެ އެކައުންޓުން ފަސް މިލިއަން ރުފިޔާ ރޯލްކޮށްފައިވާއިރު، އޭނާއަކީ ދާއިމީކޮށް ވަޒީފާއެއްގައި އުޅުނު މީހެއްކަން އެނގެން ނެތްކަމަށާއި، އޭނާއަށް މުސާރައިގެ ގޮތުގައި ލިބުނު ފައިސާއާއި ނުބައްދަލު އަދަދުތަކުން އޭނާގެ އެކައުންޓަށް ފައިސާ ޖަމާވެ، އެހެން މީހުންނަށް ފައިސާ ފޯރުވައިދީފައިވާކަން ފާހަގަކުރެވޭ ކަމަށް އައިއޯ ފާހަގަކޮށްފައިވާ ކަމަށް ކޯޓު އަމުރުގައިވެއެވެ.
ކްރިމިނަލް ކޯޓުން އަމުރުކުރީ އިއްޔެއިން ފެށިގެން ހަތް ދުވަސް ވަންދެން އެ ދެމީހުން ކަސްޓޯޑިއަލް ޖަލެއްގައި ބަންދުކުރުމަށެވެ.
ކުރިން ފުލުހުން ބުނީ، ތަހުގީގަށް ހޯދިފައިވާގޮތުން ފާއިތުވި ފަސް އަހަރުގެ ތެރޭގައި ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށެވެ. ފާއިތުވި ދެ އަހަރުގެ ތެރޭގައި އާޒިމްގެ ބޭންކު އެކައުންޓް މެދުވެރިކޮށް ހަތް މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ވެސް ފުލުހުން ވަނީ ބުނެފައެވެ.