ޏ. ފުވައްމުލަކުގައި ފުޅާ ދާއިރާއެއްގައި ޑުރަގު ވިއްކައި، މަނީލޯންޑާކުރި ކަމުގެ ތުހުމަތުގައި މިދިޔަ ޑިސެންބަރު މަހު ނުވައެއްގައި ހައްޔަރު ކުރި ދެމީހުން ދޫކޮށްލަން ހައި ކޯޓުން މިއަދު އަމުރުކޮށްފިއެވެ.
އެ މައްސަލާގައި ހައްޔަރުކޮށްފައި ހުރީ، ޏ. ފުވައްމުލަކު ދޫޑިގަން، ކަރަންކާވިލާ އުމުރުން 34 އަހަރުގެ އަޙުމަދު ނިއުޝާދާއި ޏ. ފުވައްމުލަކު ދޫޑިގަން، ޒަމާނީގެ އުމުރުން 29 އަހަރުގެ ޙަސަން ޢާޒިމެވެ.
މި މައްސަލާގައި އިތުރު ބަޔަކު ހައްޔަރުކޮށްފައި ވީ ނަމަވެސް، ފުލުހުން ދެ މީހުން މައްޗަށް ތުހުމަތު ކުރަނީ މިކަމުގައި އެންމެ އިސްކޮށް އުޅޭ ކަމުގެ ތުހުމަތެވެ.
ކުރިން ފުލުހުން ބުނީ، ތަހުގީގަށް ހޯދިފައިވާގޮތުން ފާއިތުވި ފަސް އަހަރުގެ ތެރޭގައި ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށެވެ. ފާއިތުވި ދެ އަހަރުގެ ތެރޭގައި އާޒިމްގެ ބޭންކު އެކައުންޓް މެދުވެރިކޮށް ހަތް މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ވެސް ފުލުހުން ވަނީ ބުނެފައެވެ.
ދެމީހުން ބަންދުން މިނިވަންވީ، އެމީހުންގެ ބަންދާ މެދު ގޮތެއް ނިންމަން ފުވައްމުލަކު މެޖިސްޓްރޭޓް ކޯޓަށް ހާޒިރުކުރުމުން ދެމީހުން ޝަރީއަތް ނިމެންދެން ބަންދުކުރަން އަމުރުކޮށްފައި ވަނިކޮށެވެ.
މީގެއިތުރުން، މި މައްސަލާގައި ހައި ކޯޓުން ވަކިވަކިން ނެރެފައިވާ ދެ ގަޒިއްޔާގައި ވާ ގޮތުން، އާޒިމާއި ނިއުޝާދުގެ ޝަރީއަތް ނިމެންދެން ބަންދުކުރަން ފުވައްމުލަކު މެޖިސްޓްރޭޓް ކޯޓުން އަމުރުކުރީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއަށް ރިއާޔަތްކޮށްފައެވެ.
މި މައްސަލައިގައި ދެ ގަޒިއްޔާގައި ފަނޑިޔާރުން ބަލަން ޖެހޭ ކަމަށް ބުނެފައިވަނީ ނިއުޝާދާއި އާޒިމްގެ ތުހުމަތުކުރެވޭ ކުށް އެމީހުން ކުރި ކަމަށް ބާރު ލިބިދޭ ހެކި ހުރިތޯއެވެ. އެގޮތުން، ހެކި ހުރިނަމަ، ހެކީގެ ނިސްބަތަށް ބަލައި، ދެ ހާލަތެއް އެ މައްދާގައި ބަޔާންކުރާ ކަމަށް ގަޒިއްޔާގައި ބުނެއެވެ.
އެއީ ތުހުމަތުކުރެވޭ މިންވަރަށް ހެކި ހުރުމާއި ކުށް ކުރި ކަމަށް ތުހުމަތުކުރެވޭ މިންވަރަށް ހެކި އެވަގުތު ނެތް ކަމުގައި ވިޔަސް ތުހުމަތުކުރެވޭ ކޮންމެވެސް މިންވަރެއްގެ ހެކި ހުރުމެވެ.
އެގޮތުން، އާޒިމް ބަންދުކުރަން ނެރެފައިވާ އަމުރުގައި ހެކީގެ މިންވަރު ބަޔާންކުރަމުން "އެކަށީގެންވާ ހެކި ހުރި" ކަމަށް ބުނެފައި، އިތުރު ދެ ތަނެއްގައި ތުހުމަތުކުރެވޭ "ކޮންމެވެސް" މިންވަރެއްގެ ހެކި ހުރި ކަމަށް ބުނެފައިވާ ކަމަށް ހައި ކޯޓުން ބުނެއެވެ.
ނިއުޝާދު ބަންދުކުރުމަށް ނެރުނު އަމުރުގައި ވެސް ތިން ތަނެއްގައި ތުހުމަތުކުރެވޭ ކޮންމެވެސް މިންވަރެއްގެ ހެކި ހުރި ކަމަށް ބަޔާންކޮށްފައިވާ ކަމަށް އެ ކޯޓުން ބުނެފައިވެއެވެ.
ދެ މީހުންގެ އަމުރުގައި ވެސް ރިއާޔަތްކޮށްފައި ވަނީ ޖިނާއީ އިޖުރާއަތުގެ ގާނޫނުގެ 60 މާއްދާގެ (ށ) ގައި ބަޔާންކޮށްފައިވާ ތުހުމަތު ކުރެވޭ މިންވަރަށް ހެކި ހުންނަ ހާލަތުގެ ވާހަކައަށް ކަމަށް ކޯޓުން ބުނެފައިވެއެވެ.
އިތުރަށް ހައި ކޯޓުން ބުނި ގޮތުގައި، ދައުލަތުން ވެސް އެއްބަސްވާ ގޮތަށް ތުހުމަތު ކުރެވޭ ކޮންމެވެސް މިންވަރެއްގެ ހެކި ހުރި ކަމަށް ބަޔާންކުރުމަށް ފަހު، ޝަރީއަތް ނިމެންދެން ބަންދު ކުރަން ނިންމުމަކީ ޖިނާއި އިޖުރާއަތުގެ ގާނޫނުގެ 60ވަނަ މާއްދާއާ ޚިލާފު ނިންމުމެއް ކަމަށެވެ.
މި މައްސަލާގައި ދައުލަތުން ވަކާލާތުކޮށްފައި ވަނީ ދަށު ކޯޓަށް ހެދިފައި އޮތް ގޯހަކީ ބަންދު އަމުރަށް ބުރޫނާރާނެ އިޖުރާއީ އައިބެއްގެ ގޮތުގައި ކަނޑައަޅައިދިނުމަށް ކަމަށް ކޯޓުން ބުނެއެވެ. ނަމަވެސް، އެކަން އެހެން ކަނޑައެޅޭނެ ގާނޫނީ ހަމައެއް ދައުލަތަށް ދެއްކިފައިނުވާއިރު، އެކަން އެހެން ނިންމިފައި ވަނީ ދަށު ކޯޓަށް ހެދިފައިވާ ގޯހެއްގެ ސަބަބުން ކަމަށް ކޯޓުން ވަނީ ބުނެފައެވެ.
އެ ސަބަބުތައް އެހެން ހުރުމާ އެއްކޮށް ހައި ކޯޓުން ވަނީ ފުވައްމުލަކު މެޖިސްޓްރޭޓް ކޯޓުން ދެ މީހުން ޝަރީއަތް ނިމެންދެން ކޮށްފައިވާ އަމުރު ބާތިލުކުރުމަށް ނިންމާފައެވެ.