ސަރުކާރުގެ މަސް ކުންފުނި، މިފްކޯގެ ޗީފް ފައިނޭންޝަލް އޮފިސަރު (ސީއެފްއޯ)ގެ މަގާމުގައި ހުންނެވި އިލިޔާސް ހަނީފް މިއަދު މަގާމުން އިސްތިއުފާ ދެއްވައިފިއެވެ.
މިފްކޯގެ މީޑިއާ އޮފިޝަލް ވަނީ އިލިޔާސް އިސްތިއުފާ ދެއްވާފައިވާކަން "ސަން"އަށް ކަށަވަރުކޮށްދީފައެވެ.
މިދިޔަ މަހު ކުރީކޮޅު މިފްކޯގެ ސީއީއޯއަކަށް ސްވިޓްޒަލެންޑުގެ ރައްޔިތެއް ކަމަށްވާ ޑރ. ވިޓާލީ ލުބިމޯވް ވަނީ އައްޔަންކޮށްފައެވެ.
ކުރިން މިފްކޯގެ ސީއީއޯއަކަށް ހުންނެވި އަހުމަދު ސަމާހު ރަޝީދުގެ މައްސަލަތަކެއް ވެސް ފެންމަތިވިއެވެ. އެ ކަންކަން ބެލުމަށް ފަހު، ސަމާހް މަގާމުން ވަކިކުރީއެވެ.
ފާހަގަކޮށްލެވޭ ގޮތުގައި ރައީސް ޑރ. މުހައްމަދު މުއިއްޒު ވަނީ މިފްކޯގެ ތެރޭގައި އޮތް ކޮރަޕްޝަން މުލުން ލުހެލާނެ ކަމަށް ވިދާޅުވެފައެވެ. އެ މަނިކުފާނު އެ ފަދައިން ވިދާޅުވީ، މިދިޔަ ހަފުތާގައި ގއ. އަދި ގދ.އަށް ކުރެއްވި ދަތުރުފުޅުގެ ތެރެއިން ނޫސްވެރިންނާ ވާހަކަދައްކަވަމުންނެވެ.
ސަރުކާރުން މިފްކޯގެ ސީއީއޯކަމަށް ބޭރު ބޭފުޅެއް އައްޔަންކުރެއްވީ ވެސް އެ ސަބަބަށްޓަކައި ކަމަށް ރައީސް ވިދާޅުވިއެވެ.
މި ސަރުކާރުން މި ފަހުން ވަނީ ބޭންކް އޮފް މޯލްޑިވްސް (ބީއެމްއެލް)ގައި އެކައުންޓު ހުޅުވާފައިވާ މަސް ދޯނިތަކަށް 48 ގަޑިއިރު ތެރޭ ފައިސާ ދޫކުރަން ފަށައިފައެވެ.