މާދަމާއިން ފެށިގެން އަނެއްކާވެސް ރާއްޖޭގެ ބޮޑު ބަޔަކަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާ (މެޓް އޮފީހުން) މިއަދު ލަފާކޮށްފިއެވެ.
މެޓުން ބުނީ ކުރިޔަށް އޮތް 24 ގަޑިއިރަށް ރާއްޖެގެ ގިނަ ހިސާބުތަކަށް މޫސުން ރީތިވާނެކަމަށާއި ކަނޑުތައް ވެސް މަޑުވާނެކަމަށެވެ.
އެހެންނަމަވެސް ރާއްޖޭގެ އިރުމައްޗަށް ވާގޮތަށް ސްރީލަންކާގެ ދެކުނުގައިއާއި ރާއްޖޭގެ ހުޅަނގުގައި ވެސް ކޮޅިގަނޑެއް އުފެދިފައިވާކަމަށާއި މި ކޮޅިގަނޑުގެ ބާރު ގަދަވެ އޭގެ އަސަރު ރާއްޖެއަށް ކޮންމެސް ވަރަކަށް މާދަމައިން ފެށިގެން ކުރާނެކަމަށް ލަފާކުރެވޭކަމަށެވެ.
މެޓުން ބުނީ ބޮޑަށް ލަފާކުރެވޭ ގޮތުގައި މި ވިއްސާރައިގެ އަސަރު ރާއްޖޭގެ ބޮޑު ހިސާބަކަށް ކުރާނެ ކަމަށެވެ. އަދި ގާތްގަނޑަކަށް ހަތަރު ދުވަހަށް މި ވިއްސާރަ ދެމިގެންދާނެކަމަށް ލަފާކުރެވޭކަމަށެވެ.
މިހާރު ކުރަމުންދާ ވިއްސާރާގައި މާލޭގައި ފެންބޮޑުވެ، ބައެއް ގެތަކާއި ފިހާރަތަކަށް ވެސް ފެންވަދެ، އެކި ވަރުގެ ގެއްލުންތައް ވަނީ ވެފައެވެ. އެގޮތުން މިދިޔަ ހުކުރު ދުވަހު މާލެއަށް ކުރި ވިއްސާރައިގައި ވަނީ ހަތް ގެއެއްގެ 44 މީހަކަށް ވަގުތީ ބޯހިޔާވަހިކަންދީފައެވެ.
މޫސުން ގޯސްވާ ދުވަސްވަރު، ކަނޑު ދަތުރުކުރުމުގެ ކުރިން މެޓު އޮފީހުން ނެރޭ އެލާޓުތަކަށް ސަމާލުވުމަށް އެ އިދާރާއިން އަބަދު ވެސް އިލްތިމާސްކުރެއެވެ.