މިދިޔަ އެމްޑީޕީގެ ސަރުކާރުގައި ފަހި ދިރިއުޅުން ކޯޕަރޭޝަން (އެފްޑީސީ)ން ހުޅުމާލޭ ދެވަނަ ފިޔަވަހީގައި އިމާރާތްކުރަން ފެށި 4،000 ފުލެޓުގެ މަސައްކަތް އެއްކޮށް ނިންމުމަށް އިތުރަށް ބޭނުންވާ 30 މިލިއަން ޑޮލަރު، ކުރިއަށް އޮތް ދެ މަސްތެރޭ ހަމަޖެހޭނެ ކަމަށް އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވެއްޖެއެވެ.
ސަން އޮންލައިންގެ 'އެޑިޓަރުގެ ސުވާލު' ޕްރޮގްރާމްގައި ވާހަކަދައްކަވަމުން ހަމްދާން ވިދާޅުވީ، ޓަވަރުތަކުގެ މަސައްކަތް ނިންމަން ބޭނުންވާ 30 މިލިއަން ޑޮލަރު ހޯދުމަށްޓަކައި ބޭރުގެ އެޖެންސީއަކާ އެކު މިހާރު ވާހަކަދައްކަމުން އަންނަ ކަމަށެވެ. އެ ކަމަށްޓަކައި ބައެއް ސާވޭތައް ވެސް ހަދާފައިވާ ކަމަށާއި، ސާފުކުރަންޖެހޭ ބައެއް ކަންކަން ސާފުކުރަމުން އަންނަ ކަމަށް އޭނާ ވިދާޅުވިއެވެ.
އެންމެ ލަސްވެގެން ވެސް ކުރިއަށް އޮތް ދެ މަސް ދުވަސް ތެރޭ އެ ފައިސާ ހޯދޭނެ ކަމަށް އޭނާ ވިދާޅުވިއެވެ.
މި ދެންނެވިހެން މި ދަނޑިވަޅުގައި ދިވެހި ދައުލަތަށް އެންމެ ފައިދާވާނެ ގޮތަކަށް ލޯން އެގްރިމަންޓްސް، ލޯން ޓާމްސް ސެޓްކުރެވޭތޯ އަޅުގަނޑުމެން މި މަސައްކަތްކުރަނީ. އަޅުގަނޑުމެން މި ބަލަނީ ކުރިއަށް އޮތް ދެ މަހެއްހާ ދުވަސް ތެރޭގައި އެ ފައިނޭންސް ލިބޭނެކަމަށް އެންމެ ލަސްވެގެން ވެސް، އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް
ހަމްދާން ވަނީ އެ މަޝްރޫއަށް އިތުރަށް ފައިސާ ބޭނުންވަނީ ކީއްވެކަން ހިއްސާކުރައްވާފައެވެ. ކުރީ ސަރުކާރުން އެ މަޝްރޫއަށް ބޭނުންވާ ވަރަށް ގިނަ ކަންތައްތަކެއް ޕްރޮޖެކްޓް ސްކޯޕުން އުނިކޮށްފައިވާކަން ހަމްދާން ފާހަގަކުރެއްވިއެވެ.
ހުޅުމާލޭގައި އެފްޑީސީން އަޅާ ބައެއް ފުލެޓުތައް --- ސަން ފޮޓޯ
އެގޮތުން، މިހާރު އޮތް ޕްރޮޖެކްޓް ސްކޯޕްގައި ޓަވަރުތަކުގެ ލޭންޑްސްކޭޕިންގެ އެއްވެސް މަސައްކަތެއް ނުހިމެނޭނެ ކަމަށް އޭނާ ވިދާޅުވިއެވެ. އަދި، ގާބޭޖް ޝޫޓް، ކޮމާޝަލް ލިފްޓްސް، ސައިނޭޖް، ޕާކިން އޭރިއާ, ބޫސްޓާ ޕަމްޕްސް، ބޫމް ގޭޓްސް، ފިންގާ ކޭބަލްސް، ސްވޭޖް ކަނެކްޝަން އަދި ވޯޓާ ކަނެކްޝަން ފަދަ ބައިވަރު ބޮޑެތި މަސައްކަތްތައް މިދިޔަ ދައުރުގައި ޕްރޮޖެކްޓް ސްކޯޕުން އުނިކޮށްފައިވާ ކަމަށް ހަމްދާން ވިދާޅުވިއެވެ.
އެއް ޕްރޮޖެކްޓް ސޮއިކުރުމުގެ ކުރިން ގާތްގަނޑަކަށް ގަޑިއިރެއްހާއިރު ކުރިން ވަނީ ޕްރޮޖެކްޓްގެ ސްކޯޕުން އިމާރާތުގެ މަތީ ފްލޯތަކުން ފެން ފިނުވުމަށް ބޭނުންކުރާ ބޫސްޓާ ޕަމްޕްތައް އުނިކޮށްފައި، އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް
މިފަދަ ބައިވަރު މައްސަލަތަކާ ހެދި ފައިނޭންސް ކޮށްފައި ހުރި ޕްރޮޖެކްޓަކަށް އިތުރު ފައިނޭންސް ހޯދަން ޖެހުނީ ކަމަށް ހަމްދާން ވިދާޅުވިއެވެ. އެއީ، ވަރަށް ބޮޑު ޗެލެންޖެއް ކަމަށް ވެސް އޭނާ ވިދާޅުވިއެވެ. ސަބަބަކީ ލޯން ދޭ ފަރާތްތަކުން އެއް ފަހަރު ފައިނޭންސްކޮށްފައި އޮތް ޕްރޮޖެކްޓަކަށް، ރިޕޭމަންޓް ނުދައްކާ އޮއްވައި އަލުން ފައިނޭންސް ކޮށްދޭން ފަސްޖެހުން ކަމަށް ހަމްދާން ފާހަގަކުރެއްވިއެވެ.
އެހެންނަމަވެސް، މަސައްކަތް ކުރަނީ އެ ފައިސާ ވީހާ ވެސް އަވަހަކަށް ހަމަޖައްސަން ކަމަށް ހަމްދާން ވިދާޅުވިއެވެ.
މިދިޔަ ނޮވެމްބަރު މަސް ތެރޭ 4،000 ފުލެޓު މަޝްރޫއަށް 30 މިލިއަން ޑޮލަރު އަދިވެސް ހަމަނުޖެހޭކަން ފާހަގަކުރައްވާ ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ ޕިއެންސީ މެންބަރު އަހުމަދު ނާޒިމް ވަނީ ކަންބޮޑުވުން ފާޅުކުރައްވާފައެވެ. އޭރު ނާޒިމް ވިދާޅުވީ، އެ 4،000 ފުލެޓުތަކުގެ ތެރެއިން 2،000 ޔުނިޓު އަޅަން ހަމަޖެއްސި ފައިސާއަކީ އިންޑިއާގެ އެގްޒިމް ބޭންކުން 85 ޕަސެންޓު ދައްކާގޮތަށް ހަމަޖެއްސި ފައިސާ ކަމަށެވެ. އިތުރަށް ސަރުކާރުން ދައްކަންޖެހޭ 15 ޕަސެންޓު އަދިވެސް ނުދެއްކޭ ކަމަށް އޭނާ ވިދާޅުވިއެވެ.
ބޯހިޔާވަހިކަމުގެ ކަންކަން ކުރީ ސަރުކާރުން ކޮށްފައި އޮތީ އެއްވެސް ދެކޮޅުޖެހޭ ގޮތަކަށް ނޫން ކަމަށް ވިދާޅުވެ ނާޒިމް ވަނީ ކަންބޮޑުވުން ފާޅުކުރައްވާފައެވެ.
ޓަވަރުތަކުގެ މަސައްކަތް ބަލާލުމަށްޓަކައި ކުރީގެ ހައުސިން މިނިސްޓަރާއެކު ހަމްދާން -- ފޮޓޯ/ އެފްޑީސީ
މި 4،000 ފުލެޓަކީ ނިމިދިޔަ ސަރުކާރުން އިއުލާންކުރި ގެދޮރުވެރިޔާ މަޝްރޫއުގެ ދަށުން، ފުރަތަމަ ފުލެޓު ލިބޭ މީހުންނަށް ދޭނެ ތަންތަނެވެ.
ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އޭސީސީން ފެށި ޖިނާއީ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު މިދިޔަ ފެބްރުއަރީ މަހު އޭސީސީން ވަނީ ބައެއް ކަންތަކަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ.
ހައުސިން މިނިސްޓްރީން ވަނީ ފުލެޓު ލިސްޓު ނެރޭނެ ކަމަށް ބުނެ އެކި ތާރީޚުތައް ވެސް ދީފައެވެ. ނަމަވެސް މިހާތަނަށް އެ ތާރީޚުތަކަކަށް ފުލެޓު ލިސްޓު ނެރެފައެއް ނެތެވެ. މިނިސްޓްރީން ބުނި ގޮތުގައި އަދިވެސް ކުރިއަށް ދަނީ ފުލެޓު ލިސްޓު ރިވިއުކުރުމުގެ މަރުހަލާއެވެ.
އެކަމާ ގުޅިގެން އާންމުން ވަނީ ހައުސިން މިނިސްޓްރީ ތެރެއަށް ވަދެ، މުޒާހަރާ ވެސް ކޮށްފައެވެ.