މިދިޔަ އެމްޑީޕީގެ ސަރުކާރުގައި ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި އިމާރާތްކުރަން ފެށި 4،000 ފުލެޓުގެ މަސައްކަތް އެއްކޮށް ނިންމުމަށް އިތުރު 30 މިލިއަން ޑޮލަރު ބޭނުންވާކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ ޕިއެންސީ މެންބަރު އަހުމަދު ނާޒިމް މިއަދު ވިދާޅުވެއްޖެއެވެ.
އަންނަ އަހަރަށް ލަފާކޮށް ހުށަހަޅާފައިވާ ބަޖެޓަށް ބަހުސްކުރައްވަމުން ނާޒިމް ވިދާޅުވީ, މަޖިލީހުގެ ކޮމިޓީތަކުގައި އިންނަވާ މެންބަރެއްގެ ހައިސިއްޔަތުން ލިބޭ މައުލޫމާތަށް ބަލާއިރު ބޯހިޔާވަހިކަމުގެ ކަންކަން ގޮސްފައި އޮތީ ވަރަށް ދޯދިޔާކޮށް ކަން އެނގިވަޑައިގަންނަވާ ކަމަށެވެ.
އެގޮތުން މިހާރު އެފްޑީސީގެ ފަރާތުން އިމާރާތްކުރަމުންދާ 4،000 ފުލެޓުގެ މަސައްކަތް ނިންމަން އަދި އިތުރު 30 މިލިއަން ޑޮލަރު ބޭނުންވާކަމަށް ނާޒިމް ވިދާޅުވިއެވެ. ސަބަބަކީ މިހާރު ހަވާލުކޮށްފައި އޮތް ކޮންޓްރެކްޓް އޮތީ ފުލެޓުތައް ނިންމަން ކުރަންޖެހޭ މަސައްކަތް ކުރެވޭ ގޮތަކަށް ނޫން ކަމުން ކަމަށް ނާޒިމް ވިދާޅުވިއެވެ.
[ފުލެޓުތަކުގައި] ކަރަންޓު ލާކަށް ފައިސާ ހިމަނާފައެއް ނެތް. ފެން ގުޅާކަށް ފައިސާ ލާފައެއް ނެތް. އެތަނުގެ ސެކިއުރިޓީއަށް ބޭނުންވާ ކަންކަން ހިމަނާފައެއް ނެތް. އެހެންވީމަ އެތަނަށް މީހުން ވައްދަނީ ކިހިނެއްތޯ؟ އަދިވެސް އެތަނަށް މީހުންނަށް ވަދެވޭ ގޮތެއް ނެތޭ. އަދިވެސް އެ ފައިނޭންސް ހަމައެއްވެސް ނުޖެހެއޭ، ދިއްގަރު ދާއިރާގެ މެންބަރު އަހުމަދު ނާޒިމް
ނާޒިމް ވިދާޅުވީ އެ 4،000 ފުލެޓުތަކުގެ ތެރެއިން 2،000 ޔުނިޓު އަޅަން ހަމަޖެއްސި ފައިސާއަކީ އިންޑިއާގެ އެގްޒިމް ބޭންކުން 85 ޕަސެންޓު ދައްކާގޮތަށް ހަމަޖެއްސި ފައިސާ ކަމަށެވެ. އިތުރަށް ސަރުކާރުން ދައްކަންޖެހޭ 15 ޕަސެންޓު އަދިވެސް ނުދެއްކޭ ކަމަށް އޭނާ ވިދާޅުވިއެވެ.
ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ކޮމިޓީގައި ވާހަކަދައްކަވަނީ: ވިދާޅުވީ 4،000 ފުލެޓުގެ މަސައްކަތް ނިންމަން އިތުރު 30 މިލިއަން ޑޮލަރު ބޭނުންވާ ކަމަށް -- ސަން ފޮޓޯ/ އަމަން ލަތީފް
ބޯހިޔާވަހިކަމުގެ ކަންކަން ކުރީ ސަރުކާރުން ކޮށްފައި އޮތީ އެއްވެސް ދެކޮޅުޖެހޭ ގޮތަކަށް ނޫން ކަމަށް ވިދާޅުވެ ނާޒިމް ވަނީ ކަންބޮޑުވުން ފާޅުކުރައްވާފައެވެ.
މި 4،000 ފުލެޓަކީ ނިމިދިޔަ ސަރުކާރުން އިއުލާންކުރި ގެދޮރުވެރިޔާ މަޝްރޫއުގެ ދަށުން، ފުރަތަމަ ފުލެޓު ލިބޭ މީހުންނަށް ދޭނެ ތަންތަނެވެ.
ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އޭސީސީން ފެށި ޖިނާއީ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު މިދިޔަ ފެބްރުއަރީ މަހު އޭސީސީން ވަނީ ބައެއް ކަންތަކަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ.
ހައުސިން މިނިސްޓްރީން ވަނީ ފުލެޓު ލިސްޓު ނެރޭނެ ކަމަށް ބުނެ އެކި ތާރީޚުތައް ވެސް ދީފައެވެ. އެންމެ ފަހުން ފުލެޓް ލިސްޓު ނެރޭނެ ކަމަށް އިއުލާންކޮށްފައި އޮތީ މިދިޔާ ހަފުތާގެ ނިޔަލަށެވެ. އެހެން ނަމަވެސް އެ ތާރީޚަށް ވެސް ލިސްޓު ނެރެވިފައެއް ނުވެއެވެ.
އެކަމާ ގުޅިގެން އާންމުން އިއްޔެ ވެސް ވަނީ ހައުސިން މިނިސްޓްރީ ތެރެއަށް ވަދެ، މުޒާހަރާވެސް ކޮށްފައެވެ.