ސަފާރީއަކުން ރޭ ކަނޑުމައްޗަށް ވެއްޓުނު ދިވެހި ފިރިހެނަކު ނުފެނިގެން ސިފައިންގެ އެހީތެރިކަމާ އެކު ހޯދަމުން އަންނަ ކަމަށް ފުލުހުން މިއަދު ބުނެފިއެވެ.
ގެއްލިގެން ހޯދަނީ، އަލީ އަރުޝަދު (35އ) ސީވީޑް، ނ. ހޮޅުދޫއެވެ.
ފުލުހުން މިއަދު ބުނީ، އދ. އަތޮޅުގެ ރިސޯޓެއް ކައިރީގައި އޮތް ސަފާރީއެއްގައި އުޅުނު ދިވެއްސަކު ގެއްލިގެން މިއަދު ރިޕޯޓުކޮށްފައިވާ ކަމަށެވެ.
އެ މީހާ ރޭގެ ވަގުތެއްގައި އެ ސަފާރީގެ ޑެކް މަތީ ހުއްޓައި ވެއްޓި، އަރިމަތީ ޑެކްގައި ޖެހި މޫދަށް ވެއްޓިފައިވާކަން ސީސީޓީވީ ކެމެރާ ފުޓޭޖުން އެނގޭ ކަމަށް ފުލުހުން ބުންޏެވެ.
އެ މީހާގެ ހޯދުމުގެ މަސައްކަތް ސިފައިންގެ އެހީތެރިކަމާ އެކު ކުރަމުން އަންނަ ކަމަށް ފުލުހުން ބުންޏެވެ.