މިދިޔަ އަންގާރަ ދުވަހު އެމެރިކާގެ ލޮސް އެންޖެލިސްގެ ޖަންގަލިތަކުގައި ރޯވެ، ފެތުރެމުންދާ އަލިފާންގަނޑު އަދިވެސް ކޮންޓްރޯލްނުވާ ކަމަށް ބޭރުގެ މީޑިއާތަކުން ރިޕޯޓުކޮށްފިއެވެ.
އެ ހާދިސާގެ ސަބަބުން ފަސް މީހަކު މަރުވެ، އެތައް ސަތޭކަ އިމާރާތެއް އަނދާ ހުލިވެ، މުޅި ސަރަހައްދުން 179،000 އަށް ވުރެ ގިނަ މީހުން ވަނީ ރައްކާތެރި ހިސާބުތަކަށް ގެންގޮސްފައެވެ.
އަލިފާންގަނޑު ނިއްވުމަށް މަސައްކަތްކުރި ނަމަވެސް ކޮންޓްރޯލުނުވާ ކަމަށް އަލިފާން ނިއްވުމުގައި މަސައްކަތް ކުރާ ފަރާތްތަކުން ބުނެއެވެ. މޫސުމަށް އަންނަ ބަދަލުތަކުގެ އަސްލު އަސަރު ކުރިއަށް އޮތް ދުވަސްތަކުގައި ވެސް އަލިފާންގަނޑު ކޮންޓްރޯލުވާނެ ކަމަށް ނުބެލެވޭ ކަމަށް ކަމާބެހޭ ފަރާތްތަކުން ބުނެއެވެ.
ލޮސް އެންޖެލިސް ކައުންޓީގެ ޝެރިފް ރޮބަޓް ލޫނާ ވިދާޅުވީ، މަރުވި މީހުންގެ އަދަދު އިތުރުވާނެ ކަމަށް ލަފާކުރާ ކަމަށާއި، ގެއްލުން ލިބުނު ސަރަހައްދުތަކުގައި އިތުރަށް ފުރިހަމަ ތަހުގީގެއް ކުރަން ޖެހޭ ކަމަށެވެ.
އަލިފާނުގެ ހާދިސާގައި ގެއެއް އަނދާ ހުލިވެފައި. ފޮޓޯ/ގެޓީ
މީގެ އިތުރުން، މަޝްހޫރު ހޮލީވުޑް ހިލްސް ސަރަހައްދަށް ނުރައްކާ ކުރަމުން އައި ސަންސެޓް އަލިފާންގަނޑު ކުޑަވާން ފެށި ނަމަވެސް އަދި ކޮންޓްރޯލްނުކުރެވެއެވެ. އެ ސަރަހައްދުން މީހުން ނެރުމުގެ އަމުރު މިހާރު ވަނީ އުވާލާފައެވެ.
ގާތްގަނޑަކަށް 2،000 ސްޓްރަކްޗާ ހަލާކުވެފައިވާއިރު، އޭގެ ތެރޭގައި ގެތަކާއި ސްކޫލްތަކާއި، އައިކޮނިކް ސަންސެޓް ބޯލްވާޑްގައި ހުރި ވިޔަފާރިތައް ހިމެނެއެވެ.
މިއީ އެމެރިކާގެ ތާރީޚުގައި ވެސް އެންމެ ގެއްލުން ބޮޑު އެއް އަލިފާނުގެ ހާދިސާ ކަމަށާއި އަލިފާން ރޯވެ ގެއްލުންވި މުދަލުގެ އަގު ބޮޑުވުމުން އިންޝުއަރެންސަށް އަށް ބިލިއަން ޑޮލަރު (6.5 ބިލިއަން ޕައުންޑް) އަށް ވުރެ ބޮޑު ގެއްލުމެއް ލިބޭނެ ކަމަށް ބެލެވޭ ކަމަށް އިންޝުއަރެންސް ކުންފުނިތަކުން ބުނެއެވެ.
ކުރިއަށް އޮތް ހަފުތާ ވެސް ވިއްސާރަވާނެ ކަމަށް ނުބެލެވޭތީ އަލިފާންގަނޑު އަދިވެސް ކޮންޓްރޯލު ނުވެދާނެ ކަމަށް ބީބީސީން ރިޕޯޓުކޮށްފައިވެއެވެ. ކެލިފޯނިއާގެ ފަޔާ އޮފިޝަލުން ބުރާސްފަތި ދުވަހުގެ ވަގުތެއްގައި ބުނި ގޮތުގައި އެ ސަރަހައްދުގައި މަދުވެގެން ފަސް އަލިފާންގަނޑު ރޯވެފައިވެއެވެ.
އެގޮތުން، އެންމެ ފުރަތަމަ އަލިފާން ރޯވީ ލޮސް އެންޖެލިސްގެ އިރުމަތީގައި އޮންނަ ޕެސިފިކް ޕެލިސޭޑެސް ކިޔައި ރީތި އަދި އަގުބޮޑު އަވަށެއްގައެވެ. އެ އަލިފާންގަނޑު މިހާތަނަށް 17،200 އަކަމީޓަރަށް ވުރެ ބޮޑަށް ވަނީ ފެތުރިފައެވެ.
އޭގެ ފަހުން ލޮސް އެންޖެލިސްގެ އުތުރުގައި އޮންނަ އަލްޓެޑެނާ ފަދަ ސިޓީތަކުގައި ރޯވި އީޓަން އަލިފާންގަނޑުގައި ވެސް ގާތްގަޑަކަށް 10،600 އަކަފޫޓުގެ ބިން ވަނީ އަނދާފައެވެ. މިއީ ދެވަނައަށް ރޯވި އެންމެ ބޮޑު އަލިފާންގަނޑެވެ.
އެޓްލާންޑާ ކޮމިޔުނިޓީ ޗާޗްގައި ރޯވެ އަނދަނީ. ފޮޓޯ/އޭޕީ
ލޮސް އެންޖެލެސްގެ ހުޅަނގު އުތުރުގައި އޮންނަ ސެން ފާނަންޑޯ ވެލީގެ ސިލްމާގައި ފެތުރެމުންދާ ހާސްޓު އަލިފާންގަނޑު ފެތުރެންފެށީ އަންގާރަ ދުވަހުގެ ރެއެވެ. އެ އަލިފާންގަނޑު މިހާތަނަށް 855 އަކަމީޓަރުގެ ސަރަހައްދަކަށް ވަނީ ފެތުރިފައެވެ.
ބުދަ ދުވަހު އަނދަން ފެށި ލިޑިއާ އަލިފާންގަނޑު ވަނީ 350 އޭކަރަށް ފެތުރިފައެވެ.
ބުދަ ދުވަހުގެ ހަވީރު ހޮލީވުޑް ހިލްސްގައި ސަންސެޓް އަލިފާންގަނޑު ފެތުރިގެން ދިޔައިރު، ގަޑިއެއްހާއިރު ވެސް ނުވަނީސް ގާތްގަނޑަކަށް 43 އަކަމީޓަރަށް ވަނީ ފެތުރިފައެވެ.
ޕެސިފިކް ޕެލިސޭޑްސްއަކީ އެމެރިކާގެ އެންމެ އަގުބޮޑު އެއް އަވަށެވެ. ގިނަ އަދަދެއްގެ މަޝްހޫރު ފަންނާނުން ދިރިއުޅޭ އެ އަވަށުގެ ގެއެއްގެ އަގު އާންމުކޮށް 3.7 މިލިއަން ޑޮލަރަށް އަރައެވެ. އަގު ބޮޑެތި ގެތައް ދޫކޮށް އާންމުން އެ ސަރަހައްދު ދޫކޮށް ދަމުންދާއިރު އަލިފާނުގެ ސަބަބުން ލިބޭ ގެއްލުމުގެ އަގު އެތައް މިލިއަނަކަށް އަރާނެ ކަމަށް ބެލެވެއެވެ.
އަލިފާންގަނޑުތައް ފެތުރެން ފެށުމުގެ ކުރިން އެމެރިކާގެ ގައުމީ މޫސުމާ ބެހޭ ޚިދުމަތުން ވަނީ ހިކިފައިވާ ބޯގަސްތަކާއި ވައިގެ ތެތްކަން ދަށްވުމުގެ ސަބަބުން ބޮޑެތި އަލިފާންގަނޑުތައް ރޯވެ ފެތުރޭނެކަމުގެ އިންޒާރު ދީފައެވެ.