އުސޫލުން ބޭރުން ވިނަރެސް މަޝްރޫއިން ފްލެޓެއް ހޯދިކަމަށް ބުނެ ފުލުހުންގެ ޚިދުމަތުގެ އިކޮނޮމިކް ކްރައިމް އިންވެސްޓިގޭޝަންގެ ހެޑްގެ މަގާމުގައި މަސައްކަތްކުރައްވަމުން ގެންދަވާ ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބަށް ކުރެވޭ ތުހުމަތުތަކަށް ބާރުދޭ އެއްވެސް ކަމެއް ފުލުހުންގެ ތަހުގީގަށް ފާހަގަކުރެވިފައި ނުވާ ކަމަށް މިރޭ އެ އިދާރާއިން ބުނެފިއެވެ.
މި ފަހުން ރަޖުނީ އާންމުންނަށް ފެނިފައިވަނީ ހައްގުނޫން ބަޔަކަށް ހުޅުމާލެއިން ގޯތިދިން ކަމަށް ތުހުމަތުކުރާ މައްސަލައިގައި ފުލުހުން ބޭއްވި ނޫސްވެރިންގެ ބައްދަލުވުމުންނެވެ.
ފުލުހުން އެ ބައްދަލުވުމުގައި ދެއްކި ވާހަކަތަކަށްފަހު، ރަޖުނީއާ ގުޅޭ ތުހުމަތުތަކެއް ސޯޝަލް މީޑިއާގައި ފެންމަތިވިއެވެ. އެގޮތުން އޭނާ ނުހައްގުން ވިނަރެސް ފްލެޓެއް ހޯދައިފައިވާ ކަމަށް ބުނެ ސޯޝަލް މީޑިއާގައި ލިޔެކިޔުންތަކެއް އަންނަނީ ދައުރުކުރަމުންނެވެ.
އެއާއެކު ސޯޝަލް މީޑިއާގައި ޚިޔާލު ފާޅުކުރި ގިނަ ބަޔަކު ވަނީ އެ ފަދަ ތުހުމަތެއް އޭނާއާމެދު ކުރެވޭއިރު ގޯތިތަކުގެ މައްސަލަ ބެލުމުގައި އޭނާ އުޅުމަކީ މައްސަލައަށް ނުފޫޒެއް ނެތި ރަނގަޅަށް ބެލޭނެ ކަމެއް ކަމަށް ބުނެ ސުވާލު އުފައްދައިފައެވެ.
ފަހުން ފުލުހުންވަނީ އެ ކަމުގެ ތަހުގީގެއް ހިންގަން ފަށައި ރަޖުނީ މަސައްކަތުން އެކަހެރިކޮށްފައެވެ.
އެ ތަހުގީގާ ގުޅޭގޮތުން، ފުލުހުންގެ ތަރުޖަމާނު، އެސިސްޓަންޓް ކޮމިޝަނާ އޮފް ޕޮލިސް އަހްމަދު ޝިފާން މިރޭ ވިދާޅުވީ، ރަޖުނީއަށް ވިނަރެސް ހައުސިން މަޝްރޫއިން އުސޫލާ ޚިލާފަށް ފްލެޓެއް ލިބިފައިވާ ކަމަށް މީޑިއާގައި ފެތުރުނު މަޢުލޫމާތާ ގުޅިގެން، ފްލެޓެއް ލިބުމުގައި އުސޫލަކާ ޚިލާފު އެއްވެސް އަމަލެއް ހިނގައިފައިވޭތޯ، ކަމާބެހޭ އިދާރާތަކުން ހިއްސާކުރި މައުލޫމާތައް ދިރާސާކޮށް ބެލުމުން އެފަދަ ކަމެއް ފާހަގަކުރެވިފައި ނުވާ ކަމަށެވެ.
ފްލެޓްތަކާއި ގޯތިތައް ދިނުމުގައި އޮޅުވައިލުމުގެ މައްސަލަތަކެއް ފެންމަތިވިއިރު، ވިނަރެސް ފުލެޓުތައް ދިނުމުގައި ވެސް އޮޅުވާލުމަށް ސައްހަ ނޫން ލިޔެކިޔުންތަކެއް ބޭނުންކޮށްފައިވާ ކަމަށް އިތުބާރު ހުރި މަސްދަރަކުން "ސަން"އަށް ކުރިން ވަނީ މައުލޫމާތު ލިބިފައެވެ.
މި މައްސަލަތަކާ ގުޅިގެން އާންމުންގެ ނުރުހުން ވެސް ވަނީ އަމާޒުވެފައެވެ.