ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި އޮތް ޓެކްސީއެއް ދުއްވަން އިން މީހާއަށް ސިއްހީ ކުއްލި ހާލަތެއް ދިމާވެގެން އެ ކާރު ގޮސް ޕިކަޕެއްގެ ދަށުވެ ހިނގި ނުރައްކާތެރި އެކްސިޑެންޓަށް ފަހުގައި، ޑްރައިވަރުގެ ހާލު ރަނގަޅުވަމުން އަންނަ ކަމަށް ހުޅުމާލޭ ހޮސްޕިޓަލުން މިއަދު ބުނެފިއެވެ.
އެކްސިޑެންޓުވި މަންޒަރު ފެންނަ ފޮޓޯއާއި ވީޑިއޯތައް މީސްމީޑިއާގައި ދައުރުވާއިރު، ކާރު ފަހަތުން ގޮސް ޕިކަޕުގައި ޖެހުމުގެ ސަބަބުން ވަރަށް ބޮޑަށް ހަލާކުވެފައިވާ މަންޒަރު ފެނެއެވެ. ކާރުގެ ކުރީކޮޅު އެއްކޮށްހެން އޮތީ ހަލާކުވެފައެވެ. ކާރު އޮތީ ޕިކަޕުގެ ދަށުވެފައެވެ. އެކްސިޑެންޓުގައި އަނިޔާވީ ކާރު ދުއްވަން އިން ޑްރައިވަރަށެވެ.
މި އެކްސިޑެންޓު ހިނގީ އިއްޔެ ހެނދުނު 9:45 އެހާކަންހާއިރެވެ.
ހުޅުމާލޭ ހޮސްޕިޓަލުން މިއަދު "ސަން"އަށް ބުނީ، ކާރު އެކްސިޑެންޓުގައި އަނިޔާވި މީހާގެ ކަށީގެ ސާޖަރީއެއް ހެދުމަށް ފަހު، ހޮސްޕިޓަލުގައި އެޑްމިޓްކޮށްފައިވާ ކަމަށެވެ. އެ މީހާގެ ހާލު މިހާރު ރަނގަޅު ކަމަށް ވެސް ހޮސްޕިޓަލުން ބުންޏެވެ.
އެކްސިޑެންޓާ ގުޅިގެން އެކްސްގައި ކުރި ޕޯސްޓެއްގައި ވީއައިއޭ ހިންގާ އެމްއޭސީއެލުން ބުނީ، މި އެކްސިޑެންޓު ހިނގަން މެދުވެރިވީ ކާރު ދުއްވަން އިން މީހާއަށް މެދުވެރިވީ ކުއްލި ސިއްހީ ހާލަތެއްގެ ސަބަބުން ކަމަށް ޕްރެލިމިނަރީ އެސެސްމެންޓްތަކުން ލަފާކުރެވޭ ކަމަށެވެ.
ފުލުހުން ބުނީ، ޕިކަޕުގައި ޖެހުމުގެ ކުރިން ކާރު ރޯޑް ޑިވައިޑާތަކާއި ވޭނެއްގައި ވެސް ޖެހުނު ކަމަށެވެ.