ހުޅުމާލޭ ދެވަނަ ފިޔަވަހީގައި ސައިކަލަކާއި ކާރެއްޖެހި ނުރައްކާތެރި އެކްސިޑެންޓެއް ހިނގައިފިއެވެ.
"ސަން"އަށް މައުލޫމާތު ދެމުން ފުލުހުން ބުނީ ހުޅުމާލޭ ފޭސްދޭއްގެ ފިތުރޯނު މަގު ވެމްކޯ ސައިޓް ކައިރީގައި ކާރަކާއި ސައިކަލެއް ޖެހި އެކްސިޑެންޓް ވެފައި ވާކަމަށް މިއަދުގެ 14:45 ހާއިރު ފުލުހުންނަށް ރިޕޯޓް ކޮށްފައި ވާކަމަށެވެ.
އަދި މި އެކްސިޑެންޓްގައި ސައިކަލު ދުއްވަން އިން މީހާއަށް އެކި ވަރުގެ އަނިޔާތައް ލިބިފައިވާ ކަމަށާއި މިހާރު ހޮސްޕިޓަލުގައި ފަރުވާ ދެމުން އަންނަކަމަށް ފުލުހުން ވަނީ ބުނެފައެވެ.
ފުލުހުން ބުނީ މި އެކްސިޑެންޓް ގައި ސައިކަލަށާއި ކާރަށް ވެސް އެކި ވަރުގެ ގެއްލުންތައް ވެފައިވާ ކަމަށެވެ. އަދި މި މައްސަލަ ފުލުހުން ބަލަމުން ދާކަމަށް ވެސް ވަނީ ބުނެފައެވެ.
މި އެކްސިޑެންޓް ހިނގި ސަރަހައްދުގެ ވީޑިއޯއެއް ސޯޝަލް މީޑީއާގައި އާންމުވެފައި ވާއިރު އެ ސަރަހައްދުގައި ފުލުހުން ހަރަކާތްތެރިވާ މަންޒަރު ފެނެއެވެ. އެކްސިޑެންޓްވި ސައިކަލު އޮތީ ކާރާ މާ ދުރުގައި މަގުގެ އެއްފަޅީގައި ހުރި ގަސްގަނޑު މައްޗަށް ވެއްޓިފައެވެ.
މީގެ ދުވަސްކޮޅެއް ކުރީން ވެސް ވަނީ ހުޅުމާލޭގައި ސައިކަލަކާއި ޕޮލިސް ކާރެއް ޖެހި ނުރައްކާތެރި އެކްސިޑެންޓެއް ވަނީ ހިނގާފައެވެ.
އެ ހާދިސާގައި އަނިޔާވި 18 އަހަރުގެ ޒުވާނާއަށް މިހާރު ވެސް އައިޖީއެމްއެޗް ވެންޓިލޭޓަރުގައި ފަރުވާ ދެމުން އަންނައިރު ފުލުހުން ވަނީ ކާރު ދުއްވަން އިން އޮފިސަރުގެ އެއްވެސް އިހުމާލެއް ވޭތޯ ތަހުގީގު ކުރާ ކަމަށް ވެސް ބުނެފައެވެ.