ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ކާރަކާއި ޕިކަޕެއް ޖެހި ވަރަށް ނުރައްކާތެރި އެކްސިޑެންޓެއް މިއަދު ހިނގައިފިއެވެ.
އެކްސިޑެންޓުވި މަންޒަރު ފެންނަ ފޮޓޯއާއި ވީޑިއޯތައް މީސްމީޑިއާގައި ދައުރުވާއިރު، ކާރު ފަހަތުން ގޮސް ޕިކަޕުގައި ޖެހުމުގެ ސަބަބުން ވަރަށް ބޮޑަށް ހަލާކުވެފައިވާ މަންޒަރު ފެނެއެވެ. ކާރުގެ ކުރީކޮޅު އެއްކޮށްހެން އޮތީ ހަލާކުވެފައެވެ. ކާރު އޮތީ ޕިކަޕުގެ ދަށުވެފައެވެ.
މި އެކްސިޑެންޓު ހިނގީ މިއަދު ހެނދުނު 9:45 އެހާކަންހާއިރެވެ.
މި އެކްސިޑެންޓާ ގުޅިގެން ފުލުހުން ބުނީ، މި އެކްސިޑެންޓުގައި ކާރު ދުއްވަން އިން މީހާއަށާއި ކާރުގެ ފަހަތު ސީޓުގައި އިން މީހާއަށް ވެސް އަނިޔާވި ކަމަށެވެ. އެކަމަކު، ފަހަތު ސީޓުގައި އިން މީހާއަށް ސީރިއަސް އަނިޔާތަކެއްނުވާ ކަމަށާއި އެ މީހާއަށް ފަރުވާދީފައިވަނީ އެއާޕޯޓު ކްލިނިކުން ކަމަށް ފުލުހުން ބުންޏެވެ.
ކާރު ދުއްވަން އިން މީހާއަށް ފަރުވާދެމުން އަންނަނީ ހުޅުމާލޭ ހޮސްޕިޓަލުގައެވެ. އެ މީހާއަށް އެކިވަރުގެ އަނިޔާ ލިބިފައިވާ ކަމަށް ބުނި ނަމަވެސް ލިބުނު އަނިޔާތަކުގެ ތަފުސީލެއް ފުލުހުން ހިއްސާކޮށްފައެއް ނުވެއެވެ.
ފުލުހުން ބުނީ، ޕިކަޕުގައި ޖެހުމުގެ ކުރިން ކާރު ރޯޑް ޑިވައިޑާތަކާއި ވޭނެއްގައި ވެސް ޖެހުނު ކަމަށެވެ.
އެކްސިޑެންޓާ ގުޅިގެން ވީއައިއޭ ހިންގާ އެމްއޭސީއެލުން އެކްސްގައި ކުރި ޕޯސްޓެއްގައި ބުނީ، މި އެކްސިޑެންޓު ހިނގަން މެދުވެރިވީ ކާރު ދުއްވަން އިން މީހާއަށް މެދުވެރިވީ ކުއްލި ސިއްހީ ހާލަތެއްގެ ސަބަބުން ކަމަށް ޕްރެލިމިނަރީ އެސެސްމެންޓްތަކުން ލަފާކުރެވޭ ކަމަށެވެ.
މި އެކްސިޑެންޓު ފުލުހުން އަންނަނީ ތަހުގީގުކުރަމުންނެވެ.