މާލެ އަމީނީމަގު، ރެހެންދި ފްލެޓް, ކައިރިން ކާރެއް ޔޫ ޓާން ނެގުމުގެ ތެރެއިން އެހެން އުޅަނދެއްގައި ޖެހި އެކްސިޑެންޓެއް ހިނގައިފިއެވެ.
މި އެކްސިޑެންޓު ހިނގި ކަމަށް ފުލުހުންނަށް ރިޕޯޓް ކޮށްފައި ވަނީ މިއަދު 09:40 ހާއިރުކަމަށް ފުލުހުން ވަނީ މައުލޫމާތު ދީފައެވެ.
މި އެކްސިޑެންޓުގައި އެެއްވެސް މީހަކަށް އަނިޔާ ވެފައި ނުވާ ކަމަށާއި ނަމަވެސް ދެ އުޅަނދަށް ވެސް އެކިވަރުގެ ގެއްލުންތައް ލިބިފައިވާކަމަށް ފުލުހުން ވަނީ ބުނެފައެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ކާރަކާއި ޕިކަޕެއް ޖެހި ނުރައްކާތެރި އެކްސިޑެންޓެއް ވެސް މިއަދު ވަނީ ހިނގައިފިއެވެ.
މި އެކްސިޑެންޓާ ގުޅިގެން ފުލުހުން ބުނީ، މި އެކްސިޑެންޓުގައި ކާރު ދުއްވަން އިން މީހާއަށާއި ކާރުގެ ފަހަތު ސީޓުގައިއިން މީހާއަށް ވެސް އަނިޔާވި ކަމަށެވެ. އެކަމަކު، ފަހަތު ސީޓުގައިއިން މީހާއަށް ސީރިއަސް އަނިޔާތަކެއްނުވާ ކަމަށާއި އެ މީހާއަށް ފަރުވާދީފައިވަނީ އެއާޕޯޓު ކްލިނިކުން ކަމަށް ފުލުހުން ވަނީ ބުނެފައެވެ.
ފުލުހުން އަންނަނީ މި ކަހަލަ ނުރައްކާތެރި އެކްސިޑެންޓުތައް މަދުކުރުމަށް މަސައްކަތްތައް ކުރަމުންނެވެ.